அதிக லாபத்தை வழங்கும் ஸ்பெஷல் FD திட்டம்.. மீண்டும் காலக்கெடுவை நீட்டித்த SBI..!!

எஸ்பிஐ சிறப்பு நிலையான வைப்புத் திட்டத்தின் காலக்கெடுவை நீட்டித்துள்ளது. அதிக வட்டி விகிதத்தை வழங்கும் இந்தத் திட்டத்தில் மார்ச் 31, 2025 வரை டெபாசிட் செய்யலாம் என வங்கி அறிவித்துள்ளது.

நாட்டின் முன்னணி பொதுத்துறை வங்கியான பாரத ஸ்டேட் வங்கி (எஸ்பிஐ) தனது வாடிக்கையாளர்களுக்கு மகிழ்ச்சி செய்தியை அறிவித்துள்ளது. அதில், எஸ்பிஐ அம்ரித் கலாஷ் என்ற அதிக வட்டி விகிதத்தை வழங்கும் சிறப்பு நிலையான வைப்புத் திட்டமானது, காலக்கெடுவை மீண்டும் நீட்டித்துள்ளது.

இந்த திட்டம் செப்டம்பர் 30 ஆம் தேதியுடன் முடிவடைந்தது. ஆனால் வாடிக்கையாளர்களுக்கு மற்றொரு வாய்ப்பு அளிக்கும் நோக்கத்துடன், மார்ச் 31, 2025 வரை காலக்கெடு நீட்டிக்கப்படுகிறது என்று வங்கி அதிகாரப்பூர்வ அறிக்கையில் தெரிவித்துள்ளது. அதிக வட்டி பலன் பெற விரும்புவோர் இந்த திட்டத்தில் சேர்ந்து வாய்ப்பை பயன்படுத்திக் கொள்ளலாம்.

எஸ்பிஐ அம்ரித் கலாஷ் திட்டத்தின் காலம் 400 நாட்கள் ஆகும். இதன் அதிகபட்ச வட்டி விகிதம் 7.10 சதவீதம் ஆக உள்ளது. எஸ்பிஐயில் குறைந்த கால அவகாசத்துடன் கூடிய அதிக வட்டி விகிதத்துடன் கூடிய திட்டமும் இதுதான். மூத்த குடிமக்கள் 7.60 சதவீதம் வட்டி விகிதம் அதாவது 0.50 சதவீதம் அதிகம் பெறுகின்றனர்.

SBI FD விகிதங்கள்:தற்போது, ​​எஸ்பிஐயில் நிலையான வைப்பு வட்டி விகிதங்கள் பொது வாடிக்கையாளர்களுக்கு 3.50 சதவீதம் முதல் 7 சதவீதம் வரை உள்ளது. இதற்கு, மூத்த குடிமக்கள் 7.6 சதவீதம் வரை வட்டி விகிதத்தைப் பெறுவார்கள்.

இரண்டு முதல் மூன்று ஆண்டுகளில் முதிர்ச்சியடையும் நிலையான வைப்புகளுக்கு எஸ்பிஐ அதிகபட்சமாக 7 சதவீத வட்டி விகிதத்தை வழங்குகிறது. அதே மூத்த குடிமக்களுக்கு வட்டி விகிதம் 7.50 சதவீதம் வட்டி வழங்கப்படுகிறது.

மூன்று முதல் ஐந்து ஆண்டுகள் வரையிலான வைப்புத்தொகைக்கான வட்டி விகிதம் பொதுக் குடிமக்களுக்கு 6.75 சதவீதமும் மூத்த குடிமக்களுக்கு 7.25 சதவீதமும் ஆகும்.

5-10 வருட கால டெபாசிட்டுகள் 6.5 சதவீத வட்டி விகிதத்தைக் கொண்டுள்ளன. மூத்த குடிமக்களுக்கு, 7.50 சதவீத வட்டி வழங்கப்படுகிறது.

மேலும் 7 நாட்கள் முதல் 75 நாட்கள் வரையிலான டெபாசிட்டுகளுக்கான வட்டி விகிதம் 3.5 சதவீதம் ஆகும். மூத்த குடிமக்களுக்கு இது 4 சதவீதம் ஆக உள்ளது. இது வங்கியின் ஆரம்ப வட்டி விகிதங்கள் ஆகும். அதேபோல், 46 நாட்கள் முதல் 179 நாட்கள் வரையிலான காலத்திற்கு சாதாரண மக்களுக்கு 5.5 சதவீதமும், மூத்த குடிமக்களுக்கு 6 சதவீதமும் வட்டி விகிதத்தை வழங்குகிறது.

அதுவே, ஒன்று முதல் இரண்டு ஆண்டுகளுக்கு குறைவாக இருந்தால் பொது குடிமக்களுக்கு 6.8 சதவீதமும், மூத்த குடிமக்களுக்கு 7.3 சதவீதமும் வழங்கப்படுகிறது.