வீடு வாங்கப் போறீங்களா..? எஸ்பிஐ உங்களுக்கு ஒரு நல்ல செய்தி சொல்லப் போறாங்களாம்..! அது என்ன..?

குறைப்பு

கடந்த ஜூலை 2019-ல் தான் இந்தியாவின் மிகப் பெரிய வங்கியான எஸ்பிஐ மத்திய ரிசர்வ் வங்கியின் ரெப்போ ரேட் வட்டி விகிதத்தின் அடிப்படையில் வீட்டுக் கடன்களைக் கொடுக்கத் தொடங்கியது. ஆக புதிதாக ஜூலை 2019-க்குப் பிறகு வீட்டுக் கடன் வாங்குபவர்களுக்கு மட்டுமே ஆர்பிஐயின் ரெப்போ ரேட் அடிப்படையிலான வட்டி விகிதத்தில் கடன்கள் கிடைத்தன. ஜூலை 2019-க்கு முன் வீட்டுக் கடன் வாங்கியவர்களுக்கு ஆர்பிஐயின் ரெப்போ ரேட் வட்டி விகிதத்தில் கடன்கள் கிடைக்கவில்லை.

ஆலோசனை

தற்போது ஜூலை 2019-க்கு முன் எஸ்பிஐ வங்கியில் வீட்டுக் கடன் வாங்கி இருந்தவர்களுக்கும், ஆர்பிஐ ரெப்போ ரேட் வட்டி விகிதத்தின் அடிப்படையில் வீட்டுக் கடனுக்கான வட்டியை குறைக்க ஆலோசித்து வருவதாக எஸ்பிஐ வங்கியின் தலைவர் ரஜ்னேஷ் குமார் சொல்லி இருக்கிறார். இப்படி ஜூலை 2019-க்கு முன்பே கடன் வாங்கியவர்களுக்கு ஆர்பிஐ ரெப்போ ரேட் வட்டி விகிதப் படி வீட்டுக் கடனுக்கான வட்டி விகிதத்தைக் கணக்கிட்டால் சுமார் 0.30% முதல் 0.70% வரை வட்டி குறையுமாம்.

கணக்கு

தற்போது ஆர்பிஐ ரெப்போ ரேட் வட்டி விகிதம் 5.40 சதவிகிதமாக இருக்கிறது. அதோடு 2.25 சதவிகிதம் கூடுதல் வட்டி கணக்கிட்டால் 7.65 சதவிகிதம். இது தான் ரெப்போ வட்டி விகித அடிப்படையில் வரும் வட்டி. இதன் மீது 0.40% முதல் 0.55 சதவிகிதம் வரை கூடுதல் வட்டியை வைத்துக் கணக்கிட்டால் 8.05 முதல் 8.20 சதவிகிதம் வரை வட்டி வருகிறது. எஸ்பிஐ வங்கி, ரெப்போ ரேட் அடிப்படையிலான வட்டி விகிதத்தை அனைத்து வீட்டுக் கடன் வாடிக்கையாளர்களுக்கும் அமல்படுத்தினால் சுமாராக 8.05% முதல் 8.20%-க்குள் வீட்டுக் கடன் வாங்கலாம்.

தற்போதைய நிலை

ஜூலை 2019-க்கு முன், 75 லட்சம் ரூபாய்க்குள் வாங்கிய வீட்டுக் கடன்களுக்கு, எஸ்பிஐ வங்கி, தன் வாடிக்கையாளர்களுக்கு 8.35 சதவிகிதம் முதல் 8.90 சதவிகிதம் வரை வீட்டுக் கடனுக்கு வட்டி வசூலித்து வருகிறார்கள். இது முந்தைய மார்ஜினல் காஸ்ட் ஆஃப் ஃபண்ட்ஸ் பேஸ்ட் லெண்டிங் ரேட் (MCLR - Marginal Cost of Funds Based Lending Rate) அடிப்படையில் கணக்கிடப்பட்டவை. கடந்த பிப்ரவரி 2019-ல் இந்த எம் சி எல் ஆர் வட்டி விகிதமும் 0.30 சதவிகிதம் வரை குறைக்கப்பட்டது.