சென்னை தொழிற்சாலை விரிவாக்கம்.. அதிரடி முடிவு எடுத்த ஜப்பான் நிறுவனம்..!!

இந்தியாவின் முக்கிய ஆட்டோமொபைல் உற்பத்தி ஹப் ஆக விளங்கும் சென்னை, உள்நாட்டுக்கு மட்டும் அல்லாமல் வெளிநாட்டு ஏற்றுமதிக்கும் அதிகளவில் உற்பத்தி செய்கிறது. இதேவேளையில் இந்தியாவிலும் சரி உலக நாடுகளிலும் சரி இரு சக்கர வாகனங்களுக்கான டிமாண்ட் அதிகரித்திருக்கும் வேளையில் தமிழ்நாட்டின் மூலம் இந்த டிமாண்ட்-ஐ பூர்த்தி செய்ய முடிவு செய்துள்ளது ஜப்பான் ஆட்டோமொபைல் நிறுவனமான யமஹா.

இந்திய யமஹா மோட்டார் (IYM) சென்னை அருகே உள்ள தனது தொழிற்சாலையில் இரு சக்கர வாகன உற்பத்தித் திறனை அதிகரிக்கத் திட்டமிட்டுள்ளது. ஜப்பான் ஆட்டோமொபைல் நிறுவனமான யமஹா அதன் விரிவாக்கத் திட்டத்தின் முன்-சாத்தியக்கூறு அறிக்கையை அதிகாரிகளிடம் சமர்ப்பித்துள்ளது, இதன் மூலம் தேவையான சுற்றுச்சூழல் அனுமதிகளைப் பெற்று விரிவாக்க பணிகளைத் துவங்க உள்ளது யமஹா.

யமஹா சமர்ப்பித்துள்ள pre-feasibility report-ன் படி, இந்நிறுவனம் சுமார் ரூ.180 கோடி முதலீடு செய்ய திட்டமிட்டுள்ளது, இந்த விரிவாக்கம் மூலம் சுமார் 400க்கும் மேற்பட்டோருக்கு புதிய வேலை வாய்ப்புகளை உருவாக்கும் என்று எதிர்பார்க்கப்படுகிறது.

யமஹா நிறுவனம் தனது உற்பத்தி தளத்தை உத்தரப் பிரதேசத்தின் சுராஜ்பூர் மற்றும் தமிழ்நாட்டின் வல்லம் வடகல் ஆகிய இடங்களில் வைத்துக்கொண்டு இயக்குகிறது. யமஹா நிறுவனம் தற்போது ஆண்டுக்கு 15 லட்சம் பைக்குகளையும், ஸ்கூட்டர்களையும் உற்பத்தி செய்யும் திறன் கொண்டுள்ளது.

சென்னை வல்லம் வடகல் பகுதியில் இருக்கும் யமஹா தொழிற்சாலை சுமார் 111 ஏக்கர் பரப்பளவில் அமைந்துள்ளது. இது 2015 ஆம் ஆண்டில் செயல்படத் தொடங்கிய நிலையில், தற்போது விரிவாக்கம் செய்ய முடிவு செய்துள்ளது.

இந்த விரிவாக்கம் மூலம் யமஹா நிறுவனம் கூடுதலாக மாதத்திற்கு 35,000 பைக்குகள் மற்றும் 45,000 ஸ்கூட்டர்களை உற்பத்தி செய்யும் திறனை அதிகரிக்கத் திட்டமிட்டுள்ளது. இந்த விரிவாக்கம் மூலம் சென்னை தொழிற்சாலை அளவை 1.5 லட்சம் சதுர மீட்டரிலிருந்து 1.7 லட்சம் சதுர மீட்டருக்கு அதிகரிக்கும்.

யமஹா நிறுவனத்திற்குத் தென்னிந்தியா சந்தை, குறிப்பாகச் சென்னை முக்கியமான சந்தையாகும், இந்நிறுவனத்தின் மொத்த விற்பனையில் சுமார் 30 சதவீதத்தைத் தென்னிந்தியா கொண்டுள்ளது. சென்னை தொழிற்சாலையில் மட்டும் சுமார் 4,743 பேர் வேலை பார்த்து வருகின்றனர். தற்போதைய விரிவாக்கம் மூலம் கூடுதலாக 431 பேருக்கு வேலைவாய்ப்புகள் கிடைக்க உள்ளது.