அது என்னங்க Hybrid மியூச்சுவல் ஃபண்ட்? என்ன வருமானம் கொடுத்து இருக்கிறது?

பொதுவாக, பங்குச் சந்தைகளில் நேரடியாக முதலீடு செய்து, அதிக ரிஸ்க் எடுத்து, அதிக லாபம் பார்ப்பதை விட, மியூச்சுவல் ஃபண்ட்களில் மாதா மாதமோ அல்லது 3 மாதங்களுக்கு ஒரு முறையோ, முதலீடு செய்துவிட்டு, மிதமான லாபம் பார்க்க வழி வகுக்கும் ஈக்விட்டி மற்றும் கடன் மியூச்சுவல் ஃபண்டுகளைப் பற்றி நாம் அறிவோம்.

அதே போல, ஹைப்ரிட் மியூச்சுவல் ஃபண்டுகளும் ஒன்று. இந்த வகை மியூச்சுவல் ஃபண்டுகள் ஈக்விட்டி திட்டங்கள், கடன் திட்டங்கள் என கலந்து முதலீடு செய்வார்கள். ஒவ்வொரு வகையான ஹைப்ரிட் மியூச்சுவல் ஃபண்டுகளுக்கும் இந்த கலவை விகிதம் மாறுபட்டுக் கொண்டே இருக்கும்.

உதாரணமாக: செபி வழிகாட்டுதல் படி, கன்சர்வேட்டிங் ஹைப்ரிட் மியூச்சுவல் ஃபண்டுகளில் வரும் பணத்தில் 10 - 25 சதவிகித பணத்தை ஈக்விட்டி திட்டங்களில் முதலீடு செய்வார்கள். 75 - 90 சதவிகித பணத்தை கடன் திட்டங்களில் முதலீடு செய்வார்கள்.

இதையே பேலன்ஸ்டு ஹைப்ரிட் ஃபண்டுகளுக்கு எடுத்துக் கொண்டால், 40 - 60 சதவிகித பணத்தை ஈக்விட்டி சார்ந்த திட்டங்களில் முதலீடு செய்வார்கள். 40 - 60 சதவிகித பணத்தை கடன் திட்டங்களில் முதலீடு செய்வார்கள். இப்படி ஒவ்வொரு ஃபண்டு வகைக்குத் தகுந்தாற் போல முதலீடு செய்யும் விகிதம் மாறுபடும்.

இப்போது ஹைப்ரிட் மியூச்சுவல் ஃபண்டுகள், கடந்த காலங்களில் என்ன வருமானம் கொடுத்து இருக்கின்றன, என்பதை கீழே அட்டவணையில் பார்க்கலாம். தற்போதைக்கு நஷ்டம் அதிகமாகத் தெரிந்தாலும் நீண்ட காலத்துக்கு நல்ல வருமானம் கொடுத்திருப்பதையும் பார்க்க முடியும். எனவே உங்களுக்கு சரிப்பட்டு வரும் என்றால், இந்த வகையான மியூச்சுவல் ஃபண்ட்களில் முதலீடுச் செய்யலாம்.

கடந்த 10 ஆண்டுகளில் Hybrid மியூச்சுவல் ஃபண்டுகள் கொடுத்த வருமானங்கள் விவரம்
ஃபண்டுகளின் பெயர்	2020-ம் ஆண்டு	1 வருடம்	3 வருடம்	5 வருடம்	10 வருடம்
Hybrid: Aggressive Hybrid	-23.83	-21.32	-3.75	0.87	6.88
Hybrid: Balanced Hybrid	-19.77	-16.82	-2.40	1.40	6.00
Hybrid: Dynamic Asset Allocation	-17.10	-13.85	-0.66	2.30	6.81
Hybrid: Multi Asset Allocation	-17.35	-13.57	-0.94	2.29	4.94
Hybrid: Equity Savings	-13.22	-10.16	-0.15	3.45	--
Hybrid: Conservative Hybrid	-7.98	-4.72	1.97	4.39	6.94
Hybrid: Arbitrage	1.58	6.05	5.79	6.19	7.21