9-9-6 இப்படியொரு விதியா? வேலைக்கு போறவங்க அனைவரும் கண்டிப்பா பாருங்க.. யார் இந்த தக்ஷ் குப்தா?

அமெரிக்காவைச் சேர்ந்த இந்திய வம்சாவளி AI ஸ்டார்ட்அப் தலைமை நிர்வாக அதிகாரி தக்ஷ் குப்தா, தனது கடுமையான வேலைக் கொள்கைகளுக்காக இணையத்தில் சர்ச்சையை ஏற்படுத்தியுள்ளார். வெறும் 23 வயதான இவர், வாரத்தில் ஆறு நாட்கள் தினமும் 12 மணிநேரம் வேலை செய்யும் '9-9-6' விதியை செயல்படுத்தி வருகிறார். பெரும் எதிர்ப்புகள் இருந்தபோதிலும், தனது நிலைப்பாட்டில் உறுதியாக இருக்கும் இவர், சிலிக்கான் வேலியில் உள்ள பெரும்பாலான தொழில்நுட்ப ஊழியர்கள் இதே போன்ற தீவிர வேலை கலாச்சாரத்தையே விரும்புவதாகக் கூறுகிறார்.

யார் இந்த தக்ஷ் குப்தா?: சான் பிரான்சிஸ்கோவை தளமாகக் கொண்ட 'கிரெப்டைல்' (Creptile) என்ற AI ஸ்டார்ட்அப் நிறுவனத்தின் இணை நிறுவனர் மற்றும் தலைமை நிர்வாக அதிகாரிதான் தக்ஷ் குப்தா. இவர் 2019-இல் மதிப்புமிக்க ஜார்ஜியா தொழில்நுட்ப நிறுவனத்தில் கணினி அறிவியலில் இளங்கலைப் பட்டம் பெற்றவர். தனது LinkedIn சுயவிவரத்தின்படி, குவால்காம் மற்றும் அமேசான் வெப் சர்வீசஸ் போன்ற பெரிய நிறுவனங்களிலும் பயிற்சி பெற்றுள்ளார். 2023 முதல் இவர் கிரெப்டைல் நிறுவனத்தை உருவாக்கி வருகிறார்.

9-9-6 விதி என்றால் என்ன?: தக்ஷ் குப்தாவின் 9-9-6 வாழ்க்கை முறை, வாரத்தில் ஆறு நாட்கள் காலை 9 மணி முதல் இரவு 9 மணி வரை கடுமையான வேலை அட்டவணையை உள்ளடக்கியது. இது வேலைக்கு மட்டும் பொருந்தவில்லை. இந்த விதிமுறை உடல்நலம், தனிப்பட்ட வாழ்க்கை என அனைத்தையும் இணைத்து ஒரு முழுமையான அணுகுமுறையைக் கொண்டுள்ளது. குப்தா தனது '9-9-6' விதியை இவ்வாறு விளக்குகிறார்

வாரத்தில் ஆறு நாட்கள் காலை 9 முதல் இரவு 9 வரை வேலை.

அதிக எடை தூக்கும் உடற்பயிற்சிகளை மேற்கொள்ளுதல்.

நெடுந்தூரம் ஓடுதல்.

சீக்கிரமே திருமணம் செய்து கொள்ளுதல்.

தூக்கத்தைக் கண்காணித்தல்.

ஸ்டீக் மற்றும் முட்டைகள் கொண்ட உணவை உட்கொள்ளுதல்.

வேலை-வாழ்க்கை சமநிலை குறித்த அவரது பார்வை: வேலை-வாழ்க்கை சமநிலை (work-life balance) என்ற கருத்தை தக்ஷ் குப்தா உறுதியாக எதிர்க்கிறார். தனது நிறுவனத்தில் வேலைக்கு விண்ணப்பிப்பவர்களிடம் கூட, கிரெப்டைல் வேலை-வாழ்க்கை சமநிலையை வழங்குவதில்லை என்பதை முதல் நேர்காணலிலேயே வெளிப்படையாகக் கூறிவிடுவதாக அவர் தெரிவித்துள்ளார்.

சமீபத்தில் ஒரு நேர்காணலில், கிரெப்டைல் வேலை-வாழ்க்கை சமநிலையை வழங்குவதில்லை என்றும், வழக்கமான வேலை நாட்கள் காலை 9 மணிக்குத் தொடங்கி இரவு 11 மணிக்கு முடிவடையும் என்றும், பெரும்பாலும் சனி மற்றும் ஞாயிற்றுக்கிழமைகளிலும் வேலை செய்கிறோம் என்றும் வேலைக்கு வருவோரிடம் மிகவும் தெளிவாகச் சொன்னேன் என்று குப்தா 2024-இல் X தளத்தில் எழுதியுள்ளார்.

சில இளைஞர்கள் அர்த்தமுள்ள ஒன்றை உருவாக்க அழுத்தம் கொடுக்கப்படும் வேலைகளை வேண்டுமென்றே தேடுகிறார்கள். கிரெப்டைலில் இணைந்த பொறியாளர்களுக்குக் கூட, பெரிய தொழில்நுட்ப நிறுவனங்களில் பணிபுரிய வாய்ப்பு இருந்தது. அங்கு அவர்களின் வாழ்க்கை மிகவும் வசதியாக இருந்திருக்கும். ஆனால் அவர்கள் எங்களுடன் பணிபுரியத் தேர்ந்தெடுத்தனர் என்று குப்தா கூறியுள்ளார்.

குப்தாவின் இந்த தீவிர அணுகுமுறை ஒருபுறம் விமர்சனங்களைச் சந்தித்தாலும், மறுபுறம், ஒரு ஸ்டார்ட்அப் நிறுவனத்தை வளர்க்க இதுபோன்ற அர்ப்பணிப்பு அவசியம் என்று அவரது ஆதரவாளர்கள் கருதுகின்றனர். இது, இன்றைய இளைஞர்கள் மத்தியில் வேலை கலாச்சாரம் குறித்து ஒரு புதிய விவாதத்தைத் தொடங்கியுள்ளது.