ஐக்கிய அரபு அமீரகத்தை நோக்கி படையெடுக்கும் சாம்சங்.. கூடவே TSMC போகுதே..!

உலகின் முன்னணி சிப் தயாரிப்பு நிறுவனங்களான டிஎஸ்எம்சி (TSMC) மற்றும் சாம்சங் எலக்ட்ரானிக்ஸ் ஆகியவை ஐக்கிய அரபு அமீரகத்தில் மிகப்பெரிய அளவிலான சிப் தயாரிப்பு ஆலைகளை கொண்டு வர இருப்பதாக தகவல் வெளியாகியுள்ளது .

தி வால் ஸ்டிரீட் ஜர்னல் இது தொடர்பாக வெளியிட்டுள்ள செய்தி அடிப்படையில் டிஎஸ்எம்சி எனப்படும் தைவான் செமி கண்டக்டர் உற்பத்தி நிறுவனமும், சாம்சங் எலக்ட்ரானிக்ஸ் நிறுவனமும் ஐக்கிய அரபு அமீரகத்தில் 100 பில்லியன் டாலருக்கும் அதிகமான மதிப்பு கொண்ட மிகப்பெரிய சிப் தயாரிப்பு ஆலையை நிறுவு இருப்பதாக தெரிவிக்கப்பட்டுள்ளது . இது தொடர்பாக டிஎஸ்எம்சி நிறுவனத்தின் மூத்த அதிகாரிகள் அண்மையில் ஐக்கிய அரபு அமீரகத்திற்கு சென்று ஆலை அமைப்பதற்கான இடங்களை பார்வையிட்டதாக தெரிகிறது.

தைவானில் இருப்பதை போன்ற அதிநவீன வசதிகள் கொண்ட மிகப்பெரிய செமி கண்டக்டர் ஆலையை ஐக்கிய அரபு அமீரகத்தில் நிறுவுவதற்கு டிஎஸ்எம்சி நிறுவனம் ஆர்வம் காட்டுவதாக தெரிகிறது. அண்மையில் கூட டிஎஸ்எம்சி நிறுவனம் ராய்ட்டர்ஸ் நிறுவனத்திடம் கூடிய விரைவில் மிகப்பெரிய ஒரு முதலீடு திட்டத்தை அறிவிக்கப் போவதாக தெரிவித்திருந்தது.

எனவே இது ஐக்கிய அரபு அமீரகத்தில் அமைய இருக்கும் ஆலை குறித்த அறிவிப்பாக தான் இருக்கும் என சொல்லப்படுகிறது. தைவானை விடுத்து வெளிநாடுகளில் தங்களுடைய நிறுவனத்தை மேம்படுத்துவதில் தற்போது கவனம் செலுத்துவதாக டிஎஸ்எம்சி நிறுவனம் கூறுகிறது.

அதேபோல தென்கொரியாவை சேர்ந்த முன்னணி எலக்ட்ரானிக்ஸ் நிறுவனமான சாம்சங் ஸ்மார்ட் ஃபோன்கள் மற்றும் தொலைக்காட்சிகளுக்கு தேவையான மெமரி சிப்புகளை தயாரித்து வருகிறது. இந்த நிறுவனமும் கூடிய விரைவில் ஐக்கிய அரபு அமீரகத்தில் சிப் தயாரிப்பு ஆலைகளை நிறுவ திட்டமிட்டுள்ளதாக தெரிகிறது.

சாம்சங் எலக்ட்ரானிக்ஸ் நிறுவனம் அண்மையில் தங்களுடைய மூத்த அதிகாரிகளை ஐக்கிய அரபு அமீரகத்திற்கு அனுப்பி அங்கே ஆலை நிறுவுவதற்கான சாத்திய கூறுகள் குறித்து ஆய்வு நடத்தியுள்ளது. இருந்தாலும் இந்த ஆலோசனைகள் ஆரம்ப கட்டத்தில் தான் இருக்கின்றன என தெரிய வருகிறது.

இந்த ஆலோசனையின் படி பார்க்கும்போது செமி கண்டக்டர் ஆலைகளை அமைப்பதற்கான நிதிகளை ஐக்கிய அரபு அமீரக அரசே வழங்கும் என்றும் அபுதாபியை அடிப்படையாகக் கொண்ட முபாதலா (Mubadala) என்ற முதலீட்டு நிறுவனம் இதில் முக்கிய பங்கு வகிக்கும் என்றும் சொல்லப்படுகிறது.