Dream11 ஆப் பயன்படுத்துகிறீர்களா..? முதல்ல இதை படிங்க..!

சென்னை: இந்தியாவில் ஒளிபரப்பாகும் சில நிகழ்ச்சிகளில் பங்கேற்று ஜெயித்துவிட்டால் குறிப்பிட்ட தொகையை பரிசாக பெற முடியும். ஆனால், அவ்வாறு நீங்கள் சம்பாதித்த பணத்திற்கு வரி செலுத்த வேண்டும் என்பது பற்றி உங்களுக்கு தெரியுமா?

குக் வித் கோமாளி, டான்ஸ் ஜோடி டான்ஸ் போன்ற நிகழ்ச்சிகளில் பங்கேற்று பரிசுத்தொகை பெறுபவர்களும் வரி செலுத்த வேண்டும். அதேபோல் பிரபலமான கேம் ஷோக்கள் நிறைய தற்போது உள்ள தொலைக்காட்சிகளில் ஒளிபரப்பாகி வருகிறது.

அந்த வகையில் பிரபலமான கேம் ஷோவான கவுன் பனேகா குரோர்பதி (கேபிசி) சீசன் 16 கடந்த வெள்ளிக்கிழமை அன்று துவங்கியுள்ளது. இதனை வழக்கம் போல் அமிதாப் பச்சன் தொகுத்து வழங்க உள்ளார்.

இது தமிழில் நீங்களும் வெல்லலாம் ஒரு கோடி என்ற பெயரில் ஒளிபரப்பப்பட்டது. அதன் முதல் சீசனை நடிகர் சூர்யா தொகுத்து வழங்கினார். பிறகு அரவிந்த்சாமி மற்றும் பிரகாஷ்ராஜ் போன்ற முன்னணி நடிகர்கள் தொகுத்து வழங்கினர். இந்த கேம் ஷோ மூலமாக, அதன் பெயரில் குறிப்பிடப்பட்டுள்ளது போல் நீங்கள் ஒரு கோடி வரை சம்பாதிக்க முடியும். ஆனால், அவ்வாறு நீங்கள் சம்பாதித்த பணத்திற்கு வரி செலுத்த வேண்டும். அதன் விவரங்களைப் பற்றி விரிவாக பார்ப்போம்.

இந்தியாவில் இது போன்ற பணம் சம்பாதிப்பதற்காக உள்ள கேம் ஷோக்களுக்கு அதிக ரசிகர் பட்டாளமே உள்ளது என்று தான் கூற வேண்டும். கேபிசி போன்ற நிகழ்ச்சிகளை தொகுத்து வழங்கும் சில தொலைக்காட்சி நிறுவனங்கள் பிக் பாஸ், டான்ஸ் இந்தியா டான்ஸ் போன்ற பிரபலமான நிகழ்ச்சிகளையும் வழங்கிக் கொண்டிருக்கிறது.

மேலும் தற்போது அனைவரிடத்திலும் ஸ்மார்ட் போன் இருப்பதால், பலர் ரீசார்ஜ் செய்து கொண்டு தங்களுடைய நாளின் பாதி நேரத்தை மொபைல் போனிலேயே செலவிடுகின்றனர். அந்த வகையில் ஆன்லைன் கேமிங் பிளாட்பார்ம் தளங்களும் அதிகரித்துவிட்டன. இதில் ரம்மி, ட்ரீம் 11 போன்ற விளையாட்டுகள் லாபகரமான பொழுதுபோக்கை வழங்குகிறது.

KBC போன்ற நிகழ்ச்சிகளில் பங்கேற்பவர்கள் மற்றும் ட்ரீம் 11 போன்ற விளையாட்டுகளில் பணம் சம்பாதிப்பவர்கள், தங்கள் வருமானத்திற்கு ஏற்ப வரிகளை செலுத்த வேண்டும் என்பதை தெரிந்து கொள்வது அவசியம்.

கிலியர் டேக்ஸ்-இன் நிபுணர் மணிகண்டன் கூற்றுப்படி, கேம் ஷோ மற்றும் ஆன்லைன் கேம் வெற்றிகள் வருமான வரி சட்டத்தின் கீழ் வருமானமாகக் கருதப்படுகின்றன. இதன் மூலம் வந்த வருமானம், பிரிவு 115BB இன் கீழ் 30% வரிவிதிப்புக்கு உட்பட்டவை. போனஸ் மற்றும் ஊக்கத்தொகையும் இதில் அடங்கும். பிரிவு 194BA இன் கீழ் வரி கழிக்கப்பட்ட பின் தொகை வழங்கப்படும்.

கேம் ஷோ வருமானத்தின் மீதான வரி விதிகள்:

1) ரூ. 10,000 ரூபாய்க்கு மேலான பரிசுத் தொகைக்கு, பிரிவு 194B வருமான வரிச் சட்டத்தின் கீழ் 31.2% TDSக்கு உட்பட்டது.
2) குதிரைப் பந்தயங்களில் வெற்றி பெற்று, பரிசுத் தொகை ரூ. 10,000க்கு மேல் இருந்தால், அதற்கும் TDS பொருந்தும்.
3) இதுபோன்ற வருமானத்திற்கு எதிராக 80C போன்ற 80D போன்ற பிரிவுகளின் கீழ் வருமான வரி விலக்குகள் அனுமதிக்கப்படாது.
சான்றாக, ஒரு கேம் ஷோவில் சோனம் ரூ. 3 லட்சத்தை வென்றால், அவரது வரி 31.2% ஆக இருக்கும்.