விமான பயணிகள் எண்ணிக்கையில் சென்னை, திருச்சி, கோவை ஏறுமுகம்! மதுரை மட்டும் இறங்குமுகம்!

சென்னை: தமிழ்நாட்டில் உள்ள விமான நிலையங்களில் விமான பயணிகளின் எண்ணிக்கை கணிசமான அளவு அதிகரித்திருப்பது தெரியவந்துள்ளது. குறிப்பாக சென்னை, திருச்சி, கோயம்புத்தூர் மற்றும் தூத்துக்குடி ஆகிய விமான நிலையங்களில் கடந்த 2023 ஆகஸ்டுடன் ஒப்பிடும்போது 2024 ஆகஸ்டில் பயணிகளின் எண்ணிக்கை உயர்ந்துள்ளது. சென்னை விமான நிலையத்தை பொருத்தவரை உள்நாட்டு விமான பயணிகளின் எண்ணிக்கை அதிகரித்துள்ளது. சர்வதேச விமான பயணிகளின் எண்ணிக்கை குறைந்துள்ளது.

2024 ஆகஸ்ட் மாதத்தில் சென்னை விமான நிலையத்தின் இரண்டு டெர்மினல்களிலும் மொத்தமாக 18, 53, 115 பயணிகள் பயணம் செய்துள்ளனர். இதுவே 2023 ஆகஸ்ட் மாதத்தில் 17, 53,115 பயணிகள் என இருந்தது. அதாவது கடந்த ஆண்டுடன் ஒப்பிடும்போது நடப்பாண்டில் இது 5.1 சதவீதம் அதிகரித்துள்ளது.

கோயம்புத்தூர் விமான நிலையத்தை பொருத்தவரை 2024 ஆகஸ்ட் மாதத்தில் அங்கே 2,70,013 பயணிகள் வந்து சென்றுள்ளனர். இது கடந்த ஆண்டு இதே காலகட்டத்தில் 2, 53, 814 ஆக இருந்தது. அதாவது கடந்தாண்டை விட நடப்பாண்டில் இது 6.1 சதவீதம் அதிகம். திருச்சி விமான நிலையத்திலும் கடந்த ஆண்டுடன் ஒப்பிடும்போது நடப்பாண்டில் பயணிகளின் எண்ணிக்கை 17.9% உயர்ந்துள்ளது.

கடந்த ஆண்டின் 1, 43,014 பேர் பயணம் செய்த நிலையில் நடப்பாண்டில் ஆகஸ்ட் மாதம் 1,68,668 என அதிகரித்துள்ளது. தூத்துக்குடி விமான நிலையத்தில் கடந்த ஆண்டு விட நடப்பாட்டில் கூடுதலாக 2,711 பயணிகள் பயணம் செய்துள்ளனர். சதவீத அடிப்படையில் பார்க்கும்போது இது 16.4 சதவீதம் அதிகமாகும்.

ஆனால் மதுரை விமான நிலையத்தில் மட்டும் பயணிகளின் எண்ணிக்கை கணிசமான அளவு குறைந்து இருக்கிறது. கடந்த ஆண்டு ஆகஸ்ட் மாதம் 1,14,048 பேர் பயணம் செய்திருந்த நிலையில் நடப்பு ஆண்டில் அது 1,08,944 என குறைந்துள்ளது. இது 4.8% குறைவு என தெரிய வருகிறது. சேலம் விமான நிலையத்தை பொருத்தவரை கடந்த ஆண்டு ஆகஸ்ட் மாதம் அது செயல்பாட்டில் இல்லை. நடப்பாண்டில் இந்த விமான நிலையத்தை சுமார் 10 , 994 பயணிகள் பயன்படுத்தியுள்ளனர்.

சென்னை விமான நிலையத்தில் உள்நாட்டு பயணிகளின் எண்ணிக்கை அதிகரித்திருந்தாலும் வெளிநாட்டு பயணிகளின் எண்ணிக்கை குறைந்திருப்பது கவலை தருவதாக விமான நிலைய அதிகாரிகள் கூறுகின்றனர்.

2023 ஆம் ஆண்டு சர்வதேச விமான போக்குவரத்தில் 4,94,796 பேர் பயணம் செய்த நிலையில் நடப்பாண்டில் அது 4,86,177 என குறைந்துள்ளது. அதாவது 1.8% என சரிவை கண்டுள்ளது. இதற்கு சர்வதேச விமானங்களுக்கான டெர்மினலில் கஸ்டம் துறையில் இருக்கும் பிரச்னைகளும், ஆய்வு நடத்துவதில் இருக்கும் தாமதமுமே காரணமாக சொல்லப்படுகிறது.

Written by: Devika