6 வாரங்களாக முடங்கி கிடக்கும் அரசாங்கம்.. அடம்பிடிக்கும் அதிபர் ட்ரம்ப்.. தத்தளிக்கும் அமெரிக்கா..!!

அமெரிக்க அரசாங்கத்தின் பகுதி நேர செயல் முடக்கம் (Government Shutdown) ஆறாவது வாரத்தை தொட்டுள்ளதால், நாடு முழுவதும் உள்ள லட்சக்கணக்கான மத்திய அரசு ஊழியர்களுக்கு தொடர்ந்து சம்பளம் கிடைக்காமல் சிரமப்படுகின்றனர். விமான நிலையங்களில் பணியாளர்கள் பற்றாக்குறை ஏற்பட்டு, விமான சேவைகள் பாதிக்கப்படுகின்றன.

மேலும், லட்சக்கணக்கான ஏழை மக்களுக்கு வழங்கப்படும் முக்கிய உணவு உதவித் திட்டங்களும் தாமதமாகி வருகின்றன. இந்த நெருக்கடி காரணமாக, வாஷிங்டனில் பெரும் பரபரப்பும், பொதுமக்களிடையே கோபமும் அதிகரித்துள்ளது. ஆனால், இந்த நெருக்கடிக்கு முக்கிய காரணமான அதிபர் டொனால்ட் ட்ரம்ப், தனது நிலைப்பாட்டில் இருந்து சற்றும் பின்வாங்காமல் பிடிவாதம் காட்டி வருகிறார்.

இந்த முடக்கம் ஒரு மாதத்திற்கும் மேலாக நீடிப்பதால், அரசியல் கட்சிகளுக்கு இடையேயான முட்டுக்கட்டையை உடைக்க, செனட் உறுப்பினர்கள் இந்த வார இறுதியில் கூட விடுமுறையின்றி தீவிரமாக பேச்சுவார்த்தை நடத்தி வருகின்றனர். இரு கட்சிகளுக்கும் இடையே சமரசத்திற்கான அறிகுறிகள் குறைவாகவே உள்ளன. அதிபர் ட்ரம்ப், எதிர்க்கட்சியான ஜனநாயக கட்சியினருடன் இப்போதைக்கு சமரசம் செய்ய மாட்டேன் என்று சமூக ஊடகங்களில் திட்டவட்டமாக தெரிவித்துள்ளார்.

ஒபாமகேர் Vs ட்ரம்ப் :

இந்த முடக்கத்திற்கான முக்கியப் பிரச்சனையாக இருப்பது, சுகாதாரத் துறையில் உள்ள ஒபாமகேர் (Obamacare) எனப்படும் சட்டமாகும். இந்தச் சட்டத்தின் கீழ் ஏழை மக்களுக்குக் கிடைக்கும் வரிச் சலுகைகளை ஒரு வருடத்திற்கு நீட்டிக்க வேண்டும் என்று ஜனநாயக கட்சியினர் கோருகின்றனர். ஆனால், ட்ரம்ப் இதற்கு சம்மதிக்க மறுப்பதுடன், இது "உலகிலேயே மிக மோசமான சுகாதாரத் திட்டம்" என்றும் குற்றம் சாட்டுகிறார். அதற்குப் பதிலாக, காப்பீடு வாங்குவதற்காக மக்களுக்கு நேரடியாகப் பணத்தைக் கொடுக்கலாம் என்று அவர் யோசனை தெரிவிக்கிறார்.

மேலும், ட்ரம்ப் குடியரசு கட்சியினரிடம் ஒரு கோரிக்கையை முன்வைத்துள்ளார். ஜனநாயக கட்சியினரின் எதிர்ப்புகளை தவிர்த்து, முடக்கத்தை விரைவாக முடிவுக்குக் கொண்டு வர, 'ஃபிலிபஸ்டர்' எனப்படும் நடைமுறையை (சட்டங்களை நிறைவேற்ற 60 செனட் உறுப்பினர்களின் ஆதரவு தேவைப்படும் நடைமுறை) ரத்து செய்ய வேண்டும் என்று அவர் வலியுறுத்துகிறார். இந்த யோசனையை துணை அதிபர் ஜெ.டி. வான்ஸ் போன்ற முக்கிய தலைவர்களும் ஆதரிக்கின்றனர்.

சமரசப் பேச்சுவார்த்தைகள் :

இதற்கிடையில், மிதவாத ஜனநாயக கட்சியினர் அடங்கிய ஒரு சிறிய குழு, முடக்கத்தை முடிவுக்கு கொண்டு வர ஒரு புதிய சமரச திட்டத்தை முன்மொழிந்துள்ளது. அதாவது, அரசுக்கான நிதியை திரும்ப திறந்தால், ஒபாமகேர் சலுகைகள் குறித்துப் பின்னர் ஒரு தேதியில் வாக்களிப்போம் என்று அவர்கள் உறுதியளித்துள்ளனர். குடியரசு கட்சித் தலைவர்களும் இந்த யோசனைக்கு ஓரளவு ஆதரவு தெரிவித்துள்ளனர். இருப்பினும், இந்தச் சமரசத் திட்டத்திற்கு அதிபர் ட்ரம்ப் ஒப்புதல் அளிப்பாரா என்பது தெளிவாக தெரியவில்லை.

39 நாட்களாக நீடிக்கும் இந்த முடக்கம், மத்திய அரசு ஊழியர்களுக்கு சம்பளம் கிடைக்காதது, விமான நிலையங்களில் உள்ள சிக்கல்கள், மற்றும் லட்சக்கணக்கான மக்களுக்கு உணவு உதவி கிடைப்பதில் தாமதம் போன்ற பல வழிகளில் அமெரிக்க பொருளாதாரத்தில் பெரும் தாக்கத்தை ஏற்படுத்த தொடங்கியுள்ளது. எனவே, இந்த நெருக்கடியை தீர்க்க நாடாளுமன்றம் உடனடியாக செயல்பட வேண்டும் என்ற அழுத்தம் தொடர்ந்து அதிகரித்து வருகிறது.