டிரம்ப் உடன் மீட்டிங்.. 7 இந்திய சிஇஓ-களுக்கு அழைப்பு.. யார் இந்த முக்கிய தலைகள்..?!

சர்வதேச பொருளாதாரத்தையும், வர்த்தக சந்தையை புரட்டிப்போட்டு வரும் டிரம்ப, ஜனவரி 21ஆம் தேதி சுவிட்சர்லாந்து நாட்டில் டாவோஸ் நகரில் நடக்கும் உலக பொருளாதார மன்றத்தின் (WEF) வருடாந்திர கூட்டத்தில் பேச உள்ளார்.

ஐரோப்பிய நாடுகள் மீது வரி, கிரீன்லாந்து கைப்பற்றும் திட்டம், வெனிசுலா கச்சா எண்ணெய் மீது கன்ட்ரோல் என பல முக்கியமான விஷயங்கள் நடந்து வரும் வேளையில் காசா நலனுக்காக உருவாக்கப்பட்ட அமைதி வாரியம் குறித்து முக்கிய பேச்சுவார்த்தை நடக்க உள்ளது. இதற்கு மத்தியில் 7 இந்திய நிறுவனங்களின் சிஇஓ-களை சந்தித்து பேச உள்ளார் டிரம்ப்.

இந்த நிலையில் அமெரிக்க அதிபர் டொனால்ட் டிரம்ப் புதன்கிழமை இந்தியாவின் முன்னணி தொழிலதிபர்களுடன் சிறப்பு சந்திப்பு நடத்த உள்ளார். இந்த சந்திப்புக்கு இந்தியாவில் இருந்து வெறும் 7 பேர் மட்டுமே கலந்துக்கொள்ள உள்ளனர்.

இந்த சந்திப்பில் பங்கேற்கும் இந்திய தலைவர்களில் டாடா சன்ஸ் தலைவர் என்.சந்திரசேகரன், பார்தி என்டர்பிரைசஸ் தலைவர் சுனில் பார்தி மிட்டல், விப்ரோ CEO ஸ்ரீனி பள்ளியா, இன்போசிஸ் CEO சலில் பரேக், மஹிந்திரா குழும CEO அனிஷ் ஷா, பஜாஜ் ஃபின்சர்வ் தலைவர் சஞ்சீவ் பஜாஜ், ஜுபிலன்ட் பார்தியா குழும இணைத் தலைவர் ஹரி பார்தியா ஆகியோர் அடங்குவர்.

இந்த சந்திப்பு டிரம்ப்பின் அமெரிக்க கொள்கைகளை வலியுறுத்தும் நிகழ்வாக அமையும் என எதிர்பார்க்கப்படுகிறது. 130-க்கும் மேற்பட்ட நாடுகளைச் சேர்ந்த 3,000-க்கும் மேற்பட்ட பிரதிநிதிகள் கலந்துகொள்ளும் இந்த கூட்டத்தில் இந்தியாவின் பங்கேற்பு மிகப்பெரிய அளவில் உள்ளது.

மத்திய அமைச்சர்கள் அஸ்வினி வைஷ்ணவ், பிரல்ஹாத் ஜோஷி உள்ளிட்டோர் தலைமையிலான இந்திய குழு பல்வேறு மாநிலங்களுடன் இணைந்து முதலீடு ஈர்க்கும் முயற்சியில் ஈடுபட்டுள்ளது.

மகாராஷ்டிரா, ஆந்திரா, தெலங்கானா உள்ளிட்ட மாநிலங்கள் தனித்தனியாக முதலீட்டாளர்களை ஈர்க்கும் முயற்சியில் தீவிரமாக ஈடுபட்டுள்ளன. இந்த கூட்டம் உலகளாவிய பொருளாதாரம், வர்த்தகம், முதலீடு குறித்து முக்கிய விவாதங்களை நடத்தும் மேடையாக அமைந்துள்ளது.