விமானத்தில் பயணிக்கும் போதும் இனி வைஃபை யூஸ் பண்ணலாம்.. புதிய திட்டத்தை அறிமுகம் செய்த விஸ்தாரா!

இந்தியாவில் முதன்முறையாக, டாடா-சிங்கப்பூர் ஏர்லைன்ஸின் கூட்டு நிறுவனமான விஸ்தாரா தனது பயணிகளுக்கு இலவச வைஃபை சேவைகளை அறிவித்துள்ளது. இந்த வசதி தற்போது உள்நாட்டு பயணிகளுக்கு இல்லை என்பது குறிப்பிடத்தக்கது. சர்வதேச பயணிகளுக்கு மட்டும் 20 நிமிடங்களுக்கு விமான வைஃபை வசதி இலவசமாக கிடைக்கும். விமானத்தில் 35,000 அடி உயரத்திலும் இலவச வைஃபை வசதி கிடைக்கும் என தெரிவிக்கப்பட்டுள்ளது.

விஸ்தாராவின் போயிங் 787-9 ட்ரீம்லைனர் மற்றும் ஏர்பஸ் A321 நியோ விமானங்களில் பயணிக்கும் அனைத்து வகுப்பு பயணிகளும் 20 நிமிட இலவச வைஃபை கிடைக்கும் என்று விஸ்தாரா தெரிவித்துள்ளது.

கூடுதல் வைஃபை பயன்படுத்த விரும்புவோர் இந்திய கிரெடிட் அல்லது டெபிட் கார்டுகளைப் பயன்படுத்தி எளிதாக வாங்க முடியும். இந்த சேவையின் மூலம் பயனர்கள் தங்கள் மெயில் ஐடிக்கு ஒரு முறை பயன்படுத்தக்கூடிய பாஸ்வேர்டை பெறுவார்கள். இதன் மூலம் விமானத்தில் இருக்கும்போதே கூடுதல் வைஃபையை எளிதாக வாங்க முடியும்.

விஸ்தாராவின் சர்வதேச விமானங்களில், அனைத்து கிளப் உறுப்பினர்களும், விமான பயணம் முழுவதும் இலவச சாட் வசதியைப் பயன்படுத்தலாம்.

மற்ற பயணிகள் வாட்ஸ்அப் மற்றும் ஃபேஸ்புக் மெசஞ்சர் போன்ற மெசேஜிங் அப்ளிகேஷன்களை வரம்பற்ற டேட்டாவுடன் ரூ.372.74 மற்றும் ஜிஎஸ்டிக்கு பெறலாம். மற்ற அனைத்து இணைய வசதிகளையும் பெறுவதற்கு, விமான நிறுவனம் ரூ. 1577.54 மற்றும் ஜிஎஸ்டியை வசூலிக்கிறது.

இதில் சமூக ஊடகங்கள், ஆடியோ மற்றும் வீடியோ ஸ்ட்ரீமிங் ஆகியவை அடங்கும். ரூ.2707.04 மற்றும் ஜிஎஸ்டிக்கு, வாடிக்கையாளர்கள் அனைத்து ஸ்ட்ரீமிங் வசதிகளுடன் வரம்பற்ற டேட்டாவைப் பெறுகிறார்கள்.

விமான நிறுவனங்கள் பத்தாண்டுகளுக்கும் மேலாக விமானத்தில் வைஃபை வழங்கி வருகின்றன. இந்தச் சேவைக்கு பலர் கட்டணம் வசூலிக்கும்போது, ​​அமெரிக்க பட்ஜெட் நிறுவனமான JetBlue போன்ற சிலர், 2013-ஆம் ஆண்டு முதல் இலவச, வரம்பற்ற அதிவேக வைஃபையை வழங்கி வருகின்றனர்.

பிலிப்பைன்ஸ் ஏர்லைன்ஸ், நார்வேஜியன் ஏர்லைன்ஸ், சைனா ஈஸ்டர்ன் ஏர்லைன்ஸ் மற்றும் ஏர் நியூசிலாந்து போன்ற பிற சர்வதேச விமான நிறுவனங்கள், இலவச வைஃபையையும் வழங்குகிறது.

சில விமான நிறுவனங்கள் லிமிடெட் டேட்டாவை வழங்கினாலும், பெரும்பாலான விமான நிறுவனங்கள் ஃபர்ஸ்ட் கிளாஸ் பயணிகளுக்கு அதிக டேட்டாவை வழங்குகிறது. எமிரேட்ஸ், கத்தார் ஏர்வேஸ், துருக்கிய ஏர்லைன்ஸ், டெல்டா ஏர்லைன்ஸ் மற்றும் சிங்கப்பூர் ஏர்லைன்ஸ் ஆகியவை அடிக்கடி பயணிக்கும் உறுப்பினர்களுக்கு இலவச வைஃபை வழங்குகின்றன.