முக்கிய சேவையை மூடிய Xiaomi.. சீன நிறுவனம் தோல்வியா..?

சீன ஸ்மார்ட்போன் தயாரிப்பு நிறுவனமான சியோமி, இந்தியாவில் அதன் Mi Financial Services பிரிவை மொத்தமாக மூடுவதாக வெள்ளிக்கிழமை அறிவித்தது.

இந்திய வர்த்தகத்தின் மறுசீரமைப்பு மற்றும் மூலோபாய மதிப்பீட்டு நடவடிக்கையின் ஒரு பகுதியாக Mi Financial Services பிரிவை முழுமையாக மூட உள்ளது.

இதன் மூலம் நாட்டின் முக்கிய வணிகப் பிரிவுகளில் கூடுதல் கவனத்தைச் செலுத்த உள்ளதாக முடிவு எடுக்கப்பட்டுள்ளது.

சியோமி

சியோமி இந்தியாவில் தொடர்ந்து முன்னணி ஸ்மார்ட்போன் உற்பத்தி நிறுவனமாக இருக்கும் நிலையில், பிற தயாரிப்புகளையும் அதிகளவில் விற்பனை செய்து வருகிறது. இதனால் எலக்ட்ரானிக்ஸ் பொருட்கள் சந்தையில் சியோமி, ரெட்மி மிகப்பெரிய அளவிலான ஆதிக்கத்தைச் செலுத்தி வருகிறது.

டிஜிட்டல் வர்த்தகம்

இந்த நிலையில் கொரோனா காலகட்டத்தில் மத்திய அரசு இந்திய மக்களின் தனிநபர் தரவுகள் பாதுகாப்பிற்காகப் பல சீன செயலிகளைத் தடை செய்த நிலையில் சியோமி இதில் இருந்து பெரிய அளவில் தப்பித்தது. ஆனால் இந்தத் தடைக்குப் பின்பு சீன செயலிகள் மற்றும் டிஜிட்டல் வர்த்தகம் பெரிய அளவில் பாதிக்கப்பட்டது மறுக்க முடியாது.

Mi Pay சேவை மூடல்

இந்த நிலையில் சியோமி இந்தியாவில் 2019 இல் Mi Pay ஐ அறிமுகப்படுத்தியது. இந்தியாவில் வேகமாக வளர்ச்சி அடைந்து வரும் டிஜிட்டல் பேமெண்ட் சந்தையில் தானும் நுழைய வேண்டும் என்பதற்காக Mi Financial Services பிரிவு Mi Pay ஐ அறிமுகப்படுத்தியது, துவக்கத்தில் Mi Pay 20 மில்லியனுக்கும் அதிகமான பயனர்களைப் பெற்றது.

Mi கிரெடிட் சேவை

இந்த வெற்றியை தொடர்ந்து சியோமி நிறுவனம் Mi கிரெடிட் சேவையும் அறிமுகப்படுத்தியது, ஆனால் இதைப் பெரிய மற்றும் முக்கியமான வர்த்தகமாக மாற்ற முடியாத காரணத்தால் Xiaomi India எங்கள் முக்கிய வணிகச் சேவைகளில் கவனம் செலுத்துவதாக அறிவித்து வர்த்தகத்தை மூடியுள்ளது.

ரூ.125 கோடி கடன்

சியோமி நிறுவன தரவுகள் படி, நவம்பர் 2019 வரையிலான சோதனைக் கட்டத்தில் Mi கிரெடிட் மூலம் சுமார் 28 கோடி ரூபாய் அளவிலான தனிநபர் கடன்களை வழங்கியுள்ளது. இதைத் தொடர்ந்து டிசம்பர் 2019-ல் வெளியிட்ட அறிவிப்பில் ரூ.125 கோடி மதிப்புள்ள கடன்கள் வழங்கப்பட்டதாக அறிவித்தது.