அமெரிக்காவுக்கு பதிலடி கொடுத்த சீனா.. வாஸ்ட்அப்-க்கு தடை.. என்ன நடக்குது..?!

ஒரு காலத்தில் 100 மெசேஜ்-க்குள் சேட்டிங் செய்து காதலை வளர்த்த சமுகம் வாட்ஸ்அப் வந்த பின்பு சேட்டிங், போட்ட ஷேரிங், வீடியோ கால், வாய்ஸ் நோட் என காதலை 360 கோணத்திலும் வளர்த்து வருகின்றனர். தனிநபர் சேட்டிங் தாண்டி ஆபீஸ் குரூப், பிஸ்னஸ் அக்கவுன்ட் என மக்களின் வாழ்க்கையில் ஒரு அங்கமாகவே மாறியுள்ளது இந்த வாட்ஸ்அப்.

இப்படிப்பட்ட வாட்ஸ்அப்-ஐ சீன அரசின் உத்தரவைத் தொடர்ந்து, சீனாவின் ஆப்பிள் ஆப் ஸ்டோரில் இருந்து அமெரிக்க நிறுவனமான மெட்டா-வுக்கு (Meta) சொந்தமான வாட்ஸ்அப், த்ரெட்ஸ் (Threads) ஆகியவை நீக்கப்பட்டுள்ளன. இந்த நடவடிக்கை, அமெரிக்கா - சீனா இடையே ஏற்கனவே நிலவி வரும் வர்த்தக போரின் பதற்றத்தை மேலும் அதிகரித்துள்ளது.

சீனாவின் இணையக் கட்டுப்பாட்டு அமைப்பான சைபர்ஸ்பேஸ் நிர்வாகம் (Cyberspace Administration) தான் இந்த செயலிகளை நீக்குமாறு ஆப்பிள் நிறுவனத்திற்கு உத்தரவிட்டதாகத் தகவல்கள் தெரிவிக்கின்றன. வாட்ஸ்அப் மற்றும் த்ரெட்ஸ் செயலிகளை நீக்குவதற்குத் தேசிய பாதுகாப்பு காரணங்கள் என கூறப்பட்டாலும், இதுவரை அதிகாரப்பூர்வ விளக்கம் வெளியாகவில்லை.

நியூயார்க் டைம்ஸ் செய்தித்தாளின் அறிக்கையின்படி, "சீன அதிபர் ஜி ஜிங்பிங்-கிற்கு எதிராக மக்களை தூண்டிவிடும் மற்றும் சீனாவின் இணைய பாதுகாப்பு சட்டங்களை மீறும் வகையிலான கருத்துக்கள் வாட்ஸ்அப் மற்றும் த்ரெட்ஸ் செயலிகளில் காணப்பட்டதாகச் சீன அரசாங்கம் கண்டறிந்தது" என்று, இது குறித்து தகவல் அறிந்த ஒருவர் தெரிவித்துள்ளார்.

வாட்ஸ்அப் மற்றும் த்ரெட்ஸ் போன்ற அமெரிக்க நிறுவனங்களின் செயலிகள் சீனாவின் Great Firewall கட்டுப்பாடுகள் காரணமாக பெரிதாகப் பயன்படுத்தப்படவில்லை என்றாலும், இந்த நடவடிக்கை அமெரிக்கா - சீனா இடையேயான தொடர்ச்சியான தொழில்நுட்ப மோதலைக் காட்டுகிறது.

தேசிய பாதுகாப்பு காரணங்களுக்காக டிக்டாக் செயலியைத் தடை செய்வதற்கான சட்டத்தை அமெரிக்கா கொண்டுவர முயற்சித்து வருகிறது. ஆனால், சீன தொழில்நுட்ப நிறுவனமான ByteDance நிறுவனத்திற்கு சொந்தமான டிக்டாக் செயலி அமெரிக்காவில் மில்லியன் கணக்கானோரால் பயன்படுத்தப்படும் அதே சமயம், வாட்ஸ்அப் மற்றும் த்ரெட்ஸ் போன்ற செயலிகள் சீனாவில் பெரிதாகப் பயன்படுத்தப்படுவதில்லை.

சீனாவில் அந்நாட்டினரால் உருவாக்கப்பட்ட வீசாட் (WeChat) செயலி தான் பிரதான மெசேஜிங் சேவை தளம். மெட்டா நிறுவனத்தின் பேஸ்புக், இன்ஸ்டாகிராம், மெசஞர் போன்ற பிற செயலிகள் சீனாவில் பதிவிறக்கம் செய்யக் கிடைத்தாலும், கிரேட் ஃபயர்வால் கட்டுப்பாடுகள் காரணமாக அவற்றைப் பயன்படுத்த முடியாத நிலை பல ஆண்டுகளாக உள்ளது.