ஐடி நிறுவனங்களில் CEO பதவிக்கு நிகராக முக்கியத்துவம் பெறும் புதிய பதவி.. பின்னணி என்ன?

பொதுவாக ஐடி நிறுவனங்களில் தலைமை செயல் அதிகாரி பொறுப்பு தான் மிக முக்கியமானதாக கருதப்படும். ஆனால் அண்மை காலமாக CFO எனப்படும் தலைமை நிதி அதிகாரி பொறுப்புக்கான முக்கியத்துவமும் அதிகரித்துள்ளது. எனவே ஐடி நிறுவனங்களில் இந்த பொறுப்புகளில் யார் நியமிக்கப்படுகிறார் என்பது செய்திகளில் இடம்பிடித்து விடுகிறது.

கடந்த 12 மாதங்களில் மட்டும் இந்தியாவை சேர்ந்த பெரிய ஐடி நிறுவனங்களில் 9 நிறுவனங்களில் தலைமை நிதி அதிகாரிகள் மாற்றப்பட்டுள்ளனர். 2023 ஆம் ஆண்டு தொடக்கத்தில் இருந்து ஐடி நிறுவனங்களின் தலைமை பொறுப்புகளில் பெரிய மாற்றங்களை காண முடிகிறது.

முதலில் தலைமை செயல் அதிகாரிகள் திடீரென பதவி விலகுவது அல்லது நிறுவனத்தினாலயே மாற்றப்படுவது என்பன போன்ற செயல்கள் நடைபெற்று வந்த நிலையில் , தற்போது தலைமை நிதி அதிகாரிகள் மாற்றப்பட்டு வருகின்றனர்.

சில நிறுவனங்களில் ஓய்வு உள்ளிட்ட காரணங்களுக்காக தலைமை நிதி அதிகாரிகள் மாற்றப்பட்டு இருப்பதாக கூறும் துறை சார்ந்த நிபுணர்கள், சில நிறுவனங்கள் தலைமை நிதி அதிகாரியின் பொறுப்புகளிலேயே பெரிய மாற்றங்களை கொண்டு வந்து அதற்கேற்ற வகையில் ஆட்களை மாற்றி இருப்பதாக கூறுகின்றனர்.

அதாவது தலைமை நிதி அதிகாரி பொறுப்பு என்பது வெறுமனே அலுவலகத்தில் அமர்ந்து நிதி பொறுப்புகளை மட்டும் பார்ப்பது என்பதோடு மட்டும் இல்லாமல் நிறுவன செயல்பாடுகளுக்கு ஏற்ப நிதி ரீதியான முடிவுகளை எடுப்பது என அந்த பதவியின் பொறுப்புகள் பெருமளவில் மாற்றம் கண்டுள்ளது எனக் கூறுகின்றனர்.

குறிப்பாக தலைமை நிதி அதிகாரி பொறுப்புகளில் இருப்பவர்கள் தற்போது தொழில் நுட்ப ரீதியாகவும் அறிவு பெற்றவர்களாக இருக்க வேண்டும் என நிறுவனங்கள் எதிர்பார்க்கின்றன. குறிப்பாக செயற்கை நுண்ணறிவு தொழில்நுட்பத்தில் சிறந்தவர்களாக இருக்க வேண்டும் என்று எதிர்பார்ப்பு நிறுவனங்கள் மத்தியில் எழுந்துள்ளது.

இதற்கு முன்பு வரை பேக் ஆபிஸ் பொறுப்பாக கருதப்பட்ட தலைமை நிதி அதிகாரி பொறுப்பு தற்போது ஃப்ரண்ட் ஆபிஸ் பொறுப்பாக மாற்றப்பட்டுள்ளது என்றும் நிறுவனம் சார்ந்த முக்கியமான முடிவுகளை எடுக்கும் பொறுப்பு அவர்களிடம் வழங்கப்பட்டுள்ளது என்றும் சர்வதேச தொழில் ஆய்வு நிறுவனமான ஹெச்எஃப்எஸ்- இன் தலைமை செயல் அதிகாரி பில் தெரிவித்துள்ளார்.

தற்போது பல்வேறு ஐடி நிறுவனங்களும் எப்படி தலைமை செயல் அதிகாரிகளை மிக கவனமாக தேர்வு செய்கின்றனவோ அதேபோல தலைமை நிதி அதிகாரிகளையும் மிக கவனமாக தேர்வு செய்கின்றன. அந்த வகையில் கடந்த 2024 ஆம் ஆண்டு முதல் தற்போது வரை விப்ரோ, காக்னிசென்ட் , இன்போசிஸ், கோ ஃபோர்ஜ், எல்டிஐ மைண்ட்ரீ, ஹெச்சிஎல் ஆகிய நிறுவனங்கள் தங்களுடைய தலைமை நிதி அதிகாரிகளை மாற்றியுள்ளன.

Story written by: Devika