எஸ்பிஐ வைப்பு நிதி மீதான வட்டி குறைப்பு.. புதிய விகிதங்கள் இதோ..!

ஸ்டேட் பேங்க் ஆப் இந்தியா வைப்பு நிதிக்கான வட்டி விகிதத்தினை 40 அடிப்படை புள்ளிகள் வரை குறைத்துள்ளது. இவ்வாறு குறைக்கப்பட்டுள்ள இந்த வட்டி விகிதங்கள் மே 27 முதல் நடைமுறைக்கு வந்துள்ளது.

பொதுத்துறை கடன் வழங்குனரான எஸ்பிஐ இந்த மாதத்திலேயே இரண்டாவது முறையாக வட்டி குறைப்பு செய்துள்ளது.

பொது மக்களுக்கான புதிய வட்டி விகிதம்

7 முதல் 45 நாட்கள் வரையிலான வைப்பு தொகைக்கு- 2.9%
46 நாட்கள் முதல் 179 நாட்கள் வரையிலான வைப்பு தொகைக்கு- 3.9%
180 நாட்கள் முதல் 210 நாட்கள் வரையில்- 4.4%
211 நாட்கள் முதல் 1 வருடத்துக்கும் குறைவான வைப்புத் தொகைக்கு- 4.4%
1 வருடம் முதல் 2 வருடத்துக்குள் - 5.1%
2 வருடம் முதல் 3 வருடத்துக்குள்- 5.1%
3 வருடம் முதல் 5 வருடத்துக்குள்- 5.3%
5 வருடம் முதல் 10 வருடம் வரையில்- 5.4%

மூத்த குடிமக்களுக்கு வட்டி விகிதம்

7 முதல் 45 நாட்கள் வரையிலான வைப்பு தொகைக்கு- 3.4%
46 நாட்கள் முதல் 179 நாட்கள் வரையிலான வைப்பு தொகைக்கு- 4.4%
180 நாட்கள் முதல் 210 நாட்கள் வரையில்- 4.49%
211 நாட்கள் முதல் 1 வருடத்துக்கும் குறைவான வைப்புத் தொகைக்கு- 4.9%
1 வருடம் முதல் 2 வருடத்துக்குள் - 5.6%
2 வருடம் முதல் 3 வருடத்துக்குள்- 5.6%
3 வருடம் முதல் 5 வருடத்துக்குள்- 5.8%
5 வருடம் முதல் 10 வருடம் வரையில்- 6.2%

முன்னதாக கடந்த மே 12 அன்று வைப்பு நிதிகளுக்கான வட்டி விகிதம் 20 அடிப்படை புள்ளிகள் வரை குறைக்கப்பட்டது.

இந்த நிலையில் கடந்த மே 22 அன்று ரெபோ விகிதத்தினை 40 அடிப்படை புள்ளிகள் குறைத்தது. கொரோனா தொற்று நோயின் காரணமாக ரிசர்வ் வங்கியின் அறிவிப்புகள் சரியான நேரத்தில் தான் வந்துள்ளதாக எஸ்பிஐ தலைவர் ரஜ்னிஷ் குமார் சில தினங்களுக்கு முன்பு கூறியிருந்தார். இதனால் கடன்களுக்கான வட்டி குறையும். இது பொருளாதாரத்தினை ஆதரிப்பதற்கான பொருத்தமான நடவடிக்கை தான் என்றும் கூறியிருந்தார்.

எனினும் இதன் மூலம் வைப்பு நிதியாளர்களுக்கான வட்டி விகிதம் குறைந்தாலும், மூத்த குடிமக்களுக்கான வீகேர் டெபாசிட் திட்டம் கைகொடுக்கும். ஏனெனில் எஸ்பிஐ வங்கியின் பொதுவான ஃபிக்சட் டெபாசிட் திட்டங்களுடன் ஒப்பிடும் போது, எஸ்பிஐ வீ கேர் திட்டத்தில் முதலீடு செய்யும் மூத்த குடி மக்களுக்குக் கூடுதலாக 0.30 சதவீதம் வரை லாபம் கிடைக்கும்.
5 வருடங்கள் அல்லது அதற்கும் அதிகமான டெர்ம் டெபாசிட் திட்டத்தில் முத்த குடிமக்கள் முதலீடு செய்யும் போது கூடுதலாக 0.80 சதவீதம் வரை லாபம் அளிக்கும்.

எஸ்பிஐ வீ கேர் டெபாசிட் திட்டத்தில் முதலீடு செய்யும் போது 6.50 சதவீதம் வரை முத்த குடிமக்களுக்கு லாபம் கிடைக்கும். எனினும் முதிர்வு காலம் முன்பே முதலீட்டிலிருந்து வெளியேறினால் வட்டி விகிதம் குறைய வாய்ப்பு உண்டு. ஆக இந்த வட்டி குறைப்பானது மூத்த குடிமக்களுக்கு பெரிதாக பாதிப்பினை ஏற்படுத்த வாய்ப்பில்லை.