வீடியோ போட்டு வாங்கிக் கட்டிக்கொண்ட Zomato.. டிவிட்டரில் வறுத்தெடுக்கும் நெட்டிசன்கள்..!

இந்தியாவில் முன்னணி டிஜிட்டல் சேவை நிறுவனங்கள் செய்யும் விளம்பரம் அவ்வப்போது மக்கள் மத்தியில் கோபத்தை ஏற்படுத்துகிறது, சில நாட்களுக்கு முன்பு ஹோலி பண்டிகைக்குச் செய்யப்பட்ட ஸ்விக்கி விளம்பரம் பெரிய அதிர்வை ஏற்படுத்தியது. இதை தொடர்ந்து சோமேட்டோ பதிவிட்ட ஒரு வீடியோ டிவிட்டரில் பல ஆயிரம் மக்களைக் கோபப்படுத்தியுள்ளது.

சோமேட்டோ நிறுவனம் சமுக வலைத்தள பக்கத்தில் Kachra என்ற தலைப்பில் உலக சுற்றுச்சூழல் தினத்தில் ஒரு வீடியோ பதிவிட்டு இருந்தது. இந்த வீடியோவில் பாலிவுட்-ல் மிகவும் புகழ்பெற்ற லகான் படத்தில் Kachra எனப் பெயர் கொண்ட ஒரு தலித் கதாபாத்திரம் இருக்கும். இந்த கதாபாத்திரத்தில் நடித்தவரையே சோமேட்டோ தனது Kachra (குப்பை எனப் பொருள்) வீடியோவில் நடிக்க வைத்திருந்தது.

சோமேட்டோ குப்பைகளை மறுசுழற்சி செய்வதன் மூலம் பல புதிய விஷயங்களை உருவாக்க முடியும் என்பதை மைய கருத்தாக வைத்து உலக சுற்றுச்சூழல் தினத்திற்காக இந்த வீடியோவை உருவாக்கியது. லகான் பட கதாபாத்திரத்தில் நடித்தவரை குப்பை என்ற பொருள் கொண்ட வீடியோவில் நடிக்க வைத்தது பெரும் குற்றமாக பார்க்கப்படுகிறது.

இதைத் தொடர்ந்து மக்கள் மத்தியில் சோமேட்டோ சாதிய ரீதியில் இழிவுபடுத்தியுள்ளது என கடுமையாக விமர்சனம் செய்யப்பட்டு #BoycottZomato என்ற ஹேஷ்டேக் உருவாகும் அளவுக்குப் பிரச்சனை பெரிதானது.

இதைத் தொடர்ந்து சோமேட்டோ இந்த வீடியோவுக்கு மன்னிப்பு கேட்டு விளக்கம் கொடுத்தது மட்டும் அல்லாமல் இந்த வீடியோவையும் நீக்கியுள்ளது. ஆனாலும் டிவிட்டரில் இந்த வீடியோ, மக்களின் கருத்து, வீடியோவின் புகைப்படங்கள் என குவிந்துக்கிடக்கிறது.

ஆனால் இந்த விளம்பரத்தில் பயன்படுத்திய கதாபாத்திரம், சொற்கள் ஆகியவற்றின் உள் பொருளைத் தெரியாமல் உருவாக்கியதன் மூலம் தற்போது பெரும் பிரச்சனையில் சிக்கியுள்ளது. சோமேட்டோ இந்த வீடியோவை நீக்கினாலும் டிவிட்டரில் சிலர் பதிவிட்டு உள்ளனர்.