சொமேட்டோ அறிமுகப்படுத்தும் "டிஸ்ட்ரிக்ட்" அப்ளிகேஷன்.. அனைத்து பொழுதுபோக்கு சேவைகளும் ஒரே இடத்தில்!

உணவு விநியோகத் துறையின் முன்னணி நிறுவனமான சொமேட்டோ ஆப்பிள் ஐபோன் சாதனங்களில் மட்டும் பயன்படுத்தப்படும் புதிய அப்ளிகேஷனை அறிமுகப்படுத்தியுள்ளது. உணவு டெலிவரி, குவிக் காமர்ஸ் போன்ற சேவைகளை வழங்கும் இந்த நிறுவனம் தற்போது பொழுதுபோக்கு சேவைகளை வழங்கும் வகையில் "டிஸ்ட்ரிக்ட்" என்ற புதிய ஆப்பை அறிமுகம் செய்துள்ளது. ஆப்பிளின் ஆப் ஸ்டோர் தகவலின் படி டிஸ்ட்ரிக்ட் அப்ளிகேஷன் மூலம் டைனிங் சர்வீஸ், மூவிஸ், ஸ்போர்ட்ஸ் டிக்கெட், ஷாப்பிங் போன்ற அனைத்து சேவைகளையும் மக்கள் பெற முடியும்.

முன்னதாக பங்குதாரர்களுக்கு எழுதிய கடிதத்தில் சொமேட்டோ நிறுவனத்தின் தலைமை நிர்வாக அதிகாரியான தீபிந்தர் கோயல் புதிய அப்ளிகேஷன் அடுத்த 4 வாரங்களுக்குள் வெளியாகும் என்று கூறியிருந்தார்.

சொமேட்டோ டிஸ்ட்ரிக்ட் ஆப் என்றால் என்ன?: சொமேட்டோ டிஸ்ட்ரிக்ட் அப்ளிகேஷன் மூலம் உணவகங்கள், திரைப்பட டிக்கெட் புக்கிங், விளையாட்டு போட்டிகளுக்கான டிக்கெட் புக்கிங், நேரலை நிகழ்வுகள், ஷாப்பிங் மற்றும் தங்குமிடங்களுக்கான புக்கிங் போன்ற பல சேவைகளை ஒரே இடத்தில் பெற முடியும்.

இதன் விளைவாக வாடிக்கையாளர்கள் வெவ்வேறு அப்ளிகேஷன்களை பயன்படுத்த வேண்டிய அவசியம் இருக்காது. வெளியே செல்ல விரும்பும் வாடிக்கையாளர்கள் ஒரே இடத்தில் அனைத்து சேவையையும் பெறுவதற்காக சொமேட்டோ டிஸ்ட்ரிக்ட் அப்ளிகேஷன் வடிவமைக்கப்பட்டுள்ளது. உணவகங்கள், திரைப்படங்கள், நேரலை நிகழ்வுகளுக்கான டிக்கெட்களை எளிதில் பயனர்கள் முன்பதிவு செய்யலாம்.

இன்றைய வேகமான உலகில் பலரும் பணிக்கு சென்று விட்டு, வார இறுதி நாட்களில் வெளியில் சென்று குடும்பத்துடன் கழித்து வருகின்றனர். அதற்கு ஏதுவாக டிஸ்ட்ரிக்ட் அப்ளிகேஷன் அறிமுகப்படுத்தப்பட்டுள்ளது. இதன் மூலம் அனைத்து விதமான பொழுதுபோக்கு சேவைகளையும் ஒரு சில கிளிக்குகளில் பெற முடியும்.

சமூக ஊடகத் தளங்கள் வழியாக டிஸ்ட்ரிக்ட் அப்ளிகேஷனின் அறிமுகத்தை வெளியிட்ட தீபிந்தர் கோயல் உணவு விநியோகம் மட்டுமின்றி பிற சேவைகளை வழங்குவதிலும் நிறுவனம் கவனம் செலுத்துவதாக கூறினார்.

சொமேட்டோவின் Q2 காலாண்டுக்கான நிதிநிலை முடிவுகள்: 2025 நிதியாண்டின் 2-வது காலாண்டில் சொமேட்டோ நிறுவனம் அதன் செயல்பாடுகளின் மூலம் ரூ.4,799 கோடி வருவாய் ஈட்டியுள்ளது. இது 2024-ஆம் நிதியாண்டின் 2-வது காலாண்டில் ரூ.2,848 கோடியாக இருந்தது. மேலும் இந்த காலாண்டில் நிறுவனத்தின் மொத்த செலவுகள் ரூ.4783 கோடி. இது ஒரு வருடத்திற்கு முன்பு, அதாவது கடந்த நிதியாண்டின் 2-வது காலாண்டில் ரூ.3,039 கோடியாக இருந்தது.