வேதாளம் மீண்டும் முருங்கை மரம் ஏறியது.. விப்ரோ-வில் நடப்பது என்ன..?

இந்தியாவின் முன்னணி ஐடி சேவை நிறுவனமான விப்ரோ ஜூலை முதல் செப்டம்பர் 2024 வரையிலான காலத்தில் தனது மொத்த பணியாளர்களின் எண்ணிக்கையில் 502 பேர் குறைந்துள்ளதாக நிறுவனத்தின் 2ஆம் காலாண்டு முடிவுகளில் தெரிவித்துள்ளது. முந்தைய காலாண்டில் பணியாளர்களின் எண்ணிக்கை சற்று அதிகரித்ததைத் தொடர்ந்து தற்போது மீண்டும் எண்ணிக்கை குறையும் போக்கு துவங்கியுள்ளது.

இந்தியாவின் முன்னணி ஐடி சேவை நிறுவனங்களாக டிசிஎஸ், இன்போசிஸ், ஹெச்சிஎல் டெக், விப்ரோ, டெக் மஹிந்திரா ஆகிய அனைத்து நிறுவனத்திலும் ஊழியர்கள் எண்ணிக்கை தொடர்ந்து குறைந்து வந்த நிலையில் தற்போது சில மாற்றங்கள் நடந்து வருகிறது. உதாரணமாக இன்போசிஸ் நிறுவனத்தில் 6 காலாண்டுகளுக்குப் பின்பு முதல் முறையாக ஊழியர்கள் எண்ணிக்கை அதிகரித்துள்ளது. ஆனால் விப்ரோவில் கடந்த காலாண்டிலேயே அதிகரித்த நிலையில் தற்போது குறைந்துள்ளது.

இந்த நிலையில் விப்ரோ நிறுவனத்தின் மொத்த பணியாளர் எண்ணிக்கையில் 502 பேர் குறைந்தது மூலம் தற்போது 233,889 ஆக உள்ளது, இது முந்தைய காலாண்டின் இறுதியில் 234,391 ஆக இருந்தது. இந்த சரிவு நிறுவனத்தின் அட்ரிஷன் விகிதம் குறைந்தது மூலம் ஏற்பட்டது, இது கடந்த பன்னிரண்டு மாதங்களில் 14.5% ஆக உயர்ந்துள்ளது, முந்தைய காலாண்டில் 14.1% ஆக இருந்தது.

பணியாளர் எண்ணிக்கை குறைந்த போதிலும், விப்ரோ 2025ஆம் நிதியாண்டின் துவக்கத்தால் இந்த ஆண்டு 10,000 முதல் 12,000 புதிய பணியாளர்களை நியமிக்கும் திட்டத்தை அறிவித்திருந்தது. இந்த திட்டத்தை நடைமுறைப்படுத்தத் தொடர்ந்து பணியாற்றும் என எதிர்பார்க்கப்படுகிறது.

இதற்கு மாறாக, இந்தியாவின் இரண்டாவது மிகப்பெரிய ஐடி சேவை நிறுவனமான இன்ஃபோசிஸ், அதே காலத்தில் 2,456 ஊழியர்களைச் சேர்த்துள்ளதாகத் தெரிவித்துள்ளது. முந்தைய காலாண்டில் 1,908 ஊழியர்கள் குறைந்ததைத் தொடர்ந்து இந்த குறிப்பிடத்தக்க அதிகரிப்பு ஏற்பட்டுள்ளது. இன்ஃபோசிஸின் மொத்த பணியாளர் எண்ணிக்கை தற்போது 317,788 ஆக உள்ளது, இது ஏழு காலாண்டுகளில் முதல் முறையாக அதிகரித்துள்ளது.

விப்ரோ, 2025 நிதியாண்டின் இரண்டாம் காலாண்டில் தனது நிகர லாபத்தில் 21% உயர்வை பதிவு செய்துள்ளது. கடந்த நிதியாண்டின் இதே காலாண்டில் ரூ.2,646 கோடியுடன் ஒப்பிடுகையில் ரூ.3,209 கோடியாக நிகர லாபம் அதிகரித்துள்ளது.

மேலும் இந்நிறுவனத்தின் ஆப்ரேஷன்ஸ் மூலம் கிடைக்கும் வருவாய் சிறிது குறைந்துள்ளது. கடந்த நிதியாண்டின் இதே காலாண்டில் ரூ.22,516 கோடியிலிருந்த வருவாய் நடப்பாண்டில் ரூ.22,302 கோடியாக குறைந்துள்ளது.