ரஷ்யா-உக்ரைன் போருக்கு ஜெலன்ஸ்கியே பொறுப்பு.. டிரம்ப் வெளியிட்ட அதிர்ச்சி தகவல்.!!

உக்ரைன் - ரஷ்யா போர் மூன்று ஆண்டுகளாக நீடித்து வருகிறது. இந்த நிலையில், அமெரிக்காவின் அதிபர் வோலோடிமிர் ஜெலன்ஸ்கியை கடுமையாக விமர்சித்துள்ளார். போர் நீடிக்க காரணம் உக்ரைனே என்றும், ரஷ்யாவுடன் சமாதானம் பேசாமல் தவறு செய்துவிட்டதாகவும் அவர் தெரிவித்துள்ளார். மேலும், ரஷ்ய அதிபர் விளாடிமிர் புடினை விரைவில் சந்திக்கவுள்ளதாகவும் கூறியுள்ளார்.

மாரா-லாகோ எஸ்டேட்டில் செய்தியாளர்களை சந்தித்த டிரம்ப், உக்ரைன் போர் மூன்று ஆண்டுகளாக இருக்கிறது. இது முடிய வேண்டிய போர். ரஷ்யாவுடன் ஒரு நல்ல ஒப்பந்தம் செய்திருந்தால், போர் இப்போது இருந்திருக்காது என தெரிவித்துள்ளார். மேலும், ஜெலன்ஸ்கி ஒரு நல்ல பேச்சுவார்த்தையாளர் கிடையாது என்றும், அவர் தன் நாட்டிற்காக சரியான முடிவுகளை எடுக்கவில்லை என்றும் கூறியுள்ளார்.

டிரம்பின் இந்த கருத்துகள், சவூதி அரேபியாவில் நடைபெற்ற அமெரிக்கா-ரஷ்யாவின் ரகசிய பேச்சுவார்த்தைகளுக்குப் பிறகு வந்துள்ளன. இந்த பேச்சுவார்த்தையில் உக்ரைன் பங்கேற்கவில்லை. இதனால், உக்ரைன் மற்றும் ஐரோப்பிய தலைவர்கள் கவலை தெரிவித்துள்ளனர்.

இதற்கிடையில் டிரம்ப், உக்ரைனில் புதிய தேர்தல்களை நடத்த வேண்டும் என்று கூறியுள்ளார். உலகின் பல நாடுகளும் இதையே கேட்கின்றன. உக்ரைனில் சரியான நிர்வாகம் அமைய வேண்டும் என்று அவர் கூறினார். இதை ரஷ்யா மட்டும்தான் கோரிக்கையாக வைக்கவில்லை. பல நாடுகள் இதைப் பற்றிக் கவலைப்படுகின்றன என்றும் அவர் கூறினார்.ஆனால், ஜெலன்ஸ்கி இந்த கருத்தை எதிர்த்து பேசியுள்ளார். உக்ரைன் அரசியலுக்கு வெளிநாடுகள் தலையிடக்கூடாது. எந்த முடிவும் எங்கள் பின்னால் எடுக்க முடியாது என அவர் தெரிவித்தார்.

டிரம்பின் இந்த கருத்துகள் ஐரோப்பிய தலைவர்களிடையே அதிர்ச்சியை ஏற்படுத்தியுள்ளது. சில நாடுகள், குறிப்பாக பிரான்ஸ், உக்ரைனில் அமைதிப்படைகளை அனுப்புவதற்கான சாத்தியக்கூறுகளை ஆய்வு செய்து வருகின்றன. ஆனால், ஜெர்மனி உள்ளிட்ட சில நாடுகள் இதனை நிராகரித்துள்ளன. ஐரோப்பிய தலைவர்கள் தொடர்ந்து கலந்துரையாடி வருகின்றனர். இந்த விவகாரத்தில் அடுத்த கட்ட பேச்சுவார்த்தைகள் பிரான்சில் நடைபெறவுள்ளன.

எதிர்ப்புகளுக்கு மத்தியில், டிரம்ப் தன் முடிவுகளில் உறுதியாக இருக்கிறார். போரை முடிக்க தனக்கு நல்ல பேச்சுவார்த்தை திறன் இருப்பதாக அவர் கூறியுள்ளார். நான் விரைவில் விளாடிமிர் புடினை சந்திக்கப் போகிறேன். போருக்கு முடிவு காண ஒரு நல்ல வாய்ப்பு உள்ளது என அவர் தெரிவித்துள்ளார். இந்நிலையில், அமெரிக்கா, ரஷ்யா மற்றும் ஐரோப்பிய நாடுகள் பல்வேறு ஆலோசனைகளை மேற்கொண்டு வருகின்றன. ஆனால், உக்ரைனின் எதிர்காலம் அதனைச்சார்ந்த தலைவர்களின் முடிவுகளின் மீது தான் இருக்கிறது.