திருப்பூருக்கு காத்திருக்கும் பேராபத்து.. தீபாவளி நெருங்கும் நேரத்தில் இப்படியா நடக்கணும்?

இந்தியாவின் டெக்ஸ்டைல் துறையின் தலைநகரம் என்று அழைக்கப்படும் திருப்பூரில், இந்தத் தீபாவளி பண்டிகைக்கான உற்சாகம் கலையத் தொடங்கியுள்ளது. அமெரிக்க அரசாங்கம் இந்தியப் பொருட்களுக்கு விதித்துள்ள கடுமையான வரி விதிப்புகள், திருப்பூரில் உள்ள ஏற்றுமதியாளர்களின் ஆர்டர்களை ரத்து செய்ய வைத்திருப்பதுடன், லட்சக்கணக்கான தொழிலாளர்களின் வாழ்வாதாரத்தையும் கேள்விக்குறியாக்கியுள்ளது. இந்தியாவின் ஆடை ஏற்றுமதியில் கிட்டத்தட்ட மூன்றில் ஒரு பங்கு திருப்பூர் வழியாக நடக்கிறது. அமெரிக்க வரி விதிப்பின் இந்த திடீர் உயர்வு, திருப்பூரின் ஏற்றுமதியில் 30% க்கும் அதிகமான அமெரிக்க சந்தையை நேரடியாகப் பாதித்துள்ளது.

நள்ளிரவு அவசர அழைப்புகளும், ஆர்டர் ரத்துகளும்: அமெரிக்கா, இந்தியா மீது விதித்துள்ள வரி விதிப்பை இரட்டிப்பாக்கியதிலிருந்து, இந்திய தொழிற்சாலை உரிமையாளர்களுக்கு நள்ளிரவு அவசர அழைப்புகள் வருவது வழக்கமாகிவிட்டது. ஆர்டர்களை நிறுத்தி வைக்குமாறு அல்லது உற்பத்தியை இந்தியாவிலிருந்து வேறு நாடுகளுக்கு மாற்றுமாறு அமெரிக்க வாங்குபவர்கள் கூறுகின்றனர். கூடுதல் கட்டணச் செலவுகளை நீங்களே ஏற்றுக்கொள்வது அல்லது உற்பத்தியை இந்தியாவிலிருந்து வெளியே மாற்றுவது என்று அமெரிக்க வாங்குபவர்களிடமிருந்து வரும் செய்திகள் மிகவும் வெளிப்படையாக உள்ளன.

டொனால்ட் டிரம்ப் சமீபத்தில் இந்தியா மீது புதிய வரிகளை அறிவித்ததிலிருந்து, கேப் (Gap), கோல் (Kohl's) போன்ற அமெரிக்க சில்லறை விற்பனையாளர்களை வாடிக்கையாளர்களாகக் கொண்ட பேர்ல் குளோபல் (Pearl Global) போன்ற முன்னணி ஆடை உற்பத்தியாளர்கள், இரவு நேர அவசர அழைப்புகளைச் சந்தித்து வருகின்றனர். இதன் விளைவாக, பேர்ல் குளோபல் நிறுவனம், அமெரிக்காவுக்கான உற்பத்தியை, வங்கதேசம், இந்தோனேசியா, வியட்நாம் மற்றும் குவாத்தமாலா போன்ற நாடுகளுக்கு மாற்றுவதாக அறிவித்துள்ளது. "எல்லா வாடிக்கையாளர்களும் என்னை அழைத்து, இந்தியாவிலிருந்து மற்ற நாடுகளுக்கு உற்பத்தியை மாற்றுமாறு கூறுகிறார்கள்," என்று பேர்ல் குளோபல் நிறுவனத்தின் நிர்வாக இயக்குநர் பல்லப் பானர்ஜி ராய்ட்டர்ஸுக்கு அளித்த பேட்டியில் தெரிவித்துள்ளார்.

வால்மார்ட், அமேசான், டார்கெட் போன்ற முக்கிய அமெரிக்க சில்லறை விற்பனையாளர்கள் கூட இந்தியாவிலிருந்து வரும் ஆர்டர்களை நிறுத்திவிட்டதாக தகவல்கள் வெளியாகியுள்ளன.

வரி விகிதங்களும், சர்வதேசப் போட்டியும்: டிரம்ப்பின் ஆரம்ப வரித் திட்டங்களில், இந்தியாவுக்குப் போட்டி நாடுகளான வங்கதேசம், வியட்நாம், சீனா ஆகியவற்றை விட குறைந்த வரி விதிக்கப்பட்டது. அப்போது, இந்திய ஆடை ஏற்றுமதிச் சந்தை வேகமாக விரிவடையும் என எதிர்பார்க்கப்பட்டது. ஆனால், புது டெல்லிக்கும், வாஷிங்டனுக்கும் இடையிலான உறவுகள் மோசமடைந்ததால், நிலைமை தலைகீழாக மாறியுள்ளது. இப்போது இந்தியா 50% வரியைச் சந்திக்கிறது, அதேசமயம் வங்கதேசம் மற்றும் வியட்நாமுக்கு 20% வரியும், சீனாவுக்கு 30% வரியும் விதிக்கப்படுகிறது.

இந்த வரி உயர்வு, அமெரிக்க வாங்குபவர்களை அதிர்ச்சிக்குள்ளாக்கி, தங்கள் உற்பத்தி நடவடிக்கைகளை வங்கதேசம் அல்லது வியட்நாம் போன்ற நாடுகளில் இருந்து எத்தியோப்பியா, நேபாளம் போன்ற குறைவான போட்டி நிறைந்த நாடுகளுக்கு மாற்றுவது குறித்து பரிசீலிக்க வைக்கிறது.

"மேக் இன் இந்தியா" கனவுக்கு பெரும் அடி: இந்தியாவின் ஆடைத் துறை ஏற்கெனவே தொழிலாளர் பற்றாக்குறை மற்றும் குறைந்த உற்பத்தித் திறனால் பாதிக்கப்பட்டிருந்தது. இப்போது, இந்த வரி உயர்வு, பிரதமர் நரேந்திர மோடியின் "மேக் இன் இந்தியா" கொள்கை இயக்கத்திற்கு ஒரு பெரும் அடியாக அமையும் என்று தொழில்துறை நிபுணர்கள் கருதுகின்றனர்.

அமெரிக்காவிற்கு $111 மில்லியன் மதிப்புள்ள ஆடைகளை ஏற்றுமதி செய்துள்ள ரிச்சாகோ எக்ஸ்போர்ட்ஸ் (RichaGo Exports) போன்ற நிறுவனங்கள், தங்கள் ஆண்டு வருவாயில் 95% அமெரிக்காவிலிருந்து பெறுகின்றன. அந்நிறுவனத்தின் பொது மேலாளர் தினேஷ் ரஹேஜா, "நாங்கள் நேபாளத்தின் தலைநகரான காத்மாண்டுவில் ஒரு உற்பத்தித் தளத்தை அமைப்பது குறித்து ஆலோசித்து வருகிறோம்," என்று கூறினார். இது திருப்பூரின் எதிர்காலம் குறித்து பெரும் அச்சத்தை ஏற்படுத்தியுள்ளது.

டைட்டன் (Titan) போன்ற பெரிய நிறுவனங்களும், அமெரிக்க சந்தைகளுக்கான உற்பத்திச் செலவைக் குறைக்க, மத்திய கிழக்கு நாடுகளுக்கு உற்பத்தியை மாற்றுவது குறித்து பரிசீலித்து வருகின்றன. வங்கதேசம் அரசியல் நெருக்கடியை எதிர்கொள்வதாலும், விநியோகச் சங்கிலிகளை பல்வகைப்படுத்த நிறுவனங்கள் விரும்புவதாலும், இந்தியா ஒரு முக்கிய மாற்றாக உருவாகி வந்த நேரத்தில், இந்த வரி அச்சுறுத்தல் வந்துள்ளது.

தற்போது, திருப்பூரில் உள்ள சில தொழிற்சாலைகள், வாடிக்கையாளர்கள் ஆர்டர்களை நிறுத்தி வைக்குமாறு கேட்டுக் கொண்டுள்ளனர். வேறு சில தொழிற்சாலைகள், முழு 50% வரி அமலுக்கு வருவதற்கு முன்பு, முடிந்தவரை பல பொருட்களை ஏற்றுமதி செய்ய முயற்சிக்கின்றன. இது திருப்பூரில் உள்ள பல சிறு மற்றும் குறு நிறுவனங்களை கடும் பீதியில் ஆழ்த்தியுள்ளது.

உள்ளாடைகளுக்கான ஆர்டரை அளித்த ஒரு இறக்குமதியாளர், நூலை வாங்க வேண்டாம், இப்போதைக்கு அதை நிறுத்தி வைக்கவும் என்று கூறித் திரும்ப வந்துள்ளார்," என காட்டன் ப்ளாசம் இந்தியா (Cotton Blossom India) நிறுவனத்தின் நிர்வாக இயக்குனர் நவீன் மைக்கேல் ஜான் தெரிவித்தார். இது, அமெரிக்க வரி உயர்வு இந்தியத் தொழில்துறையை எந்த அளவுக்குப் பாதித்துள்ளது என்பதற்கான நேரடி எடுத்துக்காட்டு. இந்த நெருக்கடியைத் தீர்க்க உடனடி நடவடிக்கைகள் தேவை என்று தொழில்துறை வலியுறுத்துகிறது.