கனரா வங்கி வாடிக்கையாளர்கள் அதிர்ச்சி.. பிக்சட் டெபாசிட், சேமிப்புக் கணக்கு வட்டியில் மாற்றம்!

பொதுத்துறை வங்கிகளில் ஒன்றான கனரா வங்கி, தனது வாடிக்கையாளர்களுக்கான நிலையான வைப்பு நிதி (FD) மற்றும் சேமிப்புக் கணக்கு வட்டி விகிதங்களை மாற்றியமைத்துள்ளது. புதிய விகிதங்கள் ஆகஸ்ட் 7, 2025 முதல் அமலுக்கு வந்துள்ளன. இந்த மாற்றம் பொது வாடிக்கையாளர்கள் மற்றும் மூத்த குடிமக்கள் என இரு தரப்பினருக்கும் பொருந்தும்.

பிக்சட் டெபாசிட் மற்றும் சேமிப்புக் கணக்கு வட்டி விகிதங்கள்: கனரா வங்கியின் அறிவிப்பின்படி, ரூ.3 கோடிக்கும் குறைவான நிலையான வைப்புகளுக்கு, பொது வாடிக்கையாளர்களுக்கு 3.25% முதல் 6.50% வரை வட்டி விகிதங்கள் வழங்கப்படும். இதில், 444 நாட்கள் தவணைக்காலம் கொண்ட FD-களுக்கு அதிகபட்சமாக 6.5% வட்டி கிடைக்கும். மூத்த குடிமக்களைப் பொறுத்தவரை, அவர்களுக்குச் சிறப்புக் கவனம் அளிக்கப்பட்டு, வட்டி விகிதங்கள் 3.25% முதல் 7% வரை உள்ளன. மூத்த குடிமக்களுக்கான 444 நாட்கள் கால அவகாச FD-களுக்கு 7% என்ற அதிகபட்ச வட்டி விகிதம் வழங்கப்படுகிறது.

வங்கியின் சேமிப்புக் கணக்கு வட்டி விகிதங்களும் மாற்றியமைக்கப்பட்டுள்ளன. முன்னர் 2.70% முதல் 4% வரை இருந்த சேமிப்புக் கணக்கு விகிதங்கள், தற்போது 2.55% முதல் 4% வரை எனத் திருத்தப்பட்டுள்ளன.

ஏன் இந்த மாற்றம்?: இந்த ஆண்டு தொடக்கம் முதல் இந்திய ரிசர்வ் வங்கி (RBI), ரெப்போ விகிதத்தை 100 அடிப்படைப் புள்ளிகள் குறைத்ததன் காரணமாக வங்கிகள் தங்கள் வட்டி விகிதங்களைக் குறைத்து வருகின்றன. கடந்த ஆகஸ்ட் 6 அன்று ரிசர்வ் வங்கி ரெப்போ விகிதத்தை 5.5% என்ற நிலையில் மாற்றாமல் வைத்திருந்தபோதிலும், கனரா வங்கி இந்த விகித மாற்றத்தை அறிவித்துள்ளது. பொதுவாக, ரிசர்வ் வங்கி ரெப்போ விகிதத்தைக் குறைக்கும்போது, கடன் வாங்குபவர்களுக்கு EMI-கள் குறைகின்றன. ஆனால், சேமிப்புக் கணக்கு மற்றும் FD-களில் முதலீடு செய்பவர்களுக்கு வருமானம் குறைந்து விடுகிறது.

சேமிப்புக் கணக்கு மற்றும் நிலையான வைப்பு நிதி வருமானங்கள் குறைந்து வரும் சூழ்நிலையில், முதலீட்டாளர்கள் பணவீக்கத்தை வெல்லும் சிறந்த முதலீட்டு வழிகளைத் தேடுவது அவசியமாகிறது. அவசரகாலத் தேவைகளுக்காகச் சேமிப்புக் கணக்கில் ஒரு குறிப்பிட்ட தொகையை வைத்திருந்தாலும், நீண்ட கால முதலீட்டுக்கு அதிக வருமானம் ஈட்டும் மியூச்சுவல் ஃபண்டுகள் போன்ற திட்டங்களில் முதலீடு செய்வது புத்திசாலித்தனமானது என நிதி வல்லுநர்கள் அறிவுறுத்துகின்றனர்.