சென்னை: கிண்டியில் புதிய அலுவலகத்தை திறந்த WeWork..!

சென்னை: சர்வதேச அளவில் அலுவலக கட்டமைப்பையே மாற்றி அமைத்த WeWork நிறுவனம் சென்னை கிண்டியில் 1.3 லட்சம் சதுர அடி பரப்பிலான அலுவலகத்தை செயல்பாட்டுக்கு கொண்டு வந்துள்ளது. ஒரு நிறுவனம் நடத்துவதற்கு தேவையான அலுவலக வசதிகளை ஏற்படுத்தி தரக்கூடியது தான் வீவொர்க் (WeWork) நிறுவனம்.

ஐடி நிறுவனங்களில் தொடங்கி ஒரே இடத்தில் பல நிறுவனங்களை ஒருங்கிணைத்து வேலை செய்வதற்கு பணியிடங்களையும், வசதிகளையும் அமைத்து குத்தகை விடுகிறது. அமெரிக்காவின் நியூயார்க் நகரை தலைமையிடமாக கொண்டு செயல்படும் வீவொர்க், முதன்முறையாக சென்னை அலுவலக சந்தையிலும் கால்பதித்துள்ளது.

ஜூன்13ஆம் தேதி இந்நிறுவனம் வெளியிட்டுள்ள அறிக்கையில் சென்னை கிண்டியில் ஒலிம்பியா சைபர்ஸ்பேஸை நிறுவி இருப்பதாக அறிவித்துள்ளது. இரண்டு தளங்களில் 1.3 லட்சம் சதுர அடியில் 2,000 பேர் அமர்ந்து வேலை பார்க்கும் வகையில் இந்த அலுவலகம் அமைக்கப்பட்டுள்ளது.

இதன் மூலம் இந்தியாவில் வீவொர்க் நிறுவனத்தின் செயல்பாடுகள் 8 நகரங்களுக்கு விரிவடைந்துள்ளன. சென்னை ஒலிம்பியா அலுவலகம், இந்தியாவில் வீவொர்க் நிறுவனத்தின் 55ஆவது அலுவலகமாகும்.

சென்னை வலுவான தகவல் தொழில்நுட்பத் துறை மற்றும் உற்பத்தி துறைகளை கொண்டிருப்பதாகவும் பல்வேறு துறைகளில் சென்னையின் வளர்ச்சி பாசிட்டிவ்வாக இருப்பதாகவும் வீவொர்க் இந்தியாவின் தலைமை நிர்வாக அதிகாரி கரண் விர்வாணி தெரிவித்துள்ளார். தற்போது சென்னையில் பல்வேறு நிறுவனங்களுடன் தங்களது பிராண்ட் ஒப்பந்தம் செய்திருப்பதாகவும் அவர் தெரிவித்துள்ளார்.

சென்னை இந்தியாவில் ஒரு முக்கிய அலுவலக சந்தையாக வளர்ந்து வருவது சமீபத்தில் வெளியிடப்பட்ட ஒரு அறிக்கையில் தெரிய வந்துள்ளது. சொத்து ஆலோசனை நிறுவனமான Savills வெளியிட்ட ஆய்வறிக்கை அடிப்படை சென்னையை பல நிறுவனங்கள் படையெடுத்து வருவதாகவும், சென்னையில் அலுவலகங்களுக்கான டிமாண்ட் அதிகரித்து வருவதாகவும் கூறியுள்ளது.

ஒவ்வொரு ஆண்டும் இது 31% வளர்ச்சி அடைந்து வருகிறது, சென்னையில் கோ-வொர்கிங் ஸ்பேஸ்கள் என்பது மொத்த வணிக ரியல் எஸ்டேட்டில் 20 % ஆக்கிரமித்துள்ளது என்றும் அந்த நிறுவனம் கூறியுள்ளது.

ஃப்ரீலான்சர்கள், தொழில் முனைவோர், நிறுவனங்கள் மற்றும் உலகளாவிய திறன் மையங்கள் வளர்ந்து வரும் வணிக நிலப்பரப்பாக சென்னை உருவெடுத்துள்ளது என வீவொர்க் இந்தியா தெரிவித்துள்ளது. ஸ்டார்ட் அப் நிறுவனங்களில் தொடங்கி மிகப்பெரிய நிறுவனங்கள் வரை தங்களது தொழிலை வளர்ப்பதற்கு தேவையான சாதகமான சூழல் சென்னையில் நிலவுவதாகவும் கூறியுள்ளது.

கடந்த 2017 ஆம் ஆண்டு வீவொர்க் நிறுவனம் இந்தியாவிலும் நுழைந்தது. அதிலிருந்து தற்போது வரை 55 இடங்களில் இந்த நிறுவனம் அலுவலகங்களை நிறுவி குத்தகைக்கு தருகிறது. டெல்லி, குருகிராம், நொய்டா, மும்பை, பெங்களூரு, புனே மற்றும் ஹைதராபாத் தற்போது சென்னை என இந்த நிறுவனத்தின் செயல்பாடுகள் விரிவாக்கம் அடைந்துள்ளன.

Story written by: Devika