அதளபாதாளத்திற்கு செல்லும் இந்திய ரூபாய் மதிப்பு: இதுக்கு ஒரு தீர்வே இல்லையா?

அமெரிக்க டாலருக்கு நிகரான ரூபாயின் மதிப்பு தொடர்ந்து சரிவடைந்து வருகிறது. அமெரிக்கா-இந்தியா வர்த்தகப் பேச்சுவார்த்தைகளில் நீடிக்கும் இழுபறி, அதிகரிக்கும் ஹெட்ஜிங் நடவடிக்கைகள் மற்றும் வெளிநாட்டு முதலீட்டாளர்கள் இந்திய சந்தையில் இருந்து பங்குகளை விற்று வெளியேறுவது ஆகியவை காரணமாக, இந்திய ரூபாய் செவ்வாய்க்கிழமை முதல்முறையாக ஒரு டாலருக்கு 91 ரூபாய் என்ற எல்லையைத் தாண்டியது.

ரூபாய் 0.3% சரிந்து 91.0750ஐ எட்டி, தொடர்ந்து 4ஆவது அமர்வாக அதளபாதாளத்திற்கு சென்றுள்ளது. இது டிசம்பர் 3 அன்று 90ஐக் கடந்து சரிந்திருந்தது. 2025ல், டாலருக்கு எதிராக ரூபாய் இதுவரை 6%க்கும் மேல் சரிந்துள்ளது, இதனால் வளர்ந்துவரும் சந்தை நாணயங்களில் இந்திய ரூபாய் மோசமான செயல்திறன் கொண்ட ஒன்றாக உள்ளது.

அமெரிக்கா-இந்தியா வர்த்தகப் பேச்சுவார்த்தைகளில் ஒரு திருப்புமுனை ஏற்படாத வரை ரூபாயின் தலைகீழ் மாற்றம் சாத்தியமில்லை என ஆய்வாளர்கள் கருதுகின்றனர். மே மாதத்தில் 83.77 என்ற நடப்பு வருட உச்சநிலையிலிருந்து ரூபாய் 8.5%க்கும் மேல் சரிந்துள்ளது. அமெரிக்காவின் கடுமையான வரிவிதிப்பால் வர்த்தகம் மற்றும் முதலீடுகள் பாதிக்கப்பட, வெளிநாட்டு முதலீட்டாளர்கள் இந்த ஆண்டு இந்தியப் பங்குகளிலிருந்து நிகர $18 பில்லியனுக்கும் அதிகமாக விற்பனை செய்துள்ளனர். இது எக்காலத்திலும் இல்லாத மிகப்பெரிய வருடாந்திர வெளியேற்றமாக அமையும் என எதிர்பார்க்கப்படுகிறது.

நான்-டெலிவரபிள் ஃபார்வர்ட்ஸ் சந்தையில் ஏற்பட்ட அழுத்தம் இருந்தபோதிலும், அரசு வங்கிகள் – பெரும்பாலும் ரிசர்வ் வங்கியின் சார்பாக – டாலர்களை விற்பனை செய்து ரூபாயின் சரிவைக் கட்டுப்படுத்த உதவின என வர்த்தகர்கள் தெரிவித்தனர். MUFG தனது செவ்வாய்க்கிழமை அறிக்கையில், "வரிகள் குறித்த நிச்சயமற்ற தன்மை காரணமாக USD/INR இங்கிருந்து உயர்ந்து செல்லவே வாய்ப்புள்ளது. ஆனால் இந்த உயர்ந்த நிலைகளில் USD/INR ஐ பின்தொடர நாங்கள் தயங்குகிறோம்" என்று குறிப்பிட்டது.

நவம்பரில் இந்தியாவின் ஏற்றுமதிகளில் ஏற்பட்ட மீட்சி மற்றும் வலுவான பொருளாதார வளர்ச்சி, அமெரிக்காவின் கடுமையான வரிகளின் தாக்கத்தைக் குறைத்து, வர்த்தக ஒப்பந்தத்தை விரைவாக முடிக்க புதுடெல்லிக்கு இருந்த உடனடி அழுத்தத்தைக் குறைத்தன என ஆய்வாளர்கள் தெரிவித்தனர்.

அமெரிக்காவுடன் "கூடிய விரைவில்" ஒப்பந்தத்தை முடிக்கும் பேச்சுவார்த்தையில் ஈடுபட்டுள்ளதாக இந்திய வர்த்தகச் செயலாளர் திங்கள்கிழமை தெரிவித்தார். நவம்பரில் அமெரிக்காவிற்கான ஏற்றுமதிகள் ஆண்டுக்கு ஆண்டு 21% வளர்ந்து, இந்தியாவின் வர்த்தகப் பற்றாக்குறையை ஐந்து மாதங்களில் இல்லாத அளவாக $24.53 பில்லியனாகக் குறைத்தன.