சீனாவிற்கு அனுப்பப்படும் AI சிப்கள்.. அமெரிக்கா டிராக்கர்கள் மூலம் ரகசியமாக கண்காணிப்பு?

உலக வல்லரசுகளான அமெரிக்கா மற்றும் சீனாவிற்கு இடையே தொழில்நுட்பப் போட்டி அதிகரித்துவரும் நிலையில், அமெரிக்க அரசாங்கம் ஒரு ரகசிய நடவடிக்கையை எடுத்துள்ளதாக ஒரு அதிர்ச்சித் தகவல் வெளியாகியுள்ளது. சீனாவிற்கு ஏற்றுமதி செய்யப்படும் சக்திவாய்ந்த செயற்கை நுண்ணறிவு (AI) சிப்கள், சட்டவிரோதமாக வேறு சில பகுதிகளுக்குத் திருப்பி விடப்படுவதைத் தடுக்க, அமெரிக்க அதிகாரிகள் அந்த சிப்களுக்குள் மறைக்கப்பட்ட இருப்பிட டிராக்கர்களை வைப்பதாக கூறப்படுகிறது. இந்த தகவல், ராய்ட்டர்ஸ் மற்றும் டாம்ஸ் ஹார்டுவேர் அறிக்கைகளில் வெளியாகியுள்ளது.

ஏன் இந்த ரகசிய கண்காணிப்பு?: அமெரிக்க அரசாங்கம், AI-ஐ இரட்டைப் பயன்பாட்டுத் தொழில்நுட்பம் (dual-use technology) என்று கருதுகிறது. அதாவது, இது பொதுவான பயன்பாடுகளுக்கும், இராணுவ நோக்கங்களுக்கும் பயன்படுத்தப்படலாம். எனவே, AI தொழில்நுட்பத்தில் சீனாவின் முன்னேற்றத்தை மெதுவாக்குவது அமெரிக்காவின் முக்கிய நோக்கமாக உள்ளது.

இதன் ஒரு பகுதியாக, என்விடியா (Nvidia) மற்றும் ஏஎம்டி (AMD) போன்ற நிறுவனங்களின் மிகவும் சக்திவாய்ந்த AI சிப்களை சீனாவிற்கு ஏற்றுமதி செய்வதற்குக் கடுமையான கட்டுப்பாடுகளை விதித்துள்ளது. ஆனால், இந்த கட்டுப்பாடுகளையும் மீறி சில சிப்கள் சட்டவிரோதமாகச் சீனாவை அடைவதாகக் கூறப்படுகிறது. இந்த சட்டவிரோத கடத்தலைத் தடுப்பதற்காகவே, இந்த ரகசிய டிராக்கர்கள் பயன்படுத்தப்படுவதாகத் தெரிகிறது.

எங்கே வைக்கப்படுகின்றன இந்த டிராக்கர்கள்?: இந்த டிராக்கர்கள் அனைத்து கப்பல்களிலும் வைக்கப்படுவதில்லை என்றும், அதிக ஆபத்து நிறைந்ததாகக் கருதப்படும் கப்பல்களில் மட்டுமே வைக்கப்படுகின்றன என்றும் அந்த அறிக்கை கூறுகிறது. இந்த டிராக்கர்கள், ஷிப்பிங் கொள்கலன்களில், சர்வர் பேக்கேஜிங்கில், மற்றும் சர்வர்களை வைத்திருக்கும் ரேக்குகளில் கூட மறைத்து வைக்கப்படுகின்றன. டாம்ஸ் ஹார்டுவேரின் கூற்றுப்படி, இந்த டிராக்கர்களில் சில ஸ்மார்ட்போன்களைப் போல பெரியதாகவும், டெல் (Dell) மற்றும் சூப்பர் மைக்ரோ (Super Micro) போன்ற நிறுவனங்களின் உபகரணங்களில் கண்டுபிடிக்கப்பட்டுள்ளதாகவும் கூறப்படுகிறது.

இந்தக் கடத்தலில் ஈடுபடுபவர்களும் இந்த ரகசிய கண்காணிப்பு குறித்து அறிந்திருப்பதாகவும், ஒருவருக்கொருவர் எச்சரிக்கையாக இருக்குமாறு நீதிமன்ற ஆவணங்கள் மூலம் தெரியவந்துள்ளதாக அறிக்கைகள் தெரிவிக்கின்றன.

என்விடியா மற்றும் ஏஎம்டி-யின் நிலை என்ன?: இதற்கிடையில், என்விடியா நிறுவனத்தின் தலைமை நிர்வாக அதிகாரி ஜென்சன் ஹுவாங், தங்கள் நிறுவனத்தின் மிகவும் மேம்பட்ட AI சிப்கள் சீனாவிற்குள் நுழைவதை பலமுறை மறுத்துள்ளார். இருப்பினும், கிழக்கு ஆசியாவில் இந்த சிப்களுக்குப் பில்லியன் டாலர் மதிப்பிலான கறுப்புச் சந்தை இருப்பதாகத் தகவல்கள் தெரிவிக்கின்றன.

அமெரிக்காவின் ஏற்றுமதி கட்டுப்பாடுகளுக்கு இணங்க, என்விடியா H20 மற்றும் AMD MI308 போன்ற சில குறிப்பிட்ட சிப்கள் கூட தடை செய்யப்பட்டுள்ளன. மேலும், இந்த நிறுவனங்கள் தங்கள் சில சிப்களை ஏற்றுமதி செய்வதற்கான உரிமங்களுக்கு ஈடாக, விற்பனை வருவாயில் 15% வரை அமெரிக்க அரசாங்கத்துடன் பகிர்ந்து கொள்ளும் ஒப்பந்தத்திலும் ஒப்புக் கொண்டுள்ளதாக டாம்ஸ் ஹார்டுவேர் அறிக்கை கூறுகிறது. இந்த ரகசிய டிராக்கர்களின் பயன்பாடு, சர்வதேச தொழில்நுட்ப வர்த்தகத்தில் ஒரு புதிய அத்தியாயத்தைத் தொடங்கியுள்ளது.