ரூ.50,000 சம்பாதிப்பவர் பணக்காரர்.. ரூ.5 லட்சம் சம்பாதிப்பவர் ஏழை.. ஏன் தெரியுமா?

ஒரு தனிநபரின் வருமானம் அதிகமாக இருந்தால், அவர் பணக்காரராக இருப்பார் என்பது ஒரு பொதுவான நம்பிக்கை. ஆனால், வருமானத்திற்கும் செல்வத்திற்கும் இடையே உள்ள ஆழமான வேறுபாட்டைப் பலரும் உணர்வதில்லை. இது குறித்து, பட்டயக் கணக்காளர் நிதின் கௌசிக் தனது சமூக வலைத்தளப் பக்கத்தில் பகிர்ந்துள்ள கருத்து, நிதி ஒழுக்கத்தின் முக்கியத்துவத்தை அழுத்தமாக உணர்த்துகிறது. குறைவாக வைத்திருப்பவன் ஏழை அல்ல. அதிகமாக ஏங்கிக் கொண்டே இருப்பவனே பணக்காரனாக உணரமாட்டான் என்று அவர் கூறியது, உண்மையான செல்வம் என்பது வங்கிக் கணக்கில் உள்ள எண்களில் அல்ல, மனநிறைவு மற்றும் நிதியை நிர்வகிக்கும் திறனில்தான் உள்ளது என்பதை எடுத்துக்காட்டுகிறது.

இந்தக் கருத்தை விளக்குவதற்கு கௌசிக் இரண்டு உதாரணங்களை ஒப்பிடுகிறார். ஒரு நபர் மாதத்திற்கு ரூ.50,000 சம்பாதிக்கிறார். அவர் அதில் 20% தொகையை, அதாவது ரூ.10,000-ஐ தொடர்ந்து சேமித்து முதலீடு செய்கிறார். இந்தச் சிறிய, நிலையான நடவடிக்கை, அடுத்த பத்து ஆண்டுகளுக்குள் அவருக்கு ஒரு பெரிய நிதிப் பாதுகாப்பை உருவாக்கும். ஆனால், இதற்கு மாறாக, மற்றொரு நபர் மாதம் ரூ.5 லட்சம் சம்பாதிக்கிறார். ஆனால், அவர் பெறும் முழு வருமானத்தையும் செலவழித்து, ஆடம்பரமான வாழ்க்கை முறையைத் தக்கவைக்க முயற்சிப்பதால், அவர் எப்போதும் கடன் சுமையிலும், பணம் இல்லாத மனநிலையிலும்தான் இருப்பார்.

கூட்டு முதலீட்டின் மாபெரும் சக்தி: இந்த இரண்டு நிகழ்வுகளுக்கும் இடையே உள்ள அடிப்படை வித்தியாசம், கூட்டு வட்டி எனப்படும் நிதி ஒழுக்கமாகும். இதை, உலகின் எட்டாவது அதிசயம் என்று வர்ணிக்கிறார் நிதின் கௌசிக். ஒரு முதலீட்டின் மீது கிடைக்கும் வருமானம், மீண்டும் அதே முதலீட்டில் சேர்க்கப்பட்டு, அடுத்த வருமானத்தைத் திரட்ட உதவும் இந்த முறை, காலப்போக்கில் ஒரு பனிப்பந்து உருண்டு பெரிதாவதைப் போல், உங்கள் செல்வத்தையும் பன்மடங்கு பெருக்குகிறது.

உதாரணமாக, ஒரு நபர் மாதத்திற்கு ரூ.10,000-ஐ ஒரு முறையாக முதலீடு செய்யும் திட்டத்தில் (SIP) 12% கூட்டு ஆண்டு வளர்ச்சி விகிதத்தில் முதலீடு செய்தால், வெறும் 20 ஆண்டுகளில், அந்தச் சிறியத் தொகை ரூ.70 லட்சத்திற்கும் அதிகமாக வளரக்கூடும். இது, ஒருவர் எவ்வளவு முதலீடு செய்கிறார் என்பது மட்டுமல்ல, எவ்வளவு காலம் மற்றும் தொடர்ந்து முதலீடு செய்கிறார் என்பதைப் பொறுத்தது. இந்தத் தொடர்ச்சியான அணுகுமுறையே, நீண்ட கால செல்வ உருவாக்கத்திற்கு அடித்தளம் அமைக்கிறது.

செல்வம் என்பது மனநிலை-முதலீட்டாளர்களுக்கான அறிவுரை: இன்றைய நவீன உலகில், பணவீக்கம், வாழ்க்கை முறைப் பணவீக்கம் மற்றும் சமூக அழுத்தங்கள் ஆகியவை மக்களை அதிகமாகச் செலவு செய்யத் தூண்டுகின்றன. ஒருவரின் வருமானம் அதிகரிக்கும்போது, அதற்கேற்ப தங்கள் வாழ்க்கை முறையை உயர்த்துவது, நிதி ஒழுக்கத்தைக் குலைத்து, கடன் சுமையில் சிக்க வைக்கிறது. ஆனால், உண்மையான செல்வம் என்பது, இந்த மாயைகளைத் தாண்டி, போதும் என்ற மனநிலையை வளர்ப்பது பற்றியதுதான்.

கௌசிக் தனது செய்தியில், மக்களைப் பணத்தைப் பற்றிய தங்கள் அணுகுமுறையை மறுபரிசீலனை செய்ய அறிவுறுத்துகிறார். நான் எப்படி அதிகமாக சம்பாதிக்க முடியும்? என்று நீங்கள் கேட்பதற்கு முன், முதலில் கேளுங்கள். 'நான் ஏற்கனவே வைத்திருப்பதை அதிகப்படுத்துகிறேன். உண்மையான செல்வம் அங்குதான் தொடங்குகிறது என்று அவர் குறிப்பிட்டார். இது ஒவ்வொரு தனிநபரின் நிதிப் பயணத்திற்கும் ஒரு சரியான வழிகாட்டியாக அமையும். செல்வம் என்பது ஒரு இலக்கு மட்டுமல்ல, அது ஒரு பயணமாகும் அந்தப் பயணத்தில் நிதி ஒழுக்கம், பொறுமை மற்றும் ஞானமே நம்முடன் இருக்க வேண்டிய முக்கியப் பண்புகள்.