எலக்ட்ரிக் வாகனம் வாங்கப் போறீங்களா..? படு வீழ்ச்சியில் சந்தை.. இது தெரியாம கார் வாங்க போகாதீங்க..!

உலகெங்கிலும் உள்ள வாகனச் சந்தையில் தற்போது ஒரு அசாதாரண நிகழ்வு அரங்கேறி வருகிறது. எதிர்காலப் போக்குவரத்து என புகழப்பட்ட எலெக்ட்ரிக் வாகனங்கள் (EV), அவற்றின் மதிப்பை வேகமாக இழந்து வருவதாக தகவல்கள் வெளியாகியுள்ளன.

அமெரிக்காவில், கடந்த ஆண்டில் பயன்படுத்தப்பட்ட எலக்ட்ரிக் கார்களின் விலை சுமார் 32% சரிந்துள்ளது. ஆனால், இதே காலகட்டத்தில் பெட்ரோல் கார்களின் விலை வெறும் 7% மட்டுமே சரிந்துள்ளது. எலெக்ட்ரிக் கார்கள் இவ்வளவு வேகமாக மதிப்பை இழந்து, வணிக ரீதியாகப் பின்னடைவைச் சந்திப்பதற்கான முக்கியக் காரணங்கள் குறித்து சந்தை ஆய்வாளர்கள் விவாதித்து வருகின்றனர்.

பேட்டரி தொழில்நுட்பத்தின் அதிவேக வளர்ச்சி : பயன்படுத்தப்பட்ட EV-க்களின் மதிப்புச் சரிவுக்கு மிக முக்கியக் காரணம், தொழில்நுட்பத்தின் அதிவேக முன்னேற்றமே ஆகும். ஒவ்வொரு ஆண்டும், உற்பத்தியாளர்கள் நீண்ட தூரம் செல்லக்கூடிய பேட்டரி ரேஞ்ச், மிக வேகமாக சார்ஜ் ஆகும் திறன் மற்றும் மேம்பட்ட செயல்திறன் கொண்ட புதிய மாடல்களை அறிமுகப்படுத்துகின்றனர்.

இதனால், பழைய மாடல்களில் உள்ள குறைந்த ரேஞ்ச் கொண்ட பேட்டரிகள் உடனடியாக காலாவதியாகிவிட்டதாக பார்க்கப்படுகின்றன. அதாவது, ஒரு புதிய ஸ்மார்ட்போன் வந்தவுடன் பழைய மாடல் அதன் மதிப்பை இழப்பது போலத் தான் இதுவும் நடக்கிறது.

பேட்டரி ஆயுள் :எலெக்ட்ரிக் காரின் மையப் பகுதியாகக் கருதப்படுவது அதன் பேட்டரிதான். பேட்டரிகள் காலப்போக்கில் அவற்றின் திறனை இழக்கின்றன. அதாவது, அவை சார்ஜ் செய்தால் முழுமையாக ரேஞ்ச் கொடுக்காது. பயன்படுத்தப்பட்ட EV-க்களை வாங்குவோர், பேட்டரியின் ஆயுள் குறித்தும், சில ஆண்டுகளுக்குப் பிறகு பேட்டரியை மாற்றினால் ஏற்படக் கூடிய மிக அதிக செலவு குறித்தும் பயப்படுகிறார்கள். இந்த நிச்சயமற்ற தன்மையே, பயன்படுத்தப்பட்ட கார்களின் விலையைக் குறைப்பதில் முக்கியப் பங்கு வகிப்பதாக சொல்லப்படுகிறது.

புதிய EV-களுக்கான சலுகைகள் :பல நாடுகள், சுற்றுச்சூழலைக் கருத்தில் கொண்டு, புதிய எலெக்ட்ரிக் கார்களை வாங்குபவர்களுக்குப் பெரிய அளவில் அரசு மானியங்கள், வரிச் சலுகைகள் மற்றும் தள்ளுபடிகளை வழங்குகின்றன. இந்தச் சலுகைகள் காரணமாக, பயன்படுத்தப்பட்ட கார்களுக்கும் புதிய கார்களுக்கும் இடையேயான விலை வித்தியாசம் குறைகிறது. இதனால், நுகர்வோர் கூடுதல் பணத்தை செலுத்தி, மேம்பட்ட தொழில்நுட்பத்துடன் கூடிய புதிய மாடலை வாங்க விரும்புகிறார்கள்.

எதிர்காலப் போக்குவரத்துக்கான சந்தையில் எலெக்ட்ரிக் கார்கள் தொடர்ந்து முக்கிய பங்கு வகித்தாலும், பயன்படுத்தப்பட்ட சந்தையில் உள்ள இந்த திடீர் சரிவு, EV உற்பத்தியாளர்கள் மற்றும் நிதி நிறுவனங்கள் தங்கள் நீண்ட கால விற்பனை மற்றும் மதிப்பீட்டு உத்திகளை மறுபரிசீலனை செய்ய வேண்டிய அவசியத்தை உணர்த்துகிறது.