வின்ஃபாஸ்ட் இந்தியாவுக்கு வர ரெடி.. இந்த மாதத்தில் தொடங்கும் முன்பதிவு.!!

வியட்நாமைச் சேர்ந்த முன்னணி மின்சார வாகன (EV) உற்பத்தி நிறுவனமான வின்ஃபாஸ்ட், இந்தியாவின் மாபெரும் EV சந்தையை நோக்கி தனது அடுத்த பயணத்தை தொடங்க உள்ளது. நிறுவனத்தின் ஆசியா தலைமை நிர்வாக அதிகாரி பாம் சான் சாவ் தெரிவித்த தகவலின்படி, இந்த மாதம் ஜூனில் இந்தியாவில் வின்ஃபாஸ்ட் கார்களுக்கு முன்பதிவு தொடங்க இருக்கிறது.

இந்திய சந்தையை நோக்கி வின்ஃபாஸ்ட்: வின்ஃபாஸ்ட் நிறுவனம் இந்தியாவில் முதற்கட்டமாக VF6 மற்றும் VF7 என்ற இரு பிரீமியம் மாடல்களை அறிமுகப்படுத்த திட்டமிட்டுள்ளது. இவை இரண்டும் தற்பொழுது வியட்நாமில் உற்பத்தி செய்யப்பட்டு வருகின்றன. இந்த ஆண்டு பண்டிகை சீசனுக்குள் வாகனங்கள் விற்பனைக்கு வரும் என எதிர்பார்க்கப்படுகிறது. வாடிக்கையாளர்களை ஈர்க்கும் வகையில், வாகனங்களை ஷாப்பிங் மால்கள் மற்றும் விமான நிலையங்களில் காட்சிப்படுத்தும் நடவடிக்கையை நிறுவனம் ஆரம்பித்துள்ளது.

தூத்துக்குடியில் தொழிற்சாலை, 2 பில்லியன் டாலர் முதலீடு: தமிழ்நாட்டின் தூத்துக்குடியில் வின்ஃபாஸ்ட் நிறுவனம் தனது முதல் உற்பத்தி தொழிற்சாலையை அமைத்துள்ளது. இந்த திட்டத்தின் மொத்த முதலீட்டு மதிப்பு 2 பில்லியன் அமெரிக்க டாலர்கள், இதில் ஏற்கனவே 500 மில்லியன் டாலர்கள் முதலீடு செய்யப்பட்டுள்ளது. இந்த ஆலையை 15 மாதங்களில் நிறுவியதாக சாவ் கூறினார். இதற்காக தமிழ்நாடு மற்றும் மத்திய அரசுகளின் ஆதரவை அவர் பாராட்டினார்.

ஆண்டு உற்பத்தி இலக்கு - 1.5 லட்சம் வாகனங்கள்: தொடக்கத்தில் ஆண்டுக்கு 50,000 கார்களை உற்பத்தி செய்யும் இலக்குடன் வின்ஃபாஸ்ட் துவங்க உள்ளது. தேவை ஏற்படும் பட்சத்தில் இந்த எண்ணிக்கை 1,50,000 வாகனங்கள் வரை உயர்த்தப்படும் என சாவ் தெரிவித்தார். இந்தியாவில் மட்டுமின்றி, மத்திய கிழக்கு மற்றும் ஆப்பிரிக்கா போன்ற வெளிநாடுகளுக்கு வாகனங்களை ஏற்றுமதி செய்வதற்கும் நிறுவனம் திட்டமிட்டு உள்ளது.

உள்ளூர் வேலை வாய்ப்புகள்: தூத்துக்குடி ஆலையின் மூலம் 2030க்குள் 3,500 உள்ளூர் ஊழியர்களை பணியில் அமர்த்தும் திட்டத்தை வின்ஃபாஸ்ட் கொண்டுள்ளது. இதற்காக தற்போது மாநிலம் முழுவதிலும் உள்ள பல்கலைக்கழகங்களில் இருந்து 400 பேர் வரை நேர்முகத் தேர்வுகள் நடத்தப்பட்டுள்ளன. இது தமிழக அரசுக்கு கொடுத்துள்ள உறுதிப்பாட்டின் ஒரு பகுதியாகும்.

இந்திய சந்தையை நோக்கி பசுமை ஒளி: வின்ஃபாஸ்ட் இந்திய சந்தைக்கு மிகப் பெரிய எதிர்பார்ப்புடன் வருவதாக சாவ் கூறினார். இந்தியா வளர்ந்து வரும், துடிப்பான ஆட்டோமொபைல் சந்தை. அதனால் இப்போது நாங்கள் நுழைய மிகவும் பொருத்தமான தருணம் என்று அவர் தெரிவித்தார். இந்தியாவில் உள்ள EV சந்தை மிகவும் உணர்வுப்பூர்வமானது என்பதால், விலை நிர்ணயம் பற்றிய முடிவுகள் விரைவில் அறிவிக்கப்படும் என்றும் கூறினார். "எங்கள் கார்கள் மலிவு விலை கொண்ட பிரீமியம் வாகனங்களாக இருக்கும்," என்றும் அவர் குறிப்பிட்டார்.

சார்ஜிங் உள்கட்டமைப்பு: வாகனங்களை விற்பனை செய்வதுடன், அதற்கேற்ப சார்ஜிங் ஸ்டேஷன்கள், வாடிக்கையாளர் சேவை மையங்கள், டீலர் நெட்வொர்க், மற்றும் பழைய கார்கள் மாற்றும் திட்டங்களை உருவாக்குவதிலும் வின்ஃபாஸ்ட் கவனம் செலுத்துகிறது. இதற்காக பல்வேறு மாநில அரசுகளுடன் பேச்சுவார்த்தை நடைபெற்று வருகிறது. மேலும், சார்ஜிங் உள்கட்டமைப்பை விரிவுபடுத்தும் பணிகளில் நாம் முன்நிலை வகிக்கிறோம். உலகம் முழுவதிலிருந்தும் முதலீட்டாளர்களின் ஆதரவை பெற்றுள்ளோம். இந்தியாவிலுள்ள உள்ளூர் முதலீட்டாளர்களின் ஆதரவும் எதிர்பார்க்கின்றோம்," என்று சாவ் தெரிவித்தார்.

உள்ளூர்மயமாக்கலுக்கு முன்னுரிமை: இந்தியாவில் வின்ஃபாஸ்ட் எந்த வரிவிலக்கும் இல்லாததால், உற்பத்தி செலவுகளை குறைத்து அரசாங்க ஊக்கத் தொகைகளுக்கு தகுதி பெற, உள்ளூர்மயமாக்கல் முக்கியமானது என்று சாவ் தெரிவித்தார். இந்த முயற்சி இந்தியாவில் வின்ஃபாஸ்டின் நிலையை வலுப்படுத்தும் என்றும் அவர் நம்பிக்கை தெரிவித்தார்.

வியட்நாம்-இந்தியா உறவு மற்றும் எதிர்காலம்: 65 வயதான சாவ், கடந்த 5 ஆண்டுகளாக இந்தியாவிற்கான வியட்நாமின் தூதராக பணியாற்றியவர். இந்தியா-வியட்நாம் இடையிலான உறவுகள் ஜனாதிபதி ஹோ சி மின் மற்றும் மகாத்மா காந்தி காலத்திலிருந்து பராமரிக்கப்பட்டு வருவதாக அவர் நினைவுபடுத்தினார். இரு நாடுகளும் விரிவான மூலோபாய கூட்டாண்மையை அனுபவிக்கின்றன என்று அவர் கூறினார்.

டெஸ்லா மற்றும் BYD பற்றி வின்ஃபாஸ்ட் பார்வை: வின்ஃபாஸ்ட் நிறுவனம் தனது போட்டியாளர்களாக டெஸ்லாவையோ BYD-யையோ பார்க்கவில்லை என்று சாவ் கூறினார். எங்கள் நோக்கம் பசுமை இயக்கம். அதை பகிர்ந்து கொள்பவர்கள் எங்கள் நண்பர்கள் என அவர் வலியுறுத்தினார்.

மேலும், வின்ஃபாஸ்ட் இந்திய EV சந்தையில் புதிய பரிமாணங்களை ஏற்படுத்தும் வகையில் தனது பயணத்தை தொடங்கியுள்ளது. தொழில்நுட்பத்துடன் கூடிய பிரீமியம் வாகனங்கள், உள்ளூர் வேலை வாய்ப்புகள், மற்றும் சுற்றுச்சூழல் மையமான அணுகுமுறை ஆகியவற்றின் மூலம், இந்தியாவில் EV சந்தையில் வின்ஃபாஸ்ட் ஒரு முக்கிய வீரராக உருவாகும் எதிர்பார்ப்பு மிகுந்துள்ளது.