ஜியோ, ஏர்டெல்-க்கு ஷாக் கொடுத்த வோடபோன் 3 in 1 திட்டம்.. அப்படி இதுல என்ன இருக்கு..?

இந்திய தொலைதொடர்பு சேவை நிறுவனமான வோடபோன் ஐடியா , ஏசியானட் நிறுவனத்துடன் இணைந்து கேரளாவில் Vi One (3-in-1 package) என்ற பேக்கேஜை அறிவித்துள்ளது. இதன் மூலம் ஒரே பிளானின் கீழ் செல்போன் ரீசார்ஜ், பிராட்பேண்ட் மற்றும் 13 ஓடிடி தளங்களுக்கான அணுகல் என விரிவான சலுகைகளை பெற முடியும்.

Vi One என பெயரிடப்பட்டுள்ள இந்த திட்டத்தின் படி வாடிக்கையாளர்கள் தரமான மற்றும் அவர்களுக்கு சௌகரியமான சேவைகளை பெற முடியும் என வோடபோன் நிறுவனம் தெரிவித்துள்ளது. வாடிக்கையாளர்களுக்கு சிறந்த சேவையை வழங்குவது தான் எங்களின் நோக்கம் அதனை மையமாகக் கொண்டுதான் இப்படி ஒரு திட்டத்தை நாங்கள் கொண்டு வந்து இருக்கிறோம் என வோடபோன் ஐடியா நிறுவனத்தின் தலைமை மார்க்கெட்டிங் அதிகாரி அவ்னேஷ் தெரிவித்துள்ளார்.

இந்த திட்டத்தின் கீழ் செல்போனுக்கான ப்ரீபெய்ட் கனெக்சன் கிடைக்கிறது. இதன்படி அன்லிமிடெட் கால் , ஒரு நாளைக்கு இரண்டு ஜிபி டேட்டா மற்றும் 40 மற்றும் 100 Mbps வேகங்களில் பிராட்பேண்ட் வசதி வழங்கப்படுகிறது. 13 ஓடிடி தளங்களுக்கான அணுகல்கள் இலவசமாக கிடைக்கின்றன. டிஸ்னி + ஹாட்ஸ்டார், சோனி மற்றும் பல்வேறு தளங்களை பார்வையிட முடியும் என தெரிவிக்கப்பட்டுள்ளது. Vi Movies & TV செயலி வாயிலாக அனைத்து ஓடிடி தளங்களையும் ஒரே ரீசார்ஜில் பல்வேறு கருவிகளிலும் காண முடியும் என கூறப்பட்டுள்ளது.

அதுமட்டுமின்றி இரவு நேரங்களில் அன்லிமிடெட் டேட்டா, வார இறுதி நாட்களில் 200ஜிபி வரை டேட்டா ரோல் ஓவர் மேலும் மாதம் இரண்டு முறை போனஸ் டேட்டா ஆகிய அம்சங்களும் இதில் உள்ளன. தற்போதைக்கு கேரளாவில் இந்த சேவை இரண்டு வகைகளில் கிடைக்கிறது. 40 Mbps டேட்டா வேகம் கொண்ட திட்டம் 3 மாதங்களுக்கு 2,499 ரீசார்ஜ் திட்டத்தில் கிடைக்கிறது. இது ஓராண்டுக்கான பேக்கேஜ் என்றால் 9,555 ரூபாய் ஆகும்.

100 Mbps டேட்டா வேகா கொண்ட திட்டத்தில் 3 மாதங்களுக்கு 3,399 ரூபாய் ரீசார்ஜ் செய்ய வேண்டும், ஓராண்டுக்கு 12955 ரூபாய் திட்டத்தில் ரீசார்ஜ் செய்ய வேண்டும். கேரளாவில் ஏற்கனவே வோடபோன் வாடிக்கையாளராக இருப்பவர்கள் Vi One Fiber சேவையை பெற முடியும் என்றும் தெரிவிக்கப்பட்டுள்ளது.

30 ஆண்டுகளாக மக்களின் பொழுதுபோக்கை தரமானதாக மாற்றி வரும் ஏசியானட் தற்போது மொபைல் சேவை, பொழுதுபோக்கு, பிராட்பேண்ட் ஆகியவற்றை ஒருங்கிணைத்து தருவதில் மகிழ்ச்சி அடைகிறது என ஏசியானட் நிறுவனத்தின் தலைமை செயல் அதிகாரியான மூர்த்தி சகாந்தி தெரிவித்துள்ளார்.

Story written by: Devika