மதிய உணவின் விலை குறைந்தது! கட்டுக்குள் இருக்கும் பணவீக்கம்! இந்தியர்களின் பர்ஸ் தப்பிச்சுச்சு!

ஒவ்வொரு மாதமும் வீட்டில் சமைக்கப்படும் சைவ மற்றும் அசைவ மதிய உணவுக்கான விலை குறைந்துள்ளதா? அல்லது அதிகரித்துள்ளதா? என்பதை கிரிசில் என்ற நிறுவனம் அறிக்கையாக தயாரித்து வெளியிடும். அந்த வகையில் ஏப்ரல் மாதத்தில் கடந்த 1 வருடத்தில் இல்லாத அளவுக்கு சைவ சாப்பாட்டின் விலை குறைந்துள்ளதாக தெரிவித்திருக்கிறது. தக்காளி, உருளைக்கிழங்கு போன்ற சமையல் பொருட்களின் விலை தொடர்ந்து சரிந்து வந்ததால் வீட்டில் சமைக்கப்படும் சைவ உணவுக்கான விலை குறைந்ததாக அறிக்கையில் கூறப்பட்டுள்ளது.

ஏப்ரல் மாதத்தில் வீட்டில் சமைத்த சைவ உணவின் விலை 26.3 ரூபாயாக குறைந்துள்ளது. இந்த விலை மார்ச் மாதம் 26.6 ரூபாயாக இருந்தது. கடந்த ஆண்டு இதே ஏப்ரல் மாதத்தில் 27.4 ரூபாயாக இருந்தது.

காய்கறிகளின் விலை சீராக இருப்பதால் இந்த விலை வீழ்ச்சி ஏற்பட்டுள்ளதாக கிரிசில் நிறுவனம் தெரிவித்துள்ளது. தக்காளி கிலோ 21 ரூபாய்க்கு விற்பனையாகிறது. கடந்த ஆண்டுடன் ஒப்பிடுகையில் 34 சதவீதம் தக்காளி விலை குறைந்துள்ளது. உருளைக்கிழங்கின் விலையும் 11 சதவீதம் குறைந்திருக்கிறது.

பறவைக் காய்ச்சல் மற்றும் அதிகப்படியான விநியோகம் இருந்த காரணத்தினால் கோழிக்கறியின் தேவை குறைவாக இருந்தது. இதனால் அசைவ உணவின் விலையும் இந்த மாதத்தில் மலிவாக இருந்தது. ஏப்ரல் மாதம் பணவீக்கம் அதற்கு முந்தைய மாதமான மார்ச் மாதத்தை விட குறைய வாய்ப்பிருக்கிறது.

இந்த ஆண்டு பணவீக்க விகிதம் 4 சதவீதமாக இருக்கும் என்று எதிர்பார்க்கப்படுகிறது. இந்திய ரிசர்வ் வங்கி ஏப்ரல் மாதத்தில் தொடர்ந்து இரண்டாவது முறையாக ரெப்போ விகிதத்தை குறைத்துள்ளது. தற்போது ரெப்போ விகிதம் 25 அடிப்படை புள்ளிகள் குறைந்து 6 சதவீதமாக உள்ளது.

உலகளாவிய நிச்சயமற்ற தன்னை இருக்கும் காரணத்தினால் இந்தியாவில் பணவீக்கம் குறைந்து வருகிறது. ஜூன் மாத மதிப்பாய்வின் படி மற்றொரு வட்டி விகிதக் குறைப்பு இருக்கலாம் என்று பொருளாதார வல்லுநர்கள் கணித்துள்ளனர். ஏப்ரல் மாதம் நடந்த கூட்டத்தில் ரிசர்வ் வங்கி 2026-ஆம் நிதியாண்டில் பணவீக்கம் விகிதம் 4 சதவீதமாக இருக்கும் என்று கணித்துள்ளது. ஆனால் அதற்கு முன்னர் 4.2 சதவீதமாக இருக்கும் என்று கணித்திருந்தது. தற்போதைய கூட்டத்தில் இந்த விகிதம் 0.2% குறைக்கப்பட்டுள்ளது.

பொதுவாக பணவீக்கம் அதிகரிக்கும்போது உணவுப் பொருட்களின் விலையும் அதிகரிக்கும். காய்கறிகளின் விலை அதிகரித்தால், காய்கறி கொண்டு சமைக்கப்படும் சைவ உணவின் விலையும் அதிகரிக்கும். மாறாக காய்கறிகளின் விலை குறைந்தால் சைவ சாப்பாட்டின் விலை குறையும். மே மாதமும் இதே போல காய்கறிகளின் விலை கட்டுக்குள் இருந்தால் சைவ சாப்பாட்டின் விலை குறைய வாய்ப்புள்ளது.