பழைய வாகனங்களுக்கு ஆப்பு வைத்த மத்திய அரசு.. தகுதிச் சான்றிதழ் கட்டணம் ரூ.25,000ஆக உயர்வு..!!

இந்திய சாலைகளில் இருந்து, அதிக அளவில் புகையை வெளியிட்டு சுற்றுச் சூழலை மாசுபடுத்தும் பழைய வாகனங்களை படிப்படியாக வெளியேற்றும் முயற்சியில், மத்திய சாலைப் போக்குவரத்து மற்றும் நெடுஞ்சாலைகள் அமைச்சகம் ஒரு கடுமையான முடிவை எடுத்துள்ளது.

வாகனப் பதிவை புதுப்பிப்பதற்கான கட்டணங்களை ஏற்கனவே உயர்த்தியிருந்த நிலையில், இப்போது வாகனங்களின் தகுதிச் சான்றிதழ் (ஃபிட்னஸ் பரிசோதனை) கட்டணத்தை பல மடங்கு உயர்த்தி, அதிகாரப்பூர்வ அறிவிப்பை வெளியிட்டுள்ளது. இந்த உயர்வு காரணமாக, 20 ஆண்டுகளுக்கும் மேலான பழைய வாகனங்களை தொடர்ந்து வைத்திருப்பது இனி நிதி ரீதியாக பெரிய சுமையை ஏற்படுத்தும்.

ஃபிட்னஸ் பரிசோதனைக்கான புதிய வயது பிரிவுகள் : மத்திய சாலைப் போக்குவரத்து அமைச்சகம், வாகனங்களின் ஃபிட்னஸ் பரிசோதனைக்காக 3 புதிய மற்றும் தெளிவான வயதுப் பிரிவுகளை அறிமுகப்படுத்தியுள்ளது. 10 முதல் 15 ஆண்டுகள், 15 முதல் 20 ஆண்டுகள் மற்றும் 20 ஆண்டுகளுக்கும் மேல்.

இதில் கவனிக்கத்தக்க முக்கியமான மாற்றம் என்னவென்றால், இனிமேல் வர்த்தக வாகனங்கள் (Commercial Vehicles) 15 ஆண்டுகளுக்குப் பதிலாக, 10 வயதில் இருந்தே அதிக கட்டணம் வசூலிக்கும் பிரிவின் கீழ் கொண்டுவரப்படுகின்றன. இதன் மூலம், பல வர்த்தக வாகனங்கள் விரைவாக அதிக கட்டணத்தை செலுத்த வேண்டிய கட்டாயத்துக்கு உள்ளாகின்றன.

கார்கள், இரு சக்கர வாகனங்களின் கட்டணம் உயர்வு : இந்த கட்டண உயர்வு, சாதாரணக் குடும்பங்களால் பயன்படுத்தப்படும் கார்களுக்கும் பொருந்தும். 20 ஆண்டுகளுக்கும் மேலான மோட்டார் வாகனங்களுக்கான (LMVs - கார்கள்) ஃபிட்னஸ் புதுப்பிப்புக் கட்டணம் முன்பு ரூ.10,000 ஆக இருந்தது. இது தற்போது 50% அதிகரித்து ரூ.15,000 ஆக உயர்த்தப்பட்டுள்ளது.

அதேபோல், இரு சக்கர வாகனங்களும் இந்த விலை உயர்வில் இருந்து தப்பவில்லை. 20 ஆண்டுகளுக்கும் மேலான இரு சக்கர வாகனங்களுக்கான கட்டணம் ரூ.600-ல் இருந்து அதிரடியாக ரூ.2,000 ஆக அதிகரிக்கப்பட்டுள்ளது. பாதுகாப்பு மற்றும் சுற்றுச்சூழல் விதிமுறைகளை மீறும் பழைய வாகனங்களை தொடர்ந்து பயன்படுத்துவதை தவிர்க்கும்படி மக்களை ஊக்குவிப்பதே இந்த உயர்வின் நோக்கம்.

கனரக வாகனங்களுக்கு மிகப்பெரிய சுமை : இந்த கட்டண உயர்வு, அதிகச் செலவை ஏற்படுத்துவது கனரக வர்த்தக வாகனங்களுக்குத்தான்.

பேருந்துகள் மற்றும் லாரிகள் : 20 ஆண்டுகளுக்கும் மேலான கனரக லாரிகள் மற்றும் பேருந்துகளுக்கான ஃபிட்னஸ் பரிசோதனை கட்டணம் ரூ.3,500-இல் இருந்து மிக அதிகபட்சமாக ரூ.25,000 ஆக உயர்த்தப்பட்டுள்ளது.

நடுத்தர வாகனங்கள் : அதே வயதுப் பிரிவில் உள்ள நடுத்தர வர்த்தக வாகனங்கள் இனி ரூ.20,000 செலுத்த வேண்டும்.

லேசான வர்த்தக வாகனங்கள் : 20 ஆண்டுகளுக்கும் மேலான லேசான வர்த்தக வாகனங்களுக்கான கட்டணமும் ரூ.15,000 ஆக உயர்த்தப்பட்டுள்ளது.

சுற்றுச்சூழலைக் காப்பதற்கும், பழைய வாகனங்களால் ஏற்படும் விபத்துகளை குறைப்பதற்கும் இந்த நடவடிக்கை அவசியமானதாக அரசு கருதுகிறது. எனினும், இது பொருளாதார ரீதியில் பின்தங்கியுள்ள பல வர்த்தக வாகன உரிமையாளர்களுக்கு பெரும் சுமையாக மாறும் என்று எதிர்பார்க்கப்படுகிறது.