நாங்க நினைச்சா ஒரு டிரோன் அனுப்பி அமெரிக்காவுலயே டிரம்பை போட்டு தள்ளிடுவோம்.. ஈரான் பகிரங்க மிரட்டல்..

ஈரான்: ஈரானின் அணுசக்தி திட்டங்கள் உலகிற்கே ஆபத்தானவை என கூறி இஸ்ரேல் மற்றும் அமெரிக்கா ஈரான் மீது கடந்த மாதம் தாக்குதல் நடத்தின. ஈரானும் இதற்கு பதிலடி கொடுத்தது. ஈரானின் அணுசக்தி நிலையங்கள் மீது அமெரிக்கா தன்னுடைய விமானப்படை மூலம் வான்வெளி தாக்குதலில் ஈடுபட்டது.

தற்போதைக்கு ஈரான் உடனான மோதல்கள் தற்காலிகமாக முடிவுக்கு வந்துள்ளன. இருந்தாலும் ஈரான் மக்களும் ஈரான் அதிகாரிகளும் அமெரிக்க அதிபர் டொனால்ட் டிரம்ப் மீது கடுமையான கோபத்தில் உள்ளனர். இந்த சூழலில் ஈரான் தலைவர் அயதுல்லா கமேனியின் பிரதான ஆலோசகராக இருக்கக்கூடிய ஜாவத் லாரிஜினி தொலைக்காட்சி ஒன்றுக்கு அளித்த பேட்டியில் நாங்கள் நினைத்தால் ஒரு ட்ரோனை அனுப்பி அமெரிக்காவிலேயே டிரம்பை கொலை செய்து விடுவோம் என கூறியிருக்கிறார்.

அமெரிக்காவின் ஃபுளோரிடாவில் ஒரு ஆடம்பர பங்களா இருக்கிறது இந்த பங்களாவில் தான் டிரம்ப் அடிக்கடி தங்குவார். இந்த நிலையில் அந்த பங்களாவிலேயே வைத்து டிரம்பை கொலை செய்வதற்கு ஒரு சிறிய ட்ரோன் போதுமானது என ஜாவித் கூறியிருக்கிறார். டிரம்ப் இந்த பங்களாவில் தான் அடிக்கடி தங்குவார் அங்கே அவர் சன் பாத் எடுப்பார் என்பது எங்களுக்கு தெரியும் அந்த சமயத்திலேயே ஒரு டிரோனை அனுப்பி கொலை செய்து விடுவோம் என கூறி இருக்கிறார்.

ஈரான் மக்கள் அமெரிக்க அதிபர் டிரம்ப் மீது கடும் கோபத்தில் இருக்கின்றனர். டிரம்பை கொலை செய்ய வேண்டும் என ஈரானில் ஆன்லைன் பரப்புரையே நடைபெறுகிறது. கிரவுட் ஃபண்டிங் முறையில் இதற்காக நிதியும் திரட்டுகிறார்களாம். ஜூலை 7ஆம் தேதி வரை டிரம்பை கொலை செய்ய வேண்டும் என்பதற்காக 27 மில்லியன் டாலர்கள் வரை நிதி திரட்டப்பட்டுள்ளதாம்.

100 மில்லியன் டாலர்கள் நிதி திரட்டுவதை இலக்காக கொண்டிருக்கிறார்களாம். அமெரிக்க அதிபர் டிரம்பை யார் கொலை செய்கிறார்களோ அவருக்கு இந்த 100 மில்லியன் டாலர் வழங்கப்படும் என தெரிவிக்கப்பட்டுள்ளது. தற்போது தான் மத்திய கிழக்கு நாடுகளில் அமைதி ஏற்பட்டிருக்கிறது. இந்த சூழலில் டிரம்பை கொலை செய்வோம் என ஈரான் மூத்த அதிகாரி தெரிவித்திருப்பது மீண்டும் பதற்றத்தை ஏற்படுத்தி இருக்கிறது.