கிரெடிட் ஸ்கோர் என்றால் என்ன? குறைந்த கிரெடிட் ஸ்கோரை அதிகரிக்க 5 அசத்தலான டிப்ஸ்!

நிதி நிறுவனங்கள் மற்றும் வங்கிகளில் "கிரெடிட் ஸ்கோர்" என்ற வார்த்தையை அடிக்கடி கேட்டிருப்போம். கடன் பெறுவதானாலும் சரி.. கிரெடிட் கார்டுக்கு விண்ணப்பித்தாலும் சரி கிரெடிட் ஸ்கோரை வைத்து தான் கடன் வழங்குனர்கள் உங்களுடைய விண்ணப்பத்தை பரிசீலனை செய்வார்கள். கடன் பெறுவதற்கு நீங்கள் தகுதியுள்ளவரா? என்பதைத் தீர்மானிப்பதே இந்த கிரெடிட் ஸ்கோர் தான். எப்படி இந்த கிரெடிட் ஸ்கோரை சீராக பராமரிப்பது? என்ற விவரங்களை இந்தப் பதிவில் பார்ப்போம்.

கிரெடிட் ஸ்கோர் என்றால் என்ன?: கிரெடிட் ஸ்கோர் என்பது 3 எழுத்து எண்ணாகும். இது 300 முதல் 850 வரை இருக்கும். இந்த கிரெடிட் ஸ்கோர் நீங்கள் கடன் பெற்று எவ்வளவு சிறப்புடன் செயல்பட்டு இருக்கிறீர்கள்? என்பதைப் பொறுத்தே அமையும்.

அதாவது வாங்கிய கடனுக்கான EMI தொகையை சரியான நேரத்தில் செலுத்தி இருக்கிறீர்களா? எந்த தேதியில் கடன் செலுத்தி இருக்கிறீர்கள்? எவ்வளவு காலம் தாமதமாக செலுத்தியிருக்கிறீர்கள்? எத்தனை முறை தவணையை தவறவிட்டிருக்கிறீர்கள்? என்பதை பொறுத்தே இந்த கிரெடிட் ஸ்கோர் அமையும்.

நீங்கள் எந்த கடன் பெற்றாலும் சரி அவற்றை சரியாக திருப்பி செலுத்தி இருக்கிறீர்கள் என்றால் நிச்சயம் கிரெடிட் ஸ்கோர் 750-க்கு மேல் இருக்கும். அதையும் மீறி உங்களுக்கு கிரெடிட் ஸ்கோர் குறைந்தால் நீங்கள் வேறு யாருக்கேனும் லோன் பெறுவதற்கு கையெழுத்துப் போட்டு உள்ளீர்களா? என்பதை சரி பார்க்க வேண்டும்.

எனவே கிரெடிட் ஸ்கோர் 750-க்கு மேல் வைத்திருக்க முயற்சி செய்ய வேண்டும். 600-க்கும் கீழ் இருந்தால் வங்கிகள் உங்களுக்கு கடன் தரலாமா? வேண்டாமா? என்பது குறித்து யோசிக்கும்.

உங்கள் கிரெடிட் ஸ்கோரை எவ்வாறு மேம்படுத்துவது?:

சரியான நேரத்தில் பணம் செலுத்துவதற்கு முன்னுரிமை கொடுங்கள்: உங்கள் மதிப்பெண்ணில் எதிர்மறையான தாக்கங்களைத் தவிர்க்க, உடனடியாக பில்களை செலுத்துவதை உறுதிசெய்யவும். கிரெடிட் கார்டு கடன்கள் முதல் பர்சனல் லோன் வரை அனைத்து கடன்களையும் சரியான நேரத்தில் திருப்பி செலுத்துவதை உறுதி செய்து கொள்ளுங்கள். இதுதான் கிரெடிட் ஸ்கோரை மேம்படுத்துவதில் முதல் படி.

கிரெடிட் கார்டு நிலுவைகளை நிர்வகித்தல்: கிரெடிட் பயன்பாட்டு விகிதத்தை சரியாக பராமரிக்கவும். எந்த கிரெடிட் கார்டு பெற்றாலும் சரி.. இந்த விகிதத்திற்கு கீழ் செலவு செய்தால் வங்கிகள் நீங்கள் பொறுப்பில்லாமல் செலவு செய்பவர் என்று முடிவெடுத்துவிடும். இதனால் உங்களுடைய கிரெடிட் ஸ்கோர் வெகுவாக குறையும். எனவே இந்த கிரெடிட் கார்டு பயன்பாட்டு விகிதத்தை சரியாக பராமரிக்க கற்றுக் கொள்ளுங்கள்.

புதிதாக கடன் பெற விண்ணப்பிப்பதை தற்காலிகமாக குறைக்கவும்: கிரெடிட் ஸ்கோர் குறைந்து கொண்டே வந்தால் தற்காலிகமாக புதிதாக கடன் பெற விண்ணப்பிப்பதை தவிர்க்க முயற்சி செய்யுங்கள். சிலர் கிரெடிட் கார்டுகளை வைத்துக்கொண்டே இன்னொரு கிரெடிட் கார்டு பெறுவதற்கு விண்ணப்பிப்பார்கள். இதுபோன்ற தவறுகளை தற்காலிகமாக நிறுத்தி வைப்பது கிரெடிட் ஸ்கோரை அதிகரிக்கும்.

உங்கள் கிரெடிட் அறிக்கையை கண்காணிக்கவும்: பிழைகள் மற்றும் தவறுகளை உடனுக்குடன் தவறாமல் சரிபார்க்கவும். ஆன்லைன் பரிவர்த்தனைகள் அதிகமான காரணத்தினால், இன்றைய சூழலில் நிறைய மோசடி சம்பவங்கள் நடக்கின்றன.

எனவே உங்களுடைய விவரங்களை தவறாக பயன்படுத்துகின்றனரா? என்பதை தெரிந்து கொள்வது மிக மிக முக்கியம். உங்களுடைய கிரெடிட் கார்டு அறிக்கையை அடிக்கடி சரி பார்ப்பது நல்லது. அதில் ஏதேனும் சந்தேகத்திற்கு இடமான பரிவர்த்தனை தென்பட்டால் உடனடியாக புகார் அளிக்கவும்.

பொறுப்பாக கிரெடிட் கார்டுகளை பயன்படுத்தவும்: கிரெடிட் கார்டு கடன்களுக்கு பொதுவாக அதிக வட்டி வசூலிக்கப்படுகிறது. இது தெரிந்தும் பலர் கிரெடிட் கார்டுகளைப் பெற்று அதை தேவையில்லாமல் செலவு செய்கின்றனர். இதுவும் கிரெடிட் ஸ்கோர் குறைவதற்கு வழிவகுக்கும்.

கிரெடிட் கார்டுகளை வைத்து தேவையில்லாமல் செலவு செய்வதனால் பில் செலுத்தும் போது சிரமப்படுகின்றனர். இதுவும் கிரெடிட் ஸ்கோர் குறைவதற்கு வழிவகுக்கும். எனவே கிரெடிட் கார்டு கடன்களுக்கு அதிக வட்டி என்பதை தெரிந்து கொண்டு ஒவ்வொரு முறையும் ஸ்வைப் செய்யுங்கள்.