பில்கேட்ஸ் முதலீடு செய்த இரண்டு நிறுவனங்கள்.. இந்த வருஷம் இந்த துறைகள் தான் வளர்ச்சி அடையுமோ?

மைக்ரோசாப்ட் நிறுவனரும் உலக பணக்காரர்களுள் ஒருவருமான பில்கேட்ஸ் இரண்டு நிறுவனங்களில் பெரிய அளவிலான தொகையை முதலீடு செய்திருப்பது தெரிய வந்துள்ளது.

சிறந்த நிறுவனங்களை தேர்வு செய்து முதலீடு செய்வதில் வல்லமை படைத்தவர் பில்கேட்ஸ். அவருடைய பில் அண்ட் மெலிந்தா கேட்ஸ் அறக்கட்டளையின் போர்ட் போலியோவில் அதிக லாபம் தரக்கூடிய நிறுவனங்களின் பங்குகள் இருக்கின்றன. குறிப்பாக மைக்ரோசாப்ட் நிறுவனத்தில் பில்கேட்ஸ் மற்றும் அவருடைய அறக்கட்டளை 15.4 பில்லியன் டாலர் மதிப்புள்ள பங்குகளை சொந்தமாக வைத்திருக்கிறது.

அமெரிக்க பங்குச்சந்தை போக்குக்கு ஏற்றபடி தன்னுடைய முதலீட்டு உத்திகளை மாற்றிக் கொண்டே இருப்பவர் பில்கேட்ஸ். அந்த வகையில் அவர் அண்மையில் இரண்டு நிறுவனங்களின் பங்குகளை வாங்கி இருப்பது தெரிய வந்திருக்கிறது. முற்றிலும் தொழில்நுட்பத்தோடு சம்பந்தமே இல்லாத நிறுவனங்களில் அவர் முதலீடு செய்திருப்பது தற்போது சர்வதேச அளவில் விவாத பொருளாக மாறி இருக்கிறது.

செயற்கை நுண்ணறிவு தொழில்நுட்பம், மின்சார வாகனம், ஐடி நிறுவனங்களின் வளர்ச்சி வேகமாக இருக்கும் எனவே அந்த துறைகளில் முதலீடு செய்தால் சிறந்த லாபத்தை காண முடியும் என பரவலாக சொல்லப்பட்டு வரும் நிலையில் இந்த மூன்றுக்கும் சம்பந்தமே இல்லாத இரண்டு நிறுவனங்களில் பில்கேட்ஸ் முதலீடு செய்திருக்கிறார். பில்கேட்ஸ் போக்குவரத்து பிரிவில் செயல்படக்கூடிய இரண்டு நிறுவனங்களில் முதலீடு செய்து இருக்கிறாராம்.

லாஜிஸ்டிக்ஸ் மற்றும் டிரான்ஸ்போர்ட் பிரிவில் இயங்கக்கூடிய இரண்டு நிறுவனங்களில் பில்கேட்ஸ் முதலீடு செய்திருக்கிறார். 2025 ஆம் ஆண்டில் இந்த இரண்டு துறைகளும் மீண்டு வரும் என்ற நம்பிக்கையில் பில்கேட்ஸ் முதலீடு செய்திருப்பதாக சொல்லப்படுகிறது. இதன்படி பில்கேட்ஸ் Paccar என்ற நிறுவன பங்குகளை வாங்கி இருக்கிறார்.

Paccar நிறுவனம் அமெரிக்காவை சேர்ந்த லாரி வடிவமைப்பு மற்றும் தயாரிப்பு நிறுவனமாகும். இந்த நிறுவனத்தின் ஒரு பங்கு மதிப்பு 108.5 அமெரிக்க டாலர்களாக இருக்கிறது. கடந்த ஓராண்டு காலத்தில் இந்த நிறுவனத்தின் பங்கு மதிப்பு 14 சதவீதம் அதிகரித்துள்ளது. அதேபோல அவர் FedEx என்ற நிறுவனத்தின் பங்குகளை வாங்கி இருக்கிறார்.

FedEx என்பது அமெரிக்காவை சேர்ந்த போக்குவரத்து, இ-காமர்ஸ் மற்றும் வணிக சேவை ஆகிய கூட்டு தொழிலில் ஈடுபடும் ஒரு நிறுவனமாகும். இந்த நிறுவனத்தின் ஒரு பங்கு மதிப்பு 274.90 அமெரிக்க டாலர்களாக இருக்கிறது. கடந்த ஓராண்டு காலத்தில் இந்த நிறுவனத்தின் பங்கு மதிப்பு 9% வரை உயர்ந்திருக்கிறது.

Story written by: Devika