FD-இல் போட்ட பணம் 3 வருஷத்துல அதிக லாபம் ஈட்டணுமா? எந்த வங்கியில் வட்டி அதிகம்..?

நிரந்தர வைப்புத் தொகை (Fixed Deposits - FDs) என்பது இந்திய முதலீட்டாளர்கள் மத்தியில் குறைந்த ஆபத்து மற்றும் உத்தரவாதமான வருமானம் காரணமாக எப்போதும் முதல் தேர்வாக இருந்து வருகிறது. வங்கித் துறையில் சமீபத்தில் வட்டி விகிதங்கள் உயர்த்தப்பட்டிருப்பது, முதலீட்டாளர்களுக்கு அதிக லாபம் ஈட்ட ஒரு பொன்னான வாய்ப்பை அளித்துள்ளது. குறிப்பாக, 3 ஆண்டுகள் கால அளவிலான FD திட்டங்களில் அதிக வட்டி வழங்கும் வங்கிகள் எவை, உங்கள் ரூ.1 லட்சம் முதலீடு எவ்வளவு உயரும் என்பதை இங்கே பார்ப்போம்.

தனியார் வங்கிகளின் வட்டி விகிதங்கள் : தற்போதுள்ள சூழலில், அதிக வருமானத்தை விரும்பும் முதலீட்டாளர்களுக்கு தனியார் வங்கிகளே சிறந்த தேர்வாக உள்ளன.

இண்டஸ்இண்ட் வங்கி (IndusInd Bank): 3 ஆண்டு FD-களுக்கு ஆண்டுக்கு 6.65% வட்டி வழங்கி இந்தப் பட்டியலில் முன்னிலை வகிக்கிறது. இங்கு ரூ.1 லட்சம் முதலீடு செய்தால், மூன்று ஆண்டுகளுக்குப் பிறகு நீங்கள் ரூ.1,19,950 திரும்பப் பெற முடியும்.

ஆக்சிஸ் வங்கி மற்றும் ஐசிஐசிஐ வங்கி: இந்த இரண்டு பெரிய வங்கிகளும் சற்று குறைவாக 6.60% வட்டி கொடுக்கின்றன. இந்த வங்கிகளில் ரூ.1 லட்சம் முதலீடு செய்தால், ரூ.1,19,800 கிடைக்கும்.

ஹெச்டிஎஃப்சி வங்கி மற்றும் கோடக் மஹிந்திரா வங்கி: இவை இரண்டும் சுமார் 6.40% வட்டி வழங்குகின்றன. இங்கு முதலீடு செய்தால், ரூ.1 லட்சம் மூன்று ஆண்டுகளுக்குப் பிறகு சுமார் ரூ.1,19,200 ஆக உயரும்.

பொதுத்துறை வங்கிகளின் நிலை என்ன..?: அரசின் கட்டுப்பாட்டில் உள்ள பொதுத்துறை வங்கிகளும் தனியார் வங்கிகளுக்கு இணையாக நல்ல வட்டி விகிதங்களை வழங்கி வருகின்றன.

பாங்க் ஆஃப் பரோடா மற்றும் யூனியன் பேங்க் ஆஃப் இந்தியா: இந்த வங்கிகளும் சுமார் 6.40% வட்டி விகிதத்தை வழங்குகின்றன. இது தனியார் வங்கிகளுக்கு சமமான வருமானமாகும்.

பாரத ஸ்டேட் வங்கி: நாட்டின் மிகப்பெரிய வங்கியான எஸ்பிஐ, 3 ஆண்டு FD-களுக்குச் சுமார் 6.30% வட்டி வழங்குகிறது. இங்கு ரூ.1 லட்சம் முதலீடு செய்தால், 3 ஆண்டுகளில் ரூ.1,18,900 கிடைக்கும்.

கனரா வங்கி மற்றும் பஞ்சாப் நேஷனல் வங்கி: இவை சுமார் 6.25% வட்டி விகிதத்தை வழங்குகின்றன. இங்கு ரூ.1 லட்சம் வைப்புத் தொகை முதிர்ச்சியின்போது சுமார் ரூ.1,18,750 ஆக உயரும்.

உங்கள் முதலீட்டு மூலதனம் பாதுகாக்கப்பட வேண்டும், அதேசமயம் நல்ல வருமானமும் கிடைக்க வேண்டும் என்று நினைத்தால், FD ஒரு சரியான வழியாகும். தற்போதைய வட்டி விகிதங்களின்படி, 3 ஆண்டு FD-களில் ரூ.1 லட்சம் முதலீடு செய்வதன் மூலம், நீங்கள் குறைந்தபட்சம் ரூ.18,750 முதல் அதிகபட்சம் ரூ.19,950 வரை லாபம் ஈட்டலாம்.

வட்டி விகிதங்கள் ஒவ்வொரு வங்கிக்கும் மாறுபடுவதால், இண்டஸ்இண்ட் வங்கி போன்ற வங்கிகள் அதிக வருமானம் அளித்தாலும், முதலீடு செய்வதற்கு முன் உங்கள் வங்கியின் சமீபத்திய வட்டி விகிதங்களை ஒப்பிட்டு பார்த்து, பாதுகாப்பான முடிவை எடுப்பது மிக அவசியம்.