வந்தே பாரத் ரயில்களில் புதிய மாற்றம்.. கோடை காலத்தில் இப்படியொரு அறிவிப்பா..?

வந்தே பாரத் ரயில்களில் பயணம் செய்யும் பயணிகளுக்கு இனி 500 மி.லி. ரயில் நீர் தண்ணீர் பாட்டில்கள் வழங்கப்படும் என்று இந்திய ரயில்வே அறிவித்துள்ளது. கூடுதலாக பயணிகள் கேட்டால் மேலும் ஒரு 500 மி.லி. தண்ணீர் பாட்டில் வழங்கப்படும். இரண்டாவது பாட்டிலுக்கு கட்டணம் கிடையாது.

தண்ணீர் விரயத்தை தவிர்ப்பதற்காக இந்த முடிவை எடுத்துள்ளதாக ரயில்வே தரப்பில் கூறப்படுகிறது.
இதுவரை வந்தே பாரத் ரயிலில் பயணம் செய்யும் பயணிகளுக்கு ஒரு லிட்டர் தண்ணீர் பாட்டில்கள் வழங்கப்பட்டு வந்தன.

இனி அரை லிட்டர் தண்ணீர் பாட்டில்கள்தான் தரப்படும். கூடுதலாகக் கேட்டால் மேலும் ஒரு அரை லிட்டர் தண்ணீர் பாட்டில் தரப்படும். இந்த முடிவு பயணிகளை அதிருப்தி அடையச் செய்துள்ளது.

பிரதமர் நரேந்திர மோடியால் 2019 ஆம் ஆண்டில் அறிமுகப்படுத்தப்பட்ட வந்தே பாரத் எக்ஸ்பிரஸ் ரயில்கள் இப்போது 40க்கும் மேற்பட்ட தடங்களில் இயங்கி வருகின்றன.
2019 பிப்ரவரி 15 ஆம் தேதியன்று நாட்டில் முதல் வந்தே பாரத் ரயிலை பிரதமர் நரேந்திர மோடி பச்சைக்கொடியை ஆட்டி தொடங்கி வைத்தார். முதல் ரயில் புதுதில்லி- கான்பூர்- அகமதாபாத்- வாரணாசி தடத்தில் இயக்கப்பட்டது.

வந்தே பாரத் எக்ஸ்பிரஸ் ரயில்கள் செமி ஹைஸ்பீடு வேகத்தில் இயங்குகின்றன. இந்த ரயிலில் வைஃபை உள்பட பல நவீன வசதிகள் உள்ளன. விசாலமான கண்ணாடி ஜன்னல்கள், அதிக வசதியுள்ள கால் வைப்பு பகுதி, வசதியான சாமான் வைக்கும் ரேக்குகள் போன்ற அம்சங்கள் உள்ளன.

வந்தே பாரத் எக்ஸ்பிரஸின் டிக்கெட் விலையானது பொதுப் பிரிவினருக்கு ₹1,052 ஆகவும், பொருளாதார வகுப்பில் (சிசி நாற்காலி) தட்கல் டிக்கெட்டுக்கு ₹1,262 ஆகவும், ஜெனரலுக்கு ₹1,869 ஆகவும், பிரீமியம் வகுப்பில் (எக்ஸிகியூட்டிவ் சேர்) தட்கல் டிக்கெட்டுக்கு ₹2,299 ஆகவும் இருக்கும்.

வந்தே பாரத் ரயிலில் வழங்கப்படும் உணவு தரம் அவ்வளவு நன்றாக இல்லை என்று பயணிகள் புகார் கூறுகின்றனர். உணவு விலை மிக அதிகமாக இருப்பதாகவும் கூறுகின்றனர்.
வந்தே பாரத் ரயில்கள் ஒரு இடத்தில் இருந்து புறப்பட்டு அதேநாளில் கிளம்பிய ஊருக்குத் திரும்பும்வகையில் ஷெட்யூல் செய்யப்பட்டுள்ளது.

வந்தே பாரத் எக்ஸ்பிரஸ் ரயிலில் விரைவில் படுக்கை வசதி ஏற்படுத்தப்படும் என்று அண்மையில் ரயில்வே அமைச்சகம் அறிவித்திருந்தது.

Story written by: I.Jayachandran