3 வருட பிக்சட் டெபாசிட்களுக்கு இந்த 5 வங்கிகள்தான் பெஸ்ட்.. அடேங்கப்பா இவ்வளவு வருமானமா?

பிக்சட் டெபாசிட்கள் தற்போது பல்வேறு வங்கிகளிலும் வழங்கப்படுகின்றன. பொதுவாக டெபாசிட் செய்யும் முதலீட்டாளர்கள் பிற வங்கிகள் வழங்கும் வட்டி விகிதங்களையும் பார்த்துவிட்டு அதன் பின்பு தான் ஒரு வங்கியைத் தேர்வு செய்கின்றனர். பிக்சட் டெபாசிட்களில் நீண்ட கால முதலீட்டுக்கு அதிக வட்டி வழங்கப்படுகிறது. அதே போல குறுகிய கால முதலீட்டுக்கு குறைந்த அளவு தான் வட்டி வழங்கப்படுகிறது. எனவே ஒருவர் முதலீடு செய்வதற்கு முன்பு பிற வங்கிகள் வழங்கும் வட்டி விகிதங்களையும் பார்த்துவிட்டு டெபாசிட் செய்வது வருமானத்தை அதிகரிக்க உதவும். இந்தப் பதிவில் 3 ஆண்டுகால பிக்சட் டெபாசிட்களுக்கு இந்தியாவின் 5 முன்னணி வங்கிகள் வழங்கும் வட்டி விகிதங்களை இந்தப் பதிவில் பார்ப்போம்.

இந்தியாவின் 5 முன்னணி வங்கிகளில் 3 வருட FD-களுக்கான சமீபத்திய வட்டி விகிதங்கள்:

HDFC பேங்க்: மிகப் பெரிய தனியார் வங்கியான HDFC பேங்க் 3 ஆண்டு கால பிக்சட் டெபாசிட்டுகளுக்கு 7 சதவீத வட்டியை வழங்குகிறது. மூத்த குடிமக்களுக்கு 3 வருட FD-களுக்கு 7.5 சதவீத வட்டி வழங்கப்படுகிறது. 4 ஆண்டுகள் மற்றும் 7 மாத FD-களுக்கு ஆண்டுக்கு 7.4 சதவீதம் என்ற அதிகபட்ச வட்டி வழங்கப்படுகிறது. இந்த வட்டி விகிதங்கள் ஜூலை 24, 2024 முதல் அமலுக்கு வந்துள்ளன.

ஐசிஐசிஐ பேங்க்: ஐசிஐசிஐ பேங்க் அதன் 3 வருட FD திட்டத்திற்கு முதலீட்டாளர்களுக்கு ஆண்டுக்கு 7 சதவீத வட்டியை வழங்குகிறது. மூத்த குடிமக்களுக்கு ஆண்டுக்கு 7.5 சதவீதம் வழங்கப்படுகிறது. 15 மாதங்கள் முதல் 2 ஆண்டுகள் வரையிலான டெபாசிட்களுக்கு அதிகபட்ச வட்டியாக 7.25 சதவீதம் வழங்கப்படுகிறது. இந்த வட்டி விகிதங்கள் ஆகஸ்ட் 10, 2024 முதல் அமலுக்கு வந்துள்ளன.

பேங்க் ஆஃப் பரோடா: பேங்க் ஆஃப் பரோடா 3 ஆண்டு கால FDயில் டெபாசிட் செய்பவர்களுக்கு 7.15 சதவீத வட்டியை வழங்குகிறது. மூத்த குடிமக்கள் 7.65 சதவிகித வட்டியைப் பெறலாம். இந்த கட்டணங்கள் ஜூலை 15, 2024 முதல் அமலுக்கு வந்துள்ளன.

கோடக் மஹிந்திரா பேங்க்: கோடக் மஹிந்திரா பேங்க் 3 வருட FD-களுக்கு 7 சதவீத வட்டி விகிதத்தை வழங்குகிறது. மூத்த குடிமக்களுக்கு 60 அடிப்படை புள்ளிகள் அதிகமாக அதாவது 7.6 சதவீதம் வழங்கப்படுகிறது. 390 மற்றும் 391 நாட்களுக்கான டெபாசிட்களுக்கு அதிகபட்ச வட்டியாக 7.4 சதவீதம் வழங்கப்படுகிறது.

ஸ்டேட் பேங்க் ஆப் இந்தியா(எஸ்பிஐ): ஸ்டேட் பேங்க் ஆப் இந்தியா 3 வருட FD திட்டத்திற்கு 6.75 சதவீத வட்டியை வழங்குகிறது. மூத்த குடிமக்கள் 7.25 சதவிகித வட்டியைப் பெறலாம். 2 முதல் 3 ஆண்டுகளுக்கான FD திட்டத்திற்கு, ​​7 சதவீத வட்டி வழங்கப்படுகிறது.