டெஸ்லா-வுக்கு அடுத்த ஜாக்பாட்.. உபர் புதிய திட்டம்..!

ஹெர்ட்ஸ் நிறுவனம்

அமெரிக்கச் சந்தையில் திவாலாகும் நிலையில் இருந்து மீண்டு வந்த ஹெர்ட்ஸ் நிறுவனம் 4 பில்லியன் டாலர் மதிப்பில் 1,00,000 டெஸ்லா கார்களை ஆர்டர் செய்தது, ஆச்சரியம் அளிப்பது மட்டும் அல்லாமல் பல சந்தேகத்தையும் கொடுத்தது. இந்தச் சந்தேகத்தைப் போக்கும் வகையில், வர்த்தக வாய்ப்பை உறுதி செய்யும் வகையில் உபர் முக்கியமான அறிவிப்பை வெளியிட்டு உள்ளது.

உபர் - ஹெர்ட்ஸ் கூட்டணி

அமெரிக்காவில் ஆன்லைன் டாக்ஸி சேவையில் பெரிய அளவில் ஆதிக்கம் செய்யும் உபர் ஹெர்ட்ஸ் நிறுவனத்துடன் கூட்டணி சேர்ந்துள்ளது. அதாவது ஹெர்ட்ஸ் வாங்கும் 1,00,000 டெஸ்லா காரில் 50,000 டெஸ்லாகக் கார்களை உபர் டிரைவர்கள் வாடகைக்கு எடுத்துக்கொள்ள இரு நிறுவனமும் ஒப்பந்தம் செய்துள்ளது.

முக்கிய நகரங்கள்

உபர் - ஹெர்ட்ஸ் நிறுவனங்கள் மத்தியிலான ஒப்பந்தம் மூலம் நவம்பர் 1 முதல் லாஸ் ஏஞ்சல்ஸ், சான் பிரான்சிஸ்கோ, சான் டியாகோ மற்றும் வாஷிங்டன் DC ஆகிய பகுதிகளில் உபர் டிரைவர்கள் டெஸ்லா கார்களை ஹெர்ட்ஸ் நிறுவனத்தின் மூலம் வாடகைக்கு எடுக்க முடியும்.

வர்த்தகம் உறுதி

இந்தத் திட்டம் 2023க்குள் அமெரிக்கா முழுவதும் விரிவாக்கம் செய்யப்படும் எனவும் உபர் - ஹெர்ட்ஸ் நிறுவனங்கள் கூறியுள்ளது. இந்தக் கூட்டணி மூலம் ஹெர்ட்ஸ் வாங்கும் 1,00,000 டெஸ்லா கார்களை முழுமையாகப் பயன்படுத்துவது மட்டும் அல்லாமல் வர்த்தகம் உறுதி செய்யப்பட்டு உள்ளது.

டெஸ்லா

இதேபோல் ஹெர்ட்ஸ் நிறுவனத்தின் ஆர்டர் மூலம் டெஸ்லா கூடுதலாகத் தயாரிக்கும் கார்களும் வீண் ஆகாது, இதேபோல் பேப்பரில் இருப்பதைத் தாண்டி இது சாத்தியப்பட்டு உள்ளது. இந்த உபர் - ஹெர்ட்ஸ் கூட்டணி மூலம் மக்கள் மத்தியில் டெஸ்லா கார் மீது இருக்கும் தாக்கம் தணிக்கப்படுவது மட்டும் அல்லாமல் சுற்றுச்சூழலைப் பெரிய அளவில் பாதுகாக்க முடியும்.

எலான் மஸ்க் - 300 பில்லியன் டாலர்

புதன்கிழமை வர்த்தக முடிவில் டெஸ்லா நிறுவனப் பங்குகள் 1.91 சதவீதம் அதிகரித்து ஒரு பங்கு விலை 1,037.86 டாலரை அடைந்துள்ளது. இதன் மூலம் டெஸ்லா நிறுவனத்தின் மொத்த சந்தை மதிப்பு 1.03 டிரில்லியன் டாலர் அளவீட்டைத் தொட்டுள்ளது. மேலும் எலான் மஸ்க்-ன் மொத்த சொத்து மதிப்பு 292 பில்லியன் டாலராக உயர்ந்துள்ளது.