ரூ.5,000 முதலீட்டுக்கு ரூ.8 லட்சம் உறுதி.. சிறு முதலீட்டுக்கு பெத்த லாபம் வழங்கும் அரசு திட்டம்!

போஸ்ட் ஆபீஸ் திட்டங்கள் முதலீட்டாளர்களுக்கு வழங்கும் நன்மை குறித்த பல்வேறு பதிவுகளில் பார்த்தோம். இந்தப் பதிவிலும் ஒரு போஸ்ட் ஆபீஸ் திட்டத்தை பற்றி தான் பார்க்கவுள்ளோம். பெரும்பாலும் போஸ்ட் ஆபீஸ் திட்டங்களை மக்கள் நாடுவதற்கு காரணம் அரசாங்கத் திட்டங்கள் என்பதால் தங்களுடைய வருமானம் பாதுகாக்கப்படும் என்ற காரணத்திற்காக மட்டுமே. மியூச்சுவல் ஃபண்ட் திட்டங்கள் குறுகிய காலத்தில் நிறைந்த வருமானத்தை வழங்கினாலும், அவற்றின் அபாயம் சற்று அதிகமாகவே உள்ளது. இதன் காரணமாக பழமைவாத முதலீட்டாளர்களின் விருப்ப தேர்வு தபால் அலுவலக திட்டங்கள் தான்.

இந்த பதிவில் போஸ்ட் ஆபீஸ் திட்டத்தில் 5000 ரூபாய் முதலீடு செய்தால் எவ்வளவு வருமானம் கிடைக்கும் என்பது குறித்து பார்ப்போம்.

ரெக்கர்ரிங் டெபாசிட் என்று சொல்லப்படுகிற RD திட்டம் மாதம் மாதம் முதலீடு செய்ய ஏற்ற திட்டம் ஆகும். அனைவராலும் ஒட்டுமொத்தமாக முதலீடு செய்ய முடியாது. சிறு தொகையாக முதலீடு செய்ய விரும்பும் நபர்கள் RD திட்டத்தை தேர்வு செய்யலாம். இந்த திட்டத்திற்கு தற்போது 6.7 சதவீத வட்டி விகிதம் வழங்கப்படுகிறது. RD திட்டம் எளிதாக வருமானம் பெற உதவுவதோடு.. கடன் பெரும் அம்சத்தோடு வருகிறது.

போஸ்ட் ஆபீஸ் RD திட்டத்தில் 5,000 ரூபாய் சேமித்தால் எவ்வளவு லாபம் கிடைக்கும்?: போஸ்ட் ஆபீஸ் RD திட்டத்தில் மாதமாதம் 5,000 ரூபாய் என்ற வீதத்தில் டெபாசிட் செய்கிறீர்கள் என்று வைத்துக் கொள்வோம். அப்படியானால் 5 வருடம் கழித்து மொத்தமாக 3 லட்ச ரூபாயை முதலீடு செய்திருப்பீர்கள். போஸ்ட் ஆபீஸ் RD திட்டத்தின் முதிர்வு காலம் 5 ஆண்டுகள்.

போஸ்ட் ஆபீஸ்களில் வழங்கப்படும் வெவ்வேறு திட்டங்களுக்கும் வெவ்வேறு முதிர்வு காலம் உண்டு. அந்த குறிப்பிட்ட காலம் வரை நீங்கள் தொடர்ந்து முதலீடு செய்ய வேண்டும். RD திட்டத்திற்கு மாதம் மாதம் பணம் செலுத்த வேண்டும். மாத சம்பளக்காரர்களுக்கு இந்த திட்டம் ஏற்றது. தொடர்ந்து 5 ஆண்டுகளுக்கு 5000 என்ற விதத்தில் முதலீடு செய்தால் 6.7 சதவீத வட்டி விகிதத்தில் வட்டி வருமானமாக 56,830 ரூபாய் கிடைக்கும். இதன் மூலம் 5 வருடம் கழித்து மொத்த முதிர்வு தொகையாக 3,56,830 ரூபாயாக பெற்றுக்கொள்ளலாம்.

அதுவே உங்களுடைய முதலீட்டை மேலும் 5 ஆண்டுகளுக்கு நீடித்தால் லாபம் இன்னும் அதிகரிக்கும். அப்படியானால் தொடர்ந்து 10 ஆண்டுகளுக்கு மாதம் ரூ. 5000 செலுத்த வேண்டும். இப்படி செய்தால் முதல் 5 ஆண்டுகளுக்கு ரூ.3 லட்சமும், இன்னொரு 5 ஆண்டுகளுக்கு ரூ.3 லட்சம் என ரூ.6 லட்சத்தை முதலீடு செய்திருப்பீர்கள்.

இதற்கு வருமானமாக 2,54,272 ரூபாய் கிடைக்கும். இதன் மூலம் மொத்த முதிர்வு தொகை 8,54,272 ரூபாயை பெற்றுக் கொள்ளலாம். தபால் அலுவலக RD திட்டத்திற்கு கடன் வசதியும் வழங்கப்படுகிறது. கணக்கு வைத்திருப்பவர்கள் 1 வருடத்திற்கு பிறகு நீங்கள் டெபாசிட் செய்த தொகையில் 50 சதவீதம் வரை கடன் பெறலாம். கடனுக்கான வட்டி விகிதம் RD திட்டத்திற்கு வழங்கப்படும் வட்டி விகிதத்தை விட 2 சதவீதம் அதிகம். ஏதேனும் அவசர நிலை ஏற்பட்டால் இந்த கடனைப் பயன்படுத்தி பலனடையலாம்.

குறைந்தபட்ச முதலீடு: நீங்கள் மாதம் 5000 தான் முதலீடு செய்ய வேண்டும் என்றெல்லாம் கிடையாது. உங்களால் இயன்ற தொகையை முதலீடு செய்யலாம். 100 ரூபாய் முதல் கணக்கு தொடங்க முடியும். அதிகபட்ச வரம்பு இந்தத் திட்டத்திற்கு கிடையாது. நீங்கள் எவ்வளவு வேண்டுமானாலும் முதலீடு செய்யலாம்.