மாஸ் காட்டும் ZOHO ஸ்ரீதர் வேம்பு..!! தென்காசி கிராமத்தில் புது தொழிற்சாலை.. சொன்னதைச் செய்துவிட்டார்..!

தென்காசி: தமிழ்நாட்டு ஸ்டார்அப் துறையிலும், SAAS பிரிவில் முடிசூடா மன்னனாக இருக்கும் ஜோஹோ நிறுவனத்தின் நிறுவனரும், தலைமை செயல் அதிகாரியுமான ஸ்ரீதர் வேம்பு சமீபத்தில் மென்பொருள் சேவை அல்லாத பல துறையில் இறங்கி அசத்தி வருகிறார். அந்த வகையில் ஸ்ரீதர் வேம்பு முதலீட்டிலும், அவரது சொந்த பிரான்டிங் அறிமுகம் செய்யப்பட்டது தான் கருவி.

ஆம் தமிழ் பெயரில் பிராண்டிங்-ஐ உருவாக்கி இந்தியா முழுவதும் பவர் டூல்ஸ் பொருட்களை உற்பத்தி செய்யும் நிறுவனத்தைத் துவங்கினார். இதை வெறுமென அறிமுகம் செய்யாமல் பெரிய அளவில் விரிவாக்கம் செய்ய வேண்டும் என்ற முக்கிய இலக்குடன் பெரும் தொகையை முதலீடு செய்து தற்போது பவர் டூல்ஸ் செய்வதற்காகத் தனிப்பட்ட ஆலையைத் திறந்துள்ளதாகச் சனிக்கிழமை அறிவித்தார்.

தமிழ்நாட்டின் தென்காசி மாவட்டத்தில் ஸ்ரீதர் வேம்பு குடியேறியது மட்டும் அல்லாமல் தனது ZOHO நிறுவனத்தின் முக்கிய தலைமை அலுவலகத்திற்கு நிகரான CEO அலுவலகத்தை அமைத்தார். இதைத் தொடர்ந்து தென் தமிழ்நாட்டு மாவட்டத்தில் பல ZOHO கிளைகளைத் திறந்து அசத்திய ஸ்ரீதர் வேம்பு தற்போது கிராமப்புறங்களிலும், சிறு நகரங்களிலும் வேலைவாய்ப்புகளை உருவாக்கும் நோக்கில் தீவிரமாக செயல்பட்டு வருகிறார்.

இதன் ஒரு பகுதியாகக் கருவி பிராண்டுக்காக தென்காசி மாவட்டத்தின் சிறிய கிராமமான மாதாபுரத்தில் புதிய தொழிற்சாலை அமைந்துள்ளது. இது, மத்தளம்பாறை கிராமத்தில் உள்ள ஜோஹோ அலுவலகத்திற்கு அருகில் உள்ளது.

இதுகுறித்து ஸ்ரீதர் வேம்பு தனது சமூக வலைத்தள பக்கத்தில் கூறுகையில், சுற்றுவட்டார கிராமங்களைச் சேர்ந்த சுமார் 15 திறமையான இளைஞர்களுக்குப் பயிற்சி அளித்து, அவர்களை ஆலையில் பணியில் அமர்த்தியுள்ளோம். கிராமப்புற தொழிற்சாலைகளை ஊக்குவிப்பதற்கான ஒரு பெரிய கனவின் சிறிய தொடக்கம் இது என்று தெரிவித்துள்ளார்.

பவர் டூல்ஸ் தயாரிக்கும் கருவி நிறுவனம், துளையிடும் இயந்திரங்கள், angle grinders, power saw, என பல்வேறு வகையான 10 மின் கருவிகளை அறிமுகப்படுத்தியுள்ளது. கருவி நிறுவனத்தின் தயாரிப்புகள் சுமார் 95 சதவீதம் உள்ளூர் மூலப்பொருட்கள், உதிரிப்பாகங்களைப் பயன்படுத்தி உற்பத்தி செய்யப்படுகின்றன.

கருவி நிறுவனத்தின் தலைமை செயல் அதிகாரியான எம்.எஸ்.டி. பிரசாத் அவர்கள் கூறுகையில், "எங்களது தயாரிப்பு வகைகளை மேலும் விரிவுபடுத்தத் திட்டமிட்டுள்ளோம். 2025 ஆம் ஆண்டு இறுதிக்குள் குறைந்தது 30 தயாரிப்புகளை வழங்க இலக்கு வைத்துள்ளோம்" எனக் கூறியுள்ளார்.

ஜோஹோ நிறுவனம், சமீபத்தில் கருவி நிறுவனத்தைப் போல் தனது மென்பொருள் சேவைத் துறையைத் தாண்டி யாளி ஏரோஸ்பேஸ் என்ற விண்வெளித் துறை ஸ்டார்ட்அப் நிறுவனத்திலும் முதலீடு செய்துள்ளது குறிப்பிடத்தக்கது.