Uday Kotak: 1 சதுரடி விலை ரூ.2.75 லட்சம்.. மும்பை ரியல் எஸ்டேட்.. அரண்டுபோன மக்கள்..!

கோடக் மகேந்திரா வங்கியின் நிறுவனர் உதய் கோடக் மும்பையின் Worli Sea Face பகுதியில் இருக்கும் அனைத்து குடியிருப்புகளையும் தனக்கு சொந்தமானதாக மாற்றியிருக்கிறார். இதற்காக இவர் 400 கோடி ரூபாய் செலுத்தி இருப்பது தெரிய வந்திருக்கிறது.

இந்தியாவிலேயே இதுவரை இல்லாத அளவாக ஒரு சதுர அடிக்கு 2.75 லட்சம் ரூபாயை இவர் செலுத்தி இந்த பகுதியில் இருக்கும் குடியிருப்புகளை வாங்கி இருக்கிறார். ஏற்கனவே உதய் கோடக் குடும்பத்தினர் வார்லி பகுதியில் 13 அடுக்குமாடி குடியிருப்புகளை சொந்தமாக வைத்திருக்கின்றனர். தற்போது அத்துடன் கூடுதலாக 8 குடியிருப்புகளை சேர்த்து இருக்கின்றனர்.

மும்பையின் வார்லி பகுதியில் மொத்தம் 24 குடியிருப்புகள் இருக்கின்றன. கடந்த ஜனவரி மற்றும் செப்டம்பர் ஆகிய மாதங்களில் 13 குடியிருப்புகளை ஒரு சதுர அடிக்கு 2.72 லட்சம் ரூபாய் என்ற விலை கொடுத்து உதய் கோடக் வாங்கினார். இந்த நிலையில் மீதமிருந்த குடியிருப்புகளை அவர் ஒரு சதுர அடிக்கு 2.75 லட்சம் ரூபாய் என செலுத்தி வார்லி பேஸ் பகுதியில் இருக்கும் அனைத்து வீடுகளையும் தனக்கு சொந்தமானதாக மாற்றி இருக்கிறார்.

கார்பெட் ஏரியா அடிப்படையில் பார்க்கும்போது இந்த பகுதியில் ஒரு சதுர அடியின் விலை 2.90 லட்சமாக இருக்கும் என ரியல் எஸ்டேட் நிறுவனங்கள் கூறுகின்றன. இந்த முறை ஒரு குடியிருப்புக்கு குறைந்தபட்சம் 12 கோடி ரூபாயிலிருந்து அதிகபட்சம் 28 கோடி ரூபாய் வரை உதய் கோடக் வழங்கியிருக்கிறார். குடியிருப்புகளின் அளவு 444 சதுர அடியில் இருந்து 1000 சதுர அடிகள் வரை இருப்பதாக தகவல்கள் தெரிவிக்கின்றன.

மொத்தமாக அந்த பகுதியில் இருக்கும் குடியிருப்புகளை வாங்குவதற்காக மட்டும் உதய் கோடக் குடும்பம் 400 கோடி ரூபாயை இதுவரை செலவு செய்திருக்கிறது. இதில் 1396 சதுர அடி கொண்ட அடுக்குமாடி குடியிருப்பு தான் பெரியது என்றும் இதற்காக உதய் கோடக் கோடி ரூபாயை செலுத்தி இருக்கிறார் என்றும் தெரிய வருகிறது. இதில் குறைந்தபட்ச அளவு கொண்டு வீடு வெறும் 173 சதுர அடி கொண்டதாக இருக்கிறது இதற்காக அவர் 4.7 கோடி வழங்கி இருக்கிறார்.

இந்தியாவிலேயே ரியல் எஸ்டேட் மதிப்பு வேகமாக உயர்ந்து வரும் ஒரு சந்தையாக மும்பை இருக்கிறது. குறிப்பாக ஆடம்பர குடியிருப்புகள் அதிக அளவில் கட்டப்பட்டு விற்பனை செய்யப்படும் ஒரு நகரமாக மும்பை மாறி இருக்கிறது. இந்தியாவின் பெரும்பணக்காரர்கள் பலரது வாழ்விடமாக மும்பை இருந்து வருகிறது. இதன் காரணமாக அங்கே ரியல் எஸ்டேட் மதிப்புகள் அதிகரித்த வண்ணம் இருக்கின்றன.