விப்ரோ - காக்னிசென்ட் வாய்க்கா தகராறு.. எல்லாத்துக்கும் காரணம் ஒரேயொரு உயர் அதிகாரி..!

இந்தியாவில் இருக்கும் முன்னணி ஐடி சேவை நிறுவனங்கள் புதிய வர்த்தகத்தைப் பெற முடியாமல் மாட்டிக்கொண்டு இருக்கும் வேளையில் சக போட்டி நிறுவனங்களில் இருந்து உயர் அதிகாரிகளை ஈர்க்கும் படலம் கடந்த ஒரு வருடமாக நடந்து வந்த நிலையில் தற்போது இதன் வாயிலாக ஒரு புதிய பிரச்சனை விப்ரோ - காக்னிசென்ட் மத்தியில் வெடித்துள்ளது.

இந்தியாவின் 4வது பெரிய ஐடி சேவை நிறுவனமான விப்ரோ, முகமது ஹக் என்ற முன்னாள் உயர் அதிகாரி தங்களுடைய non-compete clause ஒப்பந்தத்தை மீறி போட்டி நிறுவனமான காக்னிசென்ட் நிறுவனத்தில் ஆகஸ்ட் மாதம் சேர்ந்துள்ளார் என வழக்குப் பதிவு செய்துள்ளது.

இந்த வழக்கின் மூலம் காக்னிசென்ட் முக்கியமான அதிகாரியை இழப்பது மட்டும் அல்லாமல் அடுத்தடுத்து பல பிரச்சனைகளை எதிர்கொள்ள வாய்ப்பு உள்ளதாகத் தெரிகிறது. உண்மையில் என்ன பிரச்சனை.

முகமது ஹக் இந்த வருடம் ஜூன் மாதம் விப்ரோ நிறுவன பணியில் இருந்து ராஜினாமா செய்துவிட்டு ஆகஸ்ட் 1 ஆம் தேதி காக்னிசென்ட் நிறுவன பணியில் சேர்ந்தார். இதில் என்ன பிரச்சனை என்று பல ஐடி ஊழியர்களுக்கு தோன்றலாம் ஆனால் ஏற்கனவே குறிப்பிட்டது போல முகமது ஹக் கையெழுத்திட்டு உள்ள non-compete clause ஒப்பந்தம் மிகவும் முக்கியமானதாக உள்ளது.

விப்ரோ நிறுவனத்தில் முகமது ஹக் அமெரிக்க ஊழியராகவும், உயர் துணைத் தலைவர் (SVP) மற்றும் லோகலைசேஷன் பிரிவின் தலைவராகவும் பணியாற்றினார். இவர் பணியாற்றும் நேரத்தில் விப்ரோ நிர்வாகம், தன் நிறுவனத்தை விட்டு வெளியேறிய பின்பு காக்னிசென்ட் உட்படச் சில குறிப்பிட்ட நிறுவனத்தில் 12 மாதம் பணியாற்றக் கூடாது என்ற கண்டிஷன் உடன் non-compete clause ஒப்பந்தத்தில் கையெழுத்திட்டு உள்ளார்.

ஆனால் முகமது ஹக் விப்ரோ நிறுவனத்தின் ஒப்பந்தத்தை மீறி ஆகஸ்ட் 1 ஆம் தேதி காக்னிசென்ட் நிறுவனத்தில் சேர்ந்துள்ளார். இதேபோல் தான் ராஜினாமா செய்யும் போது எந்த நிறுவனத்தில் சேரப்போகிறார் என்பதைத் திட்டமிட்டு முகமது ஹக் மறைத்துள்ளார்.

இவை அனைத்தையும் முன்வைத்துத் தான் விப்ரோ தற்போது முகமது ஹக் மீது அமெரிக்காவில் வழக்குத் தொடுத்துள்ளது. இந்த இடைப்பட்ட காலத்தில் முகமது ஹக் மூலம் விப்ரோ நிறுவனத்தின் வர்த்தக இழப்பின் காக்னிசென்ட் ஆதாயம் அடைந்தால் இதுவும் பெரிய பிரச்சனையாக இருக்கும்.

மேலும் முகமது ஹக் விப்ரோ நிறுவனத்தில் இருந்து ராஜினாமா செய்யும் முன்பு, ஜூன் 20 ஆம் தேதி காலகட்டத்தில் இவரது பர்சனல் ஈமெயில் ஐடிக்கு விப்ரோ நிறுவனத்தின் 7 முக்கிய ஆவணங்களை அனுப்பியுள்ளார். இதை ஜூன் 22 ஆம் தேதி விப்ரோ ஐடி நிறுவனம் கண்டுப்படித்த நிலையில் ஜூன் மாதம் விப்ரோ நிறுவனத்தை விட்டு வெளியேறினார்.

அமெரிக்காவை தலைமையிடமாகக் கொண்டு இயங்கும் காக்னிசென்ட், விப்ரோ நிறுவனத்துடன் டிஜிட்டல் ஹெல்த்கேர் சர்வீசஸ் பிரிவில் நேரடியாகப் போட்டிப்போட்டு வரும் வேளையில், முகமது ஹக் விப்ரோ நிறுவனத்தில் பல வருடமாக இத்துறையில் பணியாற்றியவர்.