ரிலையன்ஸ் ஜியோவில் ஏன் முதலீட்டாளர்கள் குவிகிறார்கள்..? ரகசியம் இதோ!

ரிலையன்ஸ் ஜியோ. ஆசியாவின் நம்பர் 1 பணக்காரர் முகேஷ் அம்பானியின் கம்பெனி. ரிலையன்ஸ் இண்டஸ்ட்ரீஸ் நிறுவனத்தின் ஒரு பகுதி. ரிலையன்ஸை இன்னும் சில தசாப்தங்களுக்கு உலக வியாபார சாம்ராஜ்யங்களில் ஒன்றாக தூக்கி நிறுத்தக் கூடிய எதிர் கால வியாபாரம்.

கடந்த செப்டம்பர் 2016-ல் இருந்து இந்தியாவில்வியாபாரம் செய்யத் தொடங்கியது ஜியோ. ஆரம்பித்து நான்கு வருடங்கள் கூட இன்னும் முழுமையாக நிறைவடையவில்லை. அதற்குள் இந்தியாவில் சுமாராக 30 சதவிகித வாடிக்கையாளர்களை இழுத்துவிட்டது ஜியோ.

எல்லாவற்றுக்கும் காரணம் ரிலையன்ஸ் ஜியோ அள்ளிக் கொடுத்த சலுகைகள் மற்றும் இலவசங்கள் தான். நினைவிருக்கிறதா..? இலவச டேட்டா, வாய்ஸ் கால் எல்லாம்.

ஏன் பங்கு விற்பனை

நமக்கு ஜியோ, இலவசமாக டேட்டா & வாய்ஸ் கால் போன்றவைகளை அள்ளிக் கொடுக்க அவர்களுக்கு செலவு ஆகி இருக்காதா என்ன..? அந்த செலவுகளை எல்லாம் கடன் வாங்கித் தான் செய்தது. அந்த கடன்களை அடைக்க ரிலையன்ஸ் ஜியோ இப்போது, தன் ஒரு பகுதி பங்குகளை விற்று பணத்தை திரட்டிக் கொண்டு இருக்கிறது.

ஏன் ரிலையன்ஸ் ஜியோ பங்கை வாங்குகிறார்கள்

முதல் விஷயம். ரிலையன்ஸ் இண்டஸ்ட்ரீஸ் இந்தியாவின் நம்பர் 1 கம்பெனி. வர்த்தகம், தொழில், பங்குச் சந்தை என எப்படி எடுத்துப் பார்த்தாலும், ரிலையன்ஸ் நம்பர் 1 கம்பெனி. நம்பர் 1 கம்பெனி, உலகின் மிகப் பெரிய டெலிகாம் சந்தைகளில் ஒன்றான இந்தியாவில் களம் இறங்கி ஒரு சில ஆண்டுகளில் அதிக வாடிக்கையாளர்களைப் பிடித்து வியாபாரம் செய்து கொண்டு இருக்கிறது.

ஏன் ரிலையன்ஸ் ஜியோ பங்கை வாங்குகிறார்கள் 1

சுருக்கமாக ஜியோ தான் இந்திய டெலிகாம் துறையின் தந்தை இடத்துக்கு வளர்ந்துவிட்டது. அதோடு இந்த குறைந்த காலத்திலேயே, ரிலையன்ஸ் ஜியோ நிறுவனம், டெலிகாம் வியாபாரம் வழியாகவே கணிசமாக லாபம் பார்க்கத் தொடங்கிவிட்டது. இன்னும் ஒரு சில ஆண்டுகளில் ரிலையன்ஸ் ஜியோ பங்குச் சந்தையில் பட்டியலிடப்பட இருக்கிறது.

ஏன் ரிலையன்ஸ் ஜியோ பங்கை வாங்குகிறார்கள் 2

இப்படி பங்குச் சந்தையில் பட்டியலிடப்படுவதற்கு முன்பே லாபம் பார்க்கும் கம்பெனியில் யார் தான் முதலீடு செய்யாமல் இருப்பார்கள். பற்றாக்குறைக்கு, ஃபேஸ்புக்கே சுமாராக 9.9 % பங்குகளை ரிலையன்ஸ் ஜியோவில் வாங்கியது, மற்ற முதலீட்டாளர்களையும் வாங்க வைத்திருக்கும் தானே. அது தான் சந்தையில் நடந்து கொண்டு இருக்கிறது. ஆகையால் தான் ஜியோ தன் பங்குகளை விற்றுக் கொண்டே இருக்கிறது.