கால் சென்டர்களுக்கு செக் வைக்கும் டிரம்ப்.. இந்தியாவிற்கான ஐடி அவுட்சோர்சிங் நிறுத்தப்படுகிறதா?

அமெரிக்க அதிபர் தேர்தலில் மீண்டும் போட்டியிட உள்ள டொனால்ட் டிரம்ப், இந்தியாவிற்கும் அமெரிக்காவிற்கும் இடையிலான வர்த்தக உறவுகளில் புதிய பதற்றத்தை ஏற்படுத்தும் விதமாக, ஒரு முக்கிய நடவடிக்கையை பரிசீலித்து வருவதாக தகவல்கள் வெளியாகியுள்ளன. டிரம்பின் உதவியாளரும், தீவிர வலதுசாரி அரசியல் விமர்சகருமான லாரா லூமர் என்பவர், டிரம்ப் இந்தியாவிற்கான ஐடி அவுட்சோர்சிங் சேவைகளைத் தடுப்பது குறித்து தீவிரமாக யோசித்து வருவதாகத் தெரிவித்துள்ளார்.

அமெரிக்க ஐடி நிறுவனங்கள் தங்கள் வேலைகளை இந்திய நிறுவனங்களுக்கு அவுட்சோர்சிங் செய்வதைத் தடுப்பது குறித்து ஜனாதிபதி டிரம்ப் பரிசீலித்து வருகிறார். வேறு வார்த்தைகளில் சொன்னால், இனி ஆங்கிலத்திற்காக '2' ஐ அழுத்த வேண்டிய அவசியம் இருக்காது. கால் சென்டர்களை மீண்டும் அமெரிக்காவிற்கு கொண்டு வாருங்கள் என்று லூமர் தனது 'X' சமூக வலைதளப் பக்கத்தில் பதிவிட்டுள்ளார்.

லூமர் டிரம்ப் நிர்வாகத்தில் அதிகாரபூர்வ பதவியில் இல்லையென்றாலும், டிரம்ப்பின் கொள்கை முடிவுகளைப் பற்றி அவ்வப்போது வெளிப்படுத்தி வரும் ஒரு முக்கிய நபராக அறியப்படுகிறார். ஆங்கிலம் தெரியாத ஒருவருடன் பேசுவதற்காக ஆங்கிலத்திற்கு 2 ஐ அழுத்த வேண்டிய நாட்களை டிரம்ப் முடிவுக்கு கொண்டு வருவதை நினைத்து நான் மகிழ்ச்சியடைகிறேன் என்றும் அவர் மற்றொரு பதிவில் கூறியுள்ளார்.

வர்த்தகப் போரும், H-1B விசா பிரச்சனைகளும்: டிரம்பின் இந்த நிலைப்பாடு, ஏற்கனவே அமெரிக்கா-இந்தியா இடையே நிலவி வரும் வர்த்தகப் போரின் ஒரு பகுதியாகக் கருதப்படுகிறது. முன்னதாக, ரஷ்யாவின் எண்ணெய் கொள்முதல் தொடர்பான நடவடிக்கைகளுக்கு தண்டனை அளிக்கும் விதமாக, இந்தியா மீது 50% வரி விதிக்க டிரம்ப் திட்டமிட்டிருந்தார். இது, இரு நாடுகளுக்கும் இடையிலான மூலோபாய கூட்டாண்மையை பெருமளவில் பாதித்தது. பல டிரம்ப் ஆதரவாளர்களும் இந்தியாவுக்கு எதிரான கருத்துகளைத் தொடர்ந்து கூறி வருகின்றனர்.

மேலும், அமெரிக்காவில் பணியாற்ற விரும்பும் இந்திய தொழில்நுட்ப வல்லுநர்களுக்கு வழங்கப்படும் H-1B விசா பிரச்சனையும், டிரம்ப் நிர்வாகத்தின் தொடக்கத்திலிருந்தே ஒரு சர்ச்சைக்குரிய விஷயமாகவே இருந்து வருகிறது. 'அமெரிக்கர்களுக்கு வேலைகளைத் திருடும்' வெளிநாட்டு பணியாளர்களை நிறுத்துமாறு 'மேகா' (MAGA - Make America Great Again) ஆர்வலர்கள் தொடர்ந்து அழுத்தம் கொடுத்து வருகின்றனர். இந்த வரிப் போரும், அவுட்சோர்சிங் பற்றிய விவாதமும் மீண்டும் H-1B விசா பிரச்சனைக்கு முக்கியத்துவம் அளித்துள்ளது.

'Press 2 for English' என்பதன் பொருள் என்ன?: லாரா லூமர் குறிப்பிட்ட, "ஆங்கிலத்திற்கு '2' ஐ அழுத்தவும் என்பது அமெரிக்காவில் உள்ள பல வாடிக்கையாளர் சேவை மையங்களின் தானியங்கி குரல் வழிமுறையைக் குறிக்கிறது. அமெரிக்க நிறுவனங்கள், தங்கள் செலவுகளைக் குறைக்க, இந்தியாவிற்கு தங்கள் வாடிக்கையாளர் சேவைப் பணிகளை அவுட்சோர்ஸ் செய்கின்றன. அங்குள்ள முகவர்கள், அமெரிக்க வாடிக்கையாளர்களுக்குச் சேவை வழங்குவதற்காகக் கடுமையான ஸ்கிரிப்ட்களைப் பின்பற்றிப் பேசுகிறார்கள். சில நிறுவனங்கள், வாடிக்கையாளர்களுக்கு வெளிநாட்டு உணர்வை குறைப்பதற்காக, அமெரிக்க உச்சரிப்புகளைப் பேசவும், அமெரிக்க பெயர்களைப் பயன்படுத்தவும் பயிற்சி அளிக்கின்றன.

எதிர்காலத்தின் நிச்சயமற்ற நிலை: வெளிநாட்டிலிருந்து பணிபுரியும் தொலைதூர ஊழியர்களுக்கு வரி விதிக்க வேண்டும் என மற்றொரு பழமைவாத விமர்சகர் ஜாக் போசோ என்பவர் அழைப்பு விடுத்துள்ளார். இதற்கு டிரம்பின் வர்த்தக ஆலோசகர் பீட்டர் நவரோ ஆதரவு தெரிவித்துள்ளார். இந்த கருத்துகள், டிரம்ப் இந்திய தொழில்நுட்பத் துறை மீது வரி விதிக்கிறாரா அல்லது அவுட்சோர்சிங் செய்வதை நிறுத்துகிறாரா என்ற கேள்வியை எழுப்பியுள்ளது.

அதே சமயம், டிரம்ப் தனிப்பட்ட முறையில் இந்தியப் பிரதமர் நரேந்திர மோடி மீது மிகுந்த மரியாதை கொண்டவர். "நான் எப்போதும் பிரதமர் மோடியுடன் நண்பராக இருப்பேன். அவர் ஒரு சிறந்த பிரதமர். இந்தியாவுக்கும் அமெரிக்காவுக்கும் இடையே மிகவும் சிறப்பான உறவு உள்ளது. கவலைப்பட ஒன்றுமில்லை," என்று டிரம்ப் கூறியுள்ளார். பதிலுக்கு, பிரதமர் மோடியும் இரு நாடுகளுக்கு இடையிலான உறவுகள் குறித்துப் பேசினார்.

இந்த கருத்துக்கள் ஒருபுறம் இருந்தாலும், அமெரிக்க தொழில்நுட்ப நிறுவனங்கள் இந்தியாவிற்கு அவுட்சோர்சிங் செய்வதை நிறுத்துவது குறித்து டிரம்ப் பரிசீலித்து வருவதாக அவரது உதவியாளர் கூறியிருப்பது, இந்திய ஐடி துறைக்கு ஒரு எச்சரிக்கை மணியாகவே பார்க்கப்படுகிறது. இது இந்திய ஐடி துறையில் வேலைவாய்ப்பு மற்றும் வருவாய் மீது பெரும் தாக்கத்தை ஏற்படுத்தலாம் என்ற அச்சம் எழுந்துள்ளது.