டிரம்ப்-க்கு புதிய சவால்.. அமெரிக்காவுக்கு இப்படியொரு பிரச்சனை இருக்கு..!

அமெரிக்க மத்திய வங்கியான பெடரல் ரிசர்வ் தனது 2 நாள் நாணய கொள்கை முடிவில் பென்ச்மார்க் வட்டி விகிதத்தை 4.25% முதல் 4.50% வரை மாற்றமின்றி வைத்திருப்பதாக அறிவித்தது பலரையும் அதிர்ச்சியில் ஆழ்த்தியுள்ளது. இதில் முக்கியமாக டிரம்ப் அரசுக்கு இது பெரும் அதிர்ச்சியை கொடுத்துள்ளது என்றால் மிகையில்லை.

அமெரிக்க அதிபர் டொனால்ட் டிரம்பின் உலக நாடுகள் மீதான வரி விதிப்பால் உருவான வர்த்தகப் போர் மூலம் அந்நாட்டில் பணவீக்கம் அதிகரிக்கும் என்றும், பொருளாதார வளர்ச்சியில் மந்த நிலை ஏற்படும் என்றும் பெடரல் ரிசர்வால் கணிக்கப்பட்டு உள்ளது.

மேலும் இந்த கணிப்பை உறுதி செய்யும் வகையில் பெடரல் ரிசர்வ் 2025-ல் அமெரிக்க பொருளாதார வளர்ச்சி 1.4%-ஆக குறையும், பணவீக்கம் 3%-ஆகவும், வேலைவாய்ப்பின்மை 4.5%-ஆகவும் உயரும் என தனது கணிப்பை வெளியிட்டு உள்ளது.

இந்த முடிவு, உலகப் பொருளாதாரத்தையும், சர்வதேச பொருளாதாரத்தையும் பாதிக்கலாம் என நிபுணர்கள் எச்சரித்துள்ளனர். ஏற்கனவே சர்வதேச பொருளாதார வளர்ச்சி சரியும் என கணிக்கப்பட்டு இருக்கும் வேளையில் அமெரிக்காவில் உருவாகியிருக்கும் Stagflation அச்சம் முதலீட்டு சந்தைக்கு முன்கூட்டியே எச்சரிக்கை மணியை அடித்துள்ளது என்று தான் சொல்ல வேண்டும்.

பெடரல் ரிசர்வ் அடுக்கும் பிரச்சனை:
வர்த்தகப் போர் அபாயம்: டிரம்பின் வரி விதிப்பு, பிற நாடுகளுடனான வர்த்தக உறவுகளை பாதித்து, உலகளாவிய விநியோகச் சங்கிலிகளை (Supply Chains) சீர்குலைக்கலாம் என கணித்துள்ளது.
பொருளாதார தாக்கம்: மத்திய வங்கி தலைவர் ஜெரோம் பவல், வரி விதிப்பின் தாக்கம் கோடை காலத்தில் அமெரிக்க நுகர்வோரை பாதிக்கும் வகையில் பணவீக்கத்தை உயர்த்தலாம் என எச்சரித்தார்.
காத்திருக்க முடிவு: வரி விதிப்பின் முழு தாக்கத்தை மதிப்பிடுவதற்கு மத்திய வங்கி இன்னும் கூடுதல் தரவுகளை எதிர்பார்க்கிறது. இதனால் வட்டி விகித குறைப்பை ஒத்திவைத்துள்ளது.
மொத்த உள்நாட்டு உற்பத்தி: 2025-ல் அமெரிக்காவின் GDP வளர்ச்சி 1.4%-ஆகவும், 2026-ல் 1.6%-ஆகவும் இருக்கும் என பெடரல் ரிசர்வ் கணித்துள்ளது. இது, மார்ச் 2025 கணிப்பை காட்டிலும் 0.3% குறைவாகும்.
பணவீக்கம்: இந்த ஆண்டு இறுதியில் அமெரிக்காவின் பணவீக்கம் என்பது 3%-ஆக உயரும், இது தற்போதைய 2.8% அளவை விட அதிகமாகும்.
வேலைவாய்ப்பின்மை: 2025 இறுதியில் வேலைவாய்ப்பின்மை விகிதம் 4.5%-ஆக உயரும் எனவும் பெடரல் ரிசர்வ் கணித்துள்ளது.

அமெரிக்க பொருளாதாரத்தின் நிலைமை:
தற்போது அமெரிக்க பொருளாதாரம் அதிக கடனில் இருந்தாலும் ஆரோக்கியமாகவே உள்ளது. ஆனால் பொருளாதார வளர்ச்சி என்பது "மந்தநிலை" நிலவுகிறது. டிரம்ப்-ன் வரி விதிப்பு மற்றும் பொருளாதார வளர்ச்சி வாய்ப்புகளில் ஏற்பட்டுள்ள மாற்றம் அந்நாட்டில் பணவீக்கம் அதிகரிக்கும் சூழ்நிலை அதிகரித்துள்ளது. ஏற்கனவே அமெரிக்காவில் சாராசரி இறக்குமதி வரி என்பசு 15-17 சதவீதமாக உயர்ந்துள்ளது.

இதனால் அமெரிக்க பொருளாதாரத்தில் அடுத்த 2-4 மாத காலத்தில் "ஸ்டாக்ஃப்ளேஷன்" (Stagflation) அபாயம் அதாவது, உயர் பணவீக்கம் மற்றும் குறைந்த வளர்ச்சி-எழலாம் என்ற அச்சம் உருவாகியுள்ளது. ஏற்கனவே எலான் மஸ்க் அமெரிக்காவில் இந்த ஆண்டு இரண்டாம் பாதியில் ரெசிஷன் வரலாம் என கூறியது நினைவிருக்கும்.

எலான் மஸ்க் கூறியது பலரும் மறுத்தாலும் இன்று அமெரிக்க மத்திய வங்கியான பெடரல் ரிசர்வ் கூறியது அமெரிக்க பொருளாதாரத்தில் இருக்கும் சிக்கலான சூழல்நிலையை வெளிச்சம் போட்டு காட்டியுள்ளது. மேலும் பெடரல் ரிசர்வ்-ன் கணிப்புகள் மூலம் உறுதியான முடிவுகளுக்கு வர முடியாவிட்டாலும், டிரம்ப்-ன் ரெசிப்ரோக்கல் வரி விதிப்பு நடைமுறைக்கு வந்த பின்பு அமெரிக்க பொருளாதாரத்தின் சுயரூபம் தெரிய வரும்.