இந்த 5 பண பரிவர்த்தனைகள் செய்தீர்களா? பிரச்சனை வரப்போகுது.. வருமான வரித்துறை உங்களை தான் கவனிக்கிறது

நம் நாட்டில் வருமான வரி (Income Tax) என்பது அரசு வருவாயின் முக்கியமான ஆதாரமாகும். அதனாலேயே, வருமானத்தை முறைப்படி அறிவிப்பது, தேவையான வரிகளை செலுத்துவது என்பது ஒவ்வொரு குடிமகனும் கடைபிடிக்க வேண்டிய கடமை. தற்போது டிஜிட்டல் பரிவர்த்தனைகள் அதிகரித்துள்ள சூழலில், வருமான வரித் துறை பலவிதமான நவீன கருவிகளைப் பயன்படுத்தி, உங்களின் வருமானம், செலவுகள் மற்றும் முதலீடுகள் அனைத்தையும் கண்காணிக்க ஆரம்பித்துள்ளது.

பலர் நினைப்பது போல யுபிஐ, கிரெடிட் கார்டு அல்லது ஆன்லைன் மூலமான செலவுகள் கண்காணிக்கப் படுவதில்லை என்பதெல்லாம் தவறான நம்பிக்கைகள். உண்மையில் வங்கிகள் மற்றும் நிதி நிறுவனங்கள், ஒரு குறிப்பிட்ட அளவைக் கடந்த பணப் பரிவர்த்தனைகளை நேரடியாக வரித்துறைக்கு தெரிவிக்க வேண்டும்.

ரொக்கமாக ரூ.10 லட்சம் அல்லது அதற்கு மேல் சேமிப்புக் கணக்கில் வைப்பு: ஒரே வருடத்தில் (ஏப்ரல் 1 முதல் மார்ச் 31 வரை) நீங்கள் ரூ.10 லட்சம் அல்லது அதற்கு மேல் பணத்தை ரொக்கமாக உங்கள் சேமிப்புக் கணக்கில் டெபாசிட் செய்தால், இது வரித்துறையின் கவனத்திற்கு வரும். ஒரு கணக்காக இருந்தாலும் சரி, பல கணக்குகளில் பிரித்துப் போட்டாலும் சரி - மொத்தம் 10 லட்சத்தை தாண்டினால் வங்கி அந்த விவரங்களை துறைக்கு தெரிவிக்க வேண்டும்.

இதற்காக நீங்கள் ஏதாவது தவறு செய்திருக்க வேண்டியதில்லை. ஆனால் அந்த பணம் எங்கு இருந்து வந்தது என்பதை வரித்துறைக்கு விளக்க வேண்டும். உங்கள் விளக்கம் உங்களின் வருமானத்துடன் பொருந்தவில்லை என்றால், அபராதமும் விதிக்கப்படலாம்.

ரொக்கமாக நிதி நிறுவனங்களில் எஃப்.டி. (FD) செய்வது: இப்போது நிலையான வைப்பு விகிதங்கள் (Fixed Deposit Rates) அதிகரித்துள்ளதால் மக்கள் அதில் முதலீடு செய்கின்றனர். ஆனால், நீங்கள் ஒரு நிதியாண்டில் ரூ.10 லட்சம் அல்லது அதற்கு மேல் பணத்தை ரொக்கமாக FD-யாகச் செய்திருந்தால், அதுவும் வரித் துறையின் கண்களில் படும். பலவங்கிகளில் பிரித்து FD செய்தாலும் சரி, மொத்தமாக பார்க்கப்படுவதால் ரூ.10 லட்சத்தை மீறினால் அது அறிவிக்கப்படும். அதனால் FD-க்கு பயன்படுத்தப்படும் பணத்தின் ஆதாரம் தெளிவாக இருக்க வேண்டியது அவசியம்.

ரொக்கமாக பங்குகள் அல்லது மியூச்சுவல் ஃபண்டுகள் முதலீடு: பங்குகள் (Shares), மியூச்சுவல் ஃபண்டுகள் (Mutual Funds), பத்திரங்கள் (Bonds) மற்றும் கடன் பத்திரங்களில் (Debentures) நீங்கள் ரூ.10 லட்சம் அல்லது அதற்கு மேல் ரொக்கமாக முதலீடு செய்திருந்தால், அது வரித்துறையின் கண்காணிப்புக்குள் வரும்.

பணமாக முதலீடு செய்தால், அது சம்பந்தப்பட்ட வணிக நிறுவனங்கள் அல்லது தரவுத் தகவல் அமைப்புகள் வழியாக வரித்துறைக்கு தெரிவிக்கப்படும். நீங்கள் அந்த பணத்தை எங்கிருந்து பெற்றீர்கள் என்பதற்கான ஆதாரம் இல்லையென்றால், அது சந்தேகத்திற்கு இடமளிக்கக்கூடும்.

கிரெடிட் கார்ட் பில்களை ரொக்கமாக செலுத்துவது: மாதம் தோறும் ரூ.1 லட்சம் அல்லது அதற்கு மேல் பணத்தை ரொக்கமாக கிரெடிட் கார்ட் பில்களுக்காக செலுத்தினால், அது வரித்துறையின் கண்களில் பதிவாகும். இதற்காக உடனடியாக நோட்டீஸ் வராமல் இருக்கலாம். ஆனால் தொடர்ந்து இதை செய்து வந்தால், "இந்த அளவிலான பணம் எங்கிருந்து வந்தது?" என்ற கேள்வி எழலாம். அதனால், பெரிய தொகைகளை கிரெடிட் கார்டுக்கு செலுத்தும்போது டிஜிட்டல் முறைகளை பயன்படுத்துவது நன்மை.

சொத்து வாங்கும்போது ரொக்கமாக பணம் செலுத்துவது: நீங்கள் ரூ.30 லட்சம் அல்லது அதற்கு மேல் மதிப்புடைய சொத்தை வாங்கினால், அந்த பணத்தின் மூலம் மற்றும் ஆதாரத்தை நீங்கள் வெளிப்படையாகத் தெரிவிக்க வேண்டும். நகரப் பகுதிகளில் இந்த வரம்பு ரூ.50 லட்சமாகவும், கிராமப் பகுதிகளில் ரூ.20 லட்சமாகவும் இருக்கலாம். சில மாநிலங்களில் இது மேலும் கண்டிப்பாக இருக்கலாம். ரொக்கமாக பணம் செலுத்தப்பட்டு அதன் ஆதாரம் தெரியவில்லையெனில், வரித்துறை சான்றுகளை கேட்கலாம். இந்த விபரங்களை Registration deed அல்லது Form 26QB-ல் தெரிவிக்க வேண்டும்.

வருமான வரித் துறையிடமிருந்து நோட்டீஸ் வந்தால் என்ன செய்ய வேண்டும்?: முதலில் நீங்கள் என்னுடைய பக்கம் தவறு நடந்துவிட்டதா என்று பதற வேண்டாம். இது வழக்கமான விசாரணையின் ஒரு பகுதியாக இருக்கலாம். உங்கள் வங்கி அறிக்கைகள், முதலீடு சான்றுகள், பணம் வந்த ஆதாரங்கள் (வியாபார வருமானம், பரம்பரை சொத்து, பரிசுகள் போன்றவை) அனைத்தையும் தயார் வைத்துக் கொள்ளுங்கள்.

உங்களுக்கே துறை கேட்கும் விபரங்கள் தெளிவாகத் தெரியவில்லையெனில், ஒரு நம்பகமான CA அல்லது வரி நிபுணரிடம் ஆலோசனை பெறுங்கள். வருமானத்தை ஒழுங்காக அறிவிக்க வேண்டும். நீங்கள் எந்தவொரு தவறும் செய்யவில்லை என்றால், அச்சப்பட தேவையில்லை. ஆனால் விலகல்கள் இருந்தால், அதைத் தானாகவே சீரமைக்கவும்.

நீங்கள் கவனிக்க வேண்டியவை: உங்கள் பண பரிவர்த்தனைகள் இவற்றுள் எதையாவது சேர்கிறதா? உங்களிடம் ஆதாரம் உண்டா? இல்லையெனில், வரித்துறையிடம் உங்கள் பெயரில் நோட்டீஸ் வருவதற்குள் இன்று தொடங்கி உங்கள் வருமானத்தை முறையாக பதிவு செய்யுங்கள்