ஜியோ, ஏர்டெல்-க்கு இணையான 4ஜி, 5ஜி விரிவாக்கம்.. வோடபோன் ஐடியா-வின் ரூ.23000 கோடி மெகா கடன் திட்டம்!

சென்னை: இந்தியாவின் மூன்றாவது மிகப்பெரிய டெலிகாம் சேவை நிறுவனமான வோடபோன் ஐடியா (Vi), தனது சக போட்டியாளர்களான ரிலையன்ஸ் ஜியோ மற்றும் ஏர்டெல் ஆகியவற்றுடன் நேருக்கு நேர் போட்டிப்போட மிகப்பெரிய விரிவாக்கத் திட்டத்தைக் கையில் எடுத்துள்ளது.

ஆனால் இத்திட்டத்தைச் செயல்படுத்த வோடபோன் ஐடியாவுக்கு பெரும் நிதி ஆதரவு தேவை, தற்போதைய நிலையில் வோடாஃபோன் ஐடியாவின் தாய் நிறுவனங்களான பிரிட்டன் நாட்டின் வோடாஃபோன் மற்றும் இந்தியாவின் ஆதித்யா பிர்லா குழுமம் இத்திட்டத்திற்குத் தேவையான மொத்த தொகையைச் சொந்தமாக உட்செலுத்த முடியாத காரணத்தால் பிற வழிகளில் நிதியைத் திட்ட முடிவு செய்துள்ளது.

வோடபோன் ஐடியா தனது சேவை விரிவாக்கத்திற்கான மூலதனத்தைத் திரட்ட, வங்கிகளிடம் ரூ.23,000 கோடி கடனாகப் பெறும் திட்டத்தை எஸ்பிஐ வங்கி தலைமையிலான கூட்டணியிடம் முன் வைத்துள்ளது. இதனுடன் ரூ.10,000 கோடிக்கான வங்கி உத்தரவாதத்தையும் (bank guarantees) கோரியுள்ளது வோடபோன் ஐடியா நிர்வாகம்.

வோடபோன் பிஎல்சி (Vodafone Plc) மற்றும் ஆதித்யா பிர்லா குழுமத்தின் கூட்டணி தான் வோடபோன் ஐடியா நீண்ட காலமாக நிதி திரட்டும் திட்டத்தை வங்கிகளிடம் முன்வைத்த நிலையில் தொடர் தோல்விகள் மட்டுமே மிஞ்சியது. ஆனால் தற்போது வோடபோன் ஐடியா வங்கிகளின் நீண்ட நாள் கோரிக்கையை ஏற்று, வியாபாரத்தில் அதிக பங்குகளை (equity) வைக்க ஒப்புக்கொண்டது.

சமீபத்தில் ஸ்டேட் பேங்க் ஆப் இந்தியா (SBI) தலைமையிலான வங்கிகளின் கூட்டமைப்பில் கடன் கோரும் திட்டத்தைச் சமர்ப்பித்துள்ளது. இந்த திட்டத்தின் படி வோடபோன் ஐடியா தனது 4G கவரேஜை மேம்படுத்துவதற்கும், முக்கிய சந்தைகளில் புதிய 5G சேவையைத் தொடங்குவதற்கும் ரூ.55,000 கோடி மூலதனம் தேவைப்படுவதாகத் தனது திட்ட அறிக்கையில் தெரிவித்துள்ளது. இதில் ரூ.23,000 கோடியை வங்கி கடனாக பெற திட்டமிடப்பட்டுள்ளது.

2024 மார்ச் காலாண்டு முடிவில் வோடபோன் ஐடியா-வின் பங்கு இருப்பு தகவலில் மத்திய அரசு வோடபோன் ஐடியாவில் 32.19% பங்குகளை வைத்திருக்கிறது. இருப்பினும், இந்தியக் குடியரசுத் தலைவரின் பெயரில் உள்ள பிற அரசு பங்குகளைப் போல் இல்லாமல், வோடபோன் ஐடியாவின் பங்குகளை மத்திய அரசின் முதலீடு மற்றும் பொதுச் சொத்து மேலாண்மைத் துறையால் (DIPAM) நிர்வகிக்கப்படுகிறது.