அமெரிக்காவின் வரி.. இந்தியா ஏற்றுமதி பொருட்களுக்கு 26% வரி.. எந்த பொருட்கள் அதிகம் பாதிக்கப்படும்?

இந்தியா மற்றும் அமெரிக்கா ஆகிய இரு நாடுகள் உலகளாவிய வர்த்தகத்தில் முக்கியமான பங்குகளை வகிக்கின்றன. இந்த நாடுகளுக்கு இடையிலான வர்த்தக உறவு ஆண்டு தோறும் வலுவடைந்து வருகிறது. தொழில்நுட்பம், விவசாயம், மருந்துப் பொருட்கள், துணி தயாரிப்புகள், தொழில் சார்ந்த உற்பத்திகள் போன்ற பல துறைகளில் இரு நாடுகளும் வர்த்தக ஒத்துழைப்பை உருவாக்கி வருகின்றன.

இந்தியாவுக்கும் அமெரிக்காவுக்கும் இடையிலான வர்த்தக உறவு இந்திய பொருளாதார வளர்ச்சிக்கு முக்கிய பங்களிப்பை வழங்குகிறது. ஏற்றுமதி, இறக்குமதி, முதலீடு, தொழில்துறை மேம்பாடு ஆகியவைகளில் இது பெரிய தாக்கத்தை ஏற்படுத்துகிறது.

இதனிடையே, 2025 ஏப்ரல் 9 ஆம் தேதி இன்று முதல், இந்தியாவில் இருந்து அமெரிக்கா நோக்கி செல்லும் பல்வேறு பொருட்களுக்கு 26% இறக்குமதி வரி நடைமுறைக்கு வந்துள்ளது. இது உலக வர்த்தகத்தில் பெரும் அதிர்ச்சியை ஏற்படுத்தியுள்ளது. இந்த வரிகள் இந்திய ஏற்றுமதி வணிகத்துக்கு சவாலாக மாறியுள்ள நிலையில், இந்தியா தற்போது வர்த்தக உபரியை (Trade Surplus) தக்கவைத்துக் கொண்டு உள்ளது. அதாவது, இந்தியா அமெரிக்காவிற்கு ஏற்றுமதி செய்பவை இறக்குமதியை விட அதிகம் உள்ளது.

ஏன் இந்த வரி?
டொனால்ட் டிரம்ப் கூறியதாவது, "இந்தியா நாங்கள் ஏற்றுமதி செய்யும் பொருட்களுக்கு 52% வரி வசூலிக்கின்றது. ஆனால், நாங்கள் இந்திய பொருட்களுக்கு மிகவும் குறைவாகவே வரி வசூலிக்கின்றோம். இது நியாயமற்ற நிலை. எனவே இதை திருத்தும் வகையில் இந்த வரி செயல்படுத்தப் படுகின்றது" என்று தெரிவித்துள்ளார். அத்துடன், அமெரிக்காவின் வர்த்தக பற்றாக்குறை (Trade Deficit) அதிகரிப்பும், உள்நாட்டு தொழில்களை பாதுகாக்கும் நோக்கமும் இந்த வரி அதிகரிப்புக்குக் காரணமாக கூறப்பட்டுள்ளது.

இந்தியாவின் முக்கிய ஏற்றுமதி பொருட்கள்:
இந்தியாவிலிருந்து அமெரிக்காவிற்கு ஏற்றுமதி செய்யப்படும் பல்வேறு முக்கிய பொருட்களுக்கு இந்த 26% இறக்குமதி வரி விதிக்கப்பட்டுள்ளது. குறிப்பாக இரும்பு மற்றும் ஸ்டீல் பொருட்கள், மருந்து மற்றும் சுகாதார சாதனங்கள் போன்ற துறைகள் இந்த வரியால் அதிக பாதிப்பை சந்திக்கக் கூடியவை எனக் கருதப்படுகிறது. அதனுடன் இந்தியாவில் தயாரிக்கப்படும் ஆடை மற்றும் தொழில் தயாரிப்புகள், வாகன பாகங்கள் போன்ற பொருட்களும் இந்த வரி விதிப்பின் கீழ் வரக்கூடியவை.

மேலும், இந்தியாவின் முக்கிய ஏற்றுமதி பொருட்களில் ஒன்றான சாகுபடி மற்றும் உணவு பொருட்கள் கூட இந்த வரி கட்டுப்பாட்டில் உள்ளன. அதனைத் தொடர்ந்து தொழில்நுட்ப சாதனங்கள், மின் உபகரணங்கள் போன்றவை என இந்தியா ஏற்றுமதி செய்யும் பல முக்கிய பொருட்கள் இந்த 26% வரி உயர்வால் நேரடியான பாதிப்பை சந்திக்க நேரிடும் நிலையில் உள்ளன.

எந்த துறைகள் அதிகமாக பாதிக்கப்படும்?
இந்தியாவின் முக்கிய ஏற்றுமதி துறைகளில் ஒன்று மருந்து துறை. உலக அளவில் இந்தியா மருந்து தயாரிப்பில் முன்னணி நாடாக இருக்கிறது. டிரம்பின் வரி அறிவிப்புக்குப் பிறகு இந்திய மருந்து நிறுவனங்களின் பங்குகள் வீழ்ச்சி கண்டுள்ளன. உதாரணமாக, Gland Pharma பங்கு 6% சரிவு, அரபிந்தோ பார்மா 5% சரிவு, டாக்டர் ரெட்டீஸ் ஆய்வக பங்கு 4.2% சரிவு கண்டுள்ளது. மேலும், மின் சாதனங்கள், இயந்திரங்கள், இரும்பு உற்பத்தி ஆகிய துறைகளும் தாக்கம் அடையும். மற்றும் இந்தியாவின் முக்கிய ஏற்றுமதி துறை ஆடை மற்றும் துணி துறையாகும். அமெரிக்க சந்தையில் இந்திய துணி பொருட்கள் முக்கிய பங்கு வகிக்கின்றன. இந்த வரி ஏற்றுமதிக்கு தடையாக இருக்கும்.

இந்திய அரசின் பதில்:
இந்திய அரசு ஏற்படக்கூடிய விளைவுகளை கணக்கிட்டுள்ளது. வர்த்தக மற்றும் தொழில்துறை அமைச்சகம் (Ministry of Commerce & Industry) உள்நாட்டு தொழிலாளர்களுடன் ஆலோசனை நடத்தி, எதிர்வினைகளைத் திட்டமிட்டுள்ளது. ராய்ட்டர்ஸ் தகவலின்படி, இந்தியா 23 பில்லியன் டாலர் மதிப்புள்ள அமெரிக்கா இறக்குமதிகளில் 50% வரிகளை குறைக்க தயாராக உள்ளதாக தகவல்கள் தெரிவிக்கின்றன. இது அமெரிக்காவுடன் நல்ல தொடர்பை தொடரும் வகையில் ஒரு முக்கிய நடவடிக்கையாக பார்க்கப்படுகிறது.

பொருளாதார விளைவுகள்:
பி.எச்.டி சேம்பர் ஆஃப் காமர்ஸ் மதிப்பீட்டின்படி, இந்தியாவின் மொத்த உள்நாட்டு உற்பத்தியில் (GDP) மிகக் குறைந்த அளவு, 0.1% மட்டுமே இதன் தாக்கம் இருக்கும். Bernstein அறிக்கையின் படி, இந்த வரி இடைக்கால சவால்களை ஏற்படுத்தலாம். ஆனால் 2025 ஆம் ஆண்டின் இரண்டாம் பாதியில் மீட்சி ஏற்பட வாய்ப்பு உள்ளது.

வர்த்தக புள்ளிவிவரங்கள்:
வர்த்தக புள்ளிவிவரங்களைப் பார்க்கும்போது, இந்தியா மற்றும் அமெரிக்கா இடையிலான இருதரப்பு வர்த்தகம் சுமார் 124 பில்லியன் அமெரிக்க டாலராக பதிவாகியுள்ளது. இதில் இந்தியா அமெரிக்காவிற்கு ஏற்றுமதி செய்த தொகை 81 பில்லியன் டாலராக இருந்தது. அதேசமயம், இந்தியா அமெரிக்காவிலிருந்து இறக்குமதி செய்த மதிப்பு 44 பில்லியன் டாலராக உள்ளது. இதன் மூலம் இந்தியா 37 பில்லியன் டாலர் வர்த்தக உபரியை பெற்றுள்ளது என்பது குறிப்பிடத்தக்கது. இந்த புள்ளிவிவரங்கள் இந்தியா-அமெரிக்கா இடையிலான வணிக உறவுகளின் முக்கியத்துவத்தையும், இருநாடுகளுக்கும் இடையிலான பொருளாதார ஆதார வலிமையையும் வெளிப்படுத்துகின்றன.

பேச்சுவார்த்தை முறைகள்:
இந்தியா அமெரிக்காவுடன் நேரடி பேச்சுவார்த்தை நடத்தும் வாய்ப்பு உள்ளது. ஐரோப்பா, ஆசிய நாடுகள், ஆப்பிரிக்கா போன்ற பிற சந்தைகளை இந்தியா நோக்கலாம். Make In India, PLI (Production Linked Incentive) போன்ற திட்டங்கள் மேலும் வலுவடையக் கூடும். பொருளாதார நிபுணர் விஷ்ணு ஜோஷி கூறியதாவது, "இந்த வரி நடவடிக்கைகள் உலக வர்த்தகத்தில் புதிய அடையாளங்களை உருவாக்கும். ஆனால் இந்தியா பன்முக வளர்ச்சி திறன் கொண்ட நாடு என்பதால், இதை ஒரு குறுகிய கால சவாலாக மட்டுமே பார்க்க முடியும்." என்று கூறினார்.

அமெரிக்கா விதித்துள்ள 26% வரி இந்திய பொருளாதாரத்துக்கு உடனடி தாக்கத்தை ஏற்படுத்தலாம். ஆனால் இது நீண்டகாலத்தில் இந்திய பொருளாதாரத்தை பெரிய அளவில் பாதிக்க வாய்ப்பு இல்லை. இந்திய அரசின் வணிக உள்நோக்கமும், பல்வேறு பொருளாதார திட்டங்களும் இந்த சவால்களை சமாளிக்க உதவும். இது உலக வர்த்தகத்தில் இந்தியாவின் நிலையை மேலும் வலுப்படுத்தும் வாய்ப்பும் ஏற்படுத்தும்.

தொடரும் புவிசார் அரசியல், வர்த்தக போர்கள் ஆகியவை இந்தியா போன்ற வளர்ந்து வரும் நாடுகளுக்கு இன்னும் புதிய சவால்களை உருவாக்கும் என்பதில் சந்தேகமில்லை. ஆனாலும், திறமையும் தன்மை கொண்ட இந்தியா இந்த சவால்களை கடந்து வெற்றி பெறும் என்பதில் பெரும்பான்மையான நிபுணர்கள் நம்பிக்கை கொள்கிறார்கள்.