அடுத்த வேட்டைக்கு தயாரான Yamaha.. ஏற்றுமதியில் மெகா இலக்கு.. சென்னை ஆலைக்கு முக்கிய அந்தஸ்து..!!

ஜப்பானை தலைமையிடமாக கொண்ட யமஹா மோட்டார் கம்பெனி லிமிடெட் (Yamaha Motor Co., Ltd.) என்பது உலக அளவில் இரு சக்கர வாகன உற்பத்தி துறையில் ஒரு முன்னோடியாக விளங்கும் பன்னாட்டு நிறுவனமாகும். புகழ்பெற்ற இரண்டு சக்கர வாகன தயாரிப்பு நிறுவனமான யமஹா, இந்தியாவில் இருந்து உலகச் சந்தைகளுக்கான தனது ஏற்றுமதி இலக்கை இந்த ஆண்டு அதிரடியாக உயர்த்தியுள்ளது.

இந்த நிதியாண்டில் தனது ஏற்றுமதியை 25 சதவீதம் அதிகரிக்க போவதாக யமஹா நிறுவனம் அறிவித்துள்ளது. இந்த இலக்கை அடைய, யமஹா தனது சென்னை ஆலையை உலகளாவிய சந்தைகளுக்கான, குறிப்பாக வளர்ந்த நாடுகளான அமெரிக்கா, ஐரோப்பா மற்றும் ஜப்பான் ஆகிய நாடுகளுக்கான முக்கிய ஏற்றுமதி மையமாக மாற்றும் பெரிய திட்டத்தில் இறங்கியுள்ளது.

55 நாடுகளை தாண்டி புதிய சந்தைகள் : இது குறித்து யமஹா மோட்டார் இந்தியா குழுமத்தின் தலைவரான Itaru Otani பேசுகையில், "இந்தியாவில் இருந்து இந்த ஆண்டு ஏற்றுமதியில் 25 சதவீதம் என்ற மிகப்பெரிய வளர்ச்சியை அடைய நாங்கள் இலக்கு வைத்துள்ளோம்" என்று தெரிவித்தார். இதற்கு முந்தைய 2024-25 நிதியாண்டில், நிறுவனம் 33.4 சதவீதம் வளர்ச்சி கொண்டிருந்தது குறிப்பிடத்தக்கது.

தற்போது யமஹா நிறுவனம் இந்தியாவில் இருந்து சுமார் 55 நாடுகளுக்கு இரு சக்கர வாகனங்களை ஏற்றுமதி செய்து வருகிறது. இந்த எண்ணிக்கையை அதிகரிக்கவும், சர்வதேச அளவில் தனது வர்த்தகத்தை கூட்டவும், நிறுவனம் தொடர்ந்து புதிய சர்வதேச சந்தைகளை ஆராய்ந்து வருகிறது. எந்தெந்த நாடுகளில் தங்கள் தயாரிப்புகளுக்கான தேவை அதிகமாக இருக்கிறதோ, அங்கெல்லாம் கவனம் செலுத்தவும், குறிப்பாக வளர்ந்த நாடுகளை இலக்கு வைக்கவும் திட்டமிட்டுள்ளதாக நிறுவனம் கூறியுள்ளது.

சென்னை தொழிற்சாலைக்கு முக்கிய பங்கு : யமஹா நிறுவனத்தின் இந்த உலகளாவிய ஏற்றுமதி உத்தியில், தமிழ்நாட்டில் உள்ள சென்னை தொழிற்சாலைக்கு மிக முக்கியப் பங்கு வழங்கப்பட்டுள்ளது. சென்னை ஆலையை ஐரோப்பா, அமெரிக்கா மற்றும் ஜப்பான் போன்ற நாடுகளுக்கு வாகனங்களை அனுப்பும் பிரதான ஏற்றுமதி மையமாக மாற்றுவதுதான் யமஹாவின் நோக்கம்.

இந்த திட்டத்தின் முதல் கட்டமாக, கடந்த ஆண்டே ஐரோப்பாவுக்கு ஏற்றுமதியை வெற்றிகரமாக தொடங்கியுள்ளதாக ஓடானி குறிப்பிட்டார். இந்த வெற்றிக்குப் பிறகு, சென்னை ஆலையில் தொடர்ந்து முதலீடுகள் செய்யப்பட்டு வருகின்றன. FZ V4, Aerox 155, Fascino 125 Fi Hybrid போன்ற பிரபலமான மாடல்கள் சென்னை தொழிற்சாலையில் இருந்து வெளிநாடுகளுக்கு ஏற்றுமதி செய்யப்படுகின்றன. உலக தரத்துக்கு ஏற்ப உற்பத்தியை மேம்படுத்தி, அனைத்துலக சந்தைக்கான தேவையைப் பூர்த்தி செய்ய யமஹா தீவிரமாக தயாராகி வருகிறது.