12வது கூட முடிக்கல, ஆனா 25000 கோடி நிறுவனத்திற்கு அதிபதி..!!

இந்தியாவில் தற்போது சாதாரண மக்களும் எளிமையான முறையில் பங்குச்சந்தைகளிலும், மியூச்சுவல் ஃபண்டுகளிலும் முதலீடு செய்து வருகின்றனர்.

இதற்கு, ஏஞ்சல் ஒன், குரோ, ஸெரோதா ஆகிய முதலீட்டு தளங்களின் வருகையின் முக்கிய காரணம். அந்த வகையில் இந்தியாவில் முதலீட்டுக்கான செயலிகளில் முன்னணியில் இருக்கிறது ஏஞ்சல் ஒன். இதன் நிறுவனர் 12ஆம் வகுப்பு மட்டுமே முடித்தவர்.

தினேஷ் தாக்கர், 12ஆம் வகுப்பு மட்டுமே முடித்தவர். மிகவும் போட்டிகள் நிறைந்த நிதித்துறையில் கால்பதித்தார். யாரும் எதிர்பார்க்காத வண்ணம் ஏஞ்சல் புரோகிங் நிறுவனத்தை தொடங்கினார். தற்போது இந்நிறுவனத்தின் சந்தை மதிப்பு 25,000 கோடிக்கும் மேல் உள்ளது.

பங்கு தரகு நிறுவனமான ஏஞ்சல் புரோக்கிங் லிமிடெட் நிறுவனம் 1996இல் தொடங்கப்பட்டது. தற்போது இது ஏஞ்சல் ஒன் லிமிடெட் என அழைக்கப்படுகிறது. மும்பை பங்கு சந்தை, தேசிய பங்கு சந்தை, தேசிய கமாடிட்டி எக்ஸ்சேஞ்ச், மல்டி கமாடிட்டி எக்ஸ்சேஞ்ச் ஆகியவற்றில் உறுப்பினராக உள்ளது.

தற்போது இந்தியாவில் செயல்படும் பங்கு தரகு நிறுவனங்களில் ஏஞ்சல் ஒன் மூன்றாமிடத்தில் உள்ளது. 50 லட்சத்திற்கும் அதிகமான பயனாளர்களை கொண்டுள்ளது. ஆன்லைன் ஸ்டாக் புரோக்கிங், கமாடிட்டி டிரேடிங், இன்வெஸ்ட் அட்வைசரி, பெர்சனல் லோன், இன்சூரன்ஸ், மியூச்சுவல் ஃபண்டு விநியோகம் என பல தரப்பட்ட சேவைகளையும் வழங்குகிறது.

கடந்த சில ஆண்டுகளாக ஏஞ்சல் ஒன் நிறுவனம் கணிசமான வளர்ச்சியை பெற்றுள்ளது. இதனால் தினேஷ் தாக்கரின் சொத்து மதிப்பும் 3,000 கோடி ரூபாயாக உயர்ந்துள்ளது. தற்போது இவரிடம் இல்லாத சொகுசு கார்களே இல்லை என்ற அளவுக்கு வாங்கி குவித்து வைத்திருக்கிறார். லம்போர்கினி ஸ்டெராடோ (Lamborghini Sterrato), மெர்சிடிஸ் ஈகியூஈ( Mercedes EQE), பிஎம்டபிள்யூ ஐ7 (BMW i7) ஆகிய கார்களை தன் வசம் வைத்துள்ளார்.

ஏஞ்சல் ஒன் நிறுவனத்தின் ஒரு பங்கின் மதிப்பு ஏப்ரல் 27ஆம் தேதி பங்கு சந்தையில் 2,816 ரூபாய் என்ற அளவில் வர்த்தகமானது.இந்நிறுவனத்தின் சந்தை மதிப்பு 25,491 கோடி ரூபாய். இதன் புக் வேல்யூ 504.85 , ஃபேஸ் வேல்யூ 10 ஆகும். 2023இல் இதன் வருவாய் 3,021 கோடி ரூபாய் ஆகும், லாபம் 890 ரூபாய் ஆகும்.

ஏஞ்சல் ஒன் நிறுவன பங்குகளில் 38.21% புரமோட்டர்கள் வசமும், 35.03% பங்குகள் சில்லறை முதலீட்டாளர்கள் வசமும், 17.27% பங்குகள் வெளிநாட்டு நிறுவனங்களிடமும் உள்ளன.

Story written by: Devika