இந்தாங்க 1,125 கோடி! கொரோனா போருக்கு அள்ளிக் கொடுத்த அசீம் ப்ரேம்ஜி!

கொரோனா வைரஸ் ஒட்டு மொத்த உலகத்தையே ஸ்தம்பிக்க வைத்து இருக்கிறது என்று சொன்னால் அது மிகை இல்லை.

சில மாதங்களுக்கு முன்பு போல உலகம் இப்போது இயங்கவில்லை. வெளிநாடுகளுக்கு செல்வது எல்லாம் விடுங்கள். இப்போது சுதந்திரமாக, நம் ஊரில் தெரு முக்குக்குச் சென்று வர முடியாது என்றால் கொரோனாவின் சீரியஸ் புரியும். '

இந்த கொரோனா வைரஸுக்கு எதிரான போராட்டத்தில், இந்திய பெரு நிறுவன முதலாளிகள் கை கோர்த்து இருக்கிறார்கள்.

இதுவரை

சமீபத்தில் தான் ஆனந்த் மஹிந்திரா தன் முழு சம்பளத்தை இந்த கொரோனாவுக்கு எதிரான போருக்கு வழங்கி இருக்கிறார். அதே போல, ரத்தன் டாடா, 1500 கோடி ரூபாய் வழங்க இருக்கிறார். அதே போல முகேஷ் அம்பானி சுமார் 500 கோடி ரூபாய் பிரதமரிடம் நன்கொடையாக வழங்கி இருக்கிறார்.

அசீம் ப்ரேம்ஜி

தற்போது இந்த வரிசையில், இந்தியாவின் மிகப் பெரிய ஐடி நிறுவனங்களில் ஒன்றான விப்ரோவும் களம் இறங்கி இருக்கிறது. விப்ரோ நிறுவனம் மற்றும் அசீம் ப்ரேம்ஜி ஃபவுண்டேஷன் இணைந்து 1,125 கோடி ரூபாயை கொரோனா வைரஸுக்கு எதிரான போருக்குச் செலவழிக்க இருப்பதாகச் செய்திகள் வெளியாகி இருக்கின்றன.

மருத்துவம் & சேவை

இந்த பணம் மருத்துவர்கள் இந்த கொடிய கொரோனா வைரஸை எதிர்த்துப் போராட உதவும் எனச் சொல்லி இருக்கிறார்கள். சமூகத்தின் அடித் தட்டு மக்கள், இந்த கொரோனா வைரஸால் பல்வேறு வழிகளில் பாதிப்புக்கு உள்ளாகிறார்கள். இந்த பாதிப்பை குறைக்கவும் இந்த பணம் உதவும் என விப்ரோ & அசீம் ப்ரேம்ஜி ஃபவுண்டேஷன் சொல்லி இருக்கிறது.

கணக்கு

இந்த 1,125 கோடி ரூபாயில், 100 கோடி ரூபாயை விப்ரோ நிறுவனமும், 25 கோடி ரூபாயை விப்ரோ எண்டர்பிரைசஸ் நிறுவனமும் 1,000 கோடி ரூபாயை அசீம் ப்ரேம்ஜி ஃபவுண்டேஷனும் கொடுக்க இருக்கிறார்களாம். கார்ப்பரேட் நிறுவனங்கள் மற்றும் கார்ப்பரேட் பெருந்தலைகள் அள்ளிக் கொடுப்பதை மக்கள் மனதார பாராட்டிக் கொண்டு இருக்கிறார்கள்.